Tàm dùl dơ̆ livestream lồi nhai 4/2026 bơh Sờh Lơh sa mờ măi mok mờ Kă bro phan càr Gia Lai pơgồp bal mờ Kụk Kă bro phan điện tử mờ Lơh sa sồ (Ƀộ Lơh sa mờ măi mok mờ Kă bro phan) bơyai lơh, phan bơkah pơn rơ ƀan ít Hoàng Đông (sàh Bình An, càr Gia Lai) neh tăc geh gĭt nđờ rơbô phan bơna mìng tàm tơngai lơyah. Bi Hồ Thị Mỹ Phúc – Cau tờm anih lơh ƀañ- pà gĭt, phan bơna neh lơh geh jơnau sồr OCOP 3 sơrmañ bơh nam 2019, mơya lài do mìng tăc bro gùt dar ƀòn lơgar lơm tài bơh tơngai ơn prăp lơyah. Tơnơ̆ tŭ ngui broă lơh jồp jơh nhơm nàng tơn jŏ tơngai ngui, di pal nàng jun pơdiang lòt ngài, phan bơna neh gơ dờp geh mờ kă bro phan điện tử, mờ ală sră blơi tus gĭt nđờ rơhiang nơm ƀañ.

Bi Hồ Thị Mỹ Phúc pà gĭt: “Pah dơ̆ Megalive bơh Sờh Lơh sa mờ măi mok mờ Kă bro phan càr dê geh lơh, den phan bơna bol añ dê gơ rề uă tiah tàm internet, cau gĭt tus uă ngan. Do là broă lơh dong ai mpồl lơh sa kă bro in bơtàu tơnguh mhar ngan. Dùl dơ̆ Mega live gơtùi lơh geh tus gĭt nđờ rơbô sră blơi. Bol añ rơ̆p jồp jơh nhơm phan bơna dê, 2 tus 3 ngai rơ̆p tus tàm tê năc dê, gàr tơl bơta bơkah niam”.

Drờm bè hơ̆ sơl, Mpồl lơh broă bal Broă lơh sa suơn sre lơh ka Mỹ An (sàh  Phù Mỹ Đông, Gia Lai) lài do gơtìp kal ke bè broă tăc bro phan bơna tiñ zờu bơh he dê lơh geh jơnau sồr OCOP. Tơnơ̆ tŭ tam gơl tus tăc phan tàm ală gah tàm internet, mpồl lơh broă bal neh pờ ơnàng geh drà tăc bro phan, mờ priă lơh geh gơguh loh làng tàm 2 nam do.

Bi Nguyễn Thụy Thúy Vi, Phó Củ tịch Mpồl duh broă atbồ Mpồl lơh broă bal pà gĭt: kă bro phan điện tử ờ mìng dong tus rềp mờ năc uă tiah rlau lơm mờ gam lơh geh gah tàm tơngĭt phan bơna tơn, bơh hơ̆ tam gơl niam phan bơna mờ broă tăc phan di pal mờ jơnau kờñ drà kă bro dê.  

Bi Nguyễn Thụy Thúy Vi pà git: "Lài do, bol añ mìng tăc phan tàm càr lơm mơya tơnơ̆ tŭ dờp gĭt geh bơta ƀuơn bơh tăc phan online dê den tàng bol añ neh cùp rùp pơnđàng clĭp mờ lam lơh ală dơ̆ livestream tàm drà kă bro phan điện tử, halà tàm pang fanpage bơh Mpồl lơh broă bal dê tơn mờ tơnơ̆ hơ̆ khà sră blơi phan kung gơguh, bol añ kung ngai sơlơ lam lơh pràn bè bơta pràn tăc phan online rlau”.

Tŭ do, càr Gia Lai geh pơgăp bơh 400 tus 450 phan bơna OCOP, uă ngan là phan lơh geh bơh broă lơh sa suơn sre, phan bơkah pơn rơ ƀòn lơgar. Mơya, ală cau tờm lơh gơlik OCOP tàm càr kung uă ngan tàm broă dềt, ờ hoan pràn bè bơta chài sồ mờ bơta pràn gĭt tàm drà kă bro, lơh broă tăc bro phan ờ hềt ngan ngồn kơ̆ kơl jăp.

Tàm 2 nam do, uă broă lơh dong kờl bơta chài tăc phan tàm internet, livestream, lơh tơngume sồ... neh geh lam lơh, dong cau lơh broă sa mờ mpồl lơh broă bal hời rơ hời lơh kwèng mờ tiah kă bro phan tàm internet. Bơh hơ̆ pờ ơnàng geh drà kă bro, bơt bơtàu geh mat kă bro phan.

Ồng Nguyễn Đình Kha, Phó Kwang Lam bồ Sờh Lơh sa mờ măi mok mờ Kă bro phan càr Gia Lai pà gĭt, tàm tơngai pa, càr pơn jat tai sền gĭt kă bro phan điện tử là dùl gah kwơ màng. Tơngai bơh nam 2026–2030, càr rơ̆p wèt tus lơh pràn kă bro phan điện tử gan tiah nhàr lơgar, bơh hơ̆ ờ mìng tơnguh uă bơta kwơ phan lơh geh bơh broă lơh sa suơn sre dê lơm mờ gam hời rơ hời ai mat kă bro phan tiah do dê brồ guh tàm drà kă bro ală lơgar:  "Bol añ neh lơh broă rơndăp lơh tam gơl sồ bơh gah lơh sa mờ măi mok mờ kă bro phan. Tàm hơ̆ gah kă bro phan sền gròi tam gơl sồ tàm ală gah bè kă bro phan bơh ală gah kă bro phan điện tử. Gơwèt mờ gah tăc phan mờ lơgar ndai, bol añ sền gròi tàm kă bro phan điện tử gan tiah nhàr lơgar lơh bal mờ ală drà kă bro phan điện tử ală lơgar dê. Kờp dŭ tàm nhai 5 do, bol añ rơ̆p bơyai lơh dùl dơ̆ pơrjum, cribơyai bè tơngume kă bro phan điện tử gan tiah nhàr lơgar”.

Tam gơl sồ gam hời rơ hời lơh tam gơl broă phan lơh geh bơh broă lơh sa suơn sre càr Gia Lai dê gĭt mờ drà kă bro, pờ geh ală gah tăc bro phan ngăc ngar mờ geh cồng nha rlau. Tŭ cau lơh broă sa ngan ngồn lơh tờm măi mok, ală phan bơna bơkah niam bơh ƀòn lơgar dê ờ mìng lòt mhar rlau lơm mờ gam bơtàu tơnguh kơnhăp jŏ tŭ geh drà kă bro dờng ơnàng.