Ngai 10 nhai 08 nam 1947, tàm ƀòn Ma Hinh, tŭ do là ƀòn Đất Bằng, Chi bộ Đảng sơnrờp bơh kơnhoàl Cheo Reo (gơwèt càr Gia Lai yau dê) geh tơnggơs mờ 3 nă đảng viên:  Ksor Ní, Rơchơm Thép mờ Rơchơm But. Ồng Ksor Ní geh pin dờn lơh Bí thư Chi bộ. Tàm ală nam nhai kăc màng gam uă bòl glar kal ke, ală đảng viên neh bơt bơtàu anih chinh trị, hòi jà, tơrgùm wơl mpồl bơtiàn, hời rơ hời ai srơh kăc màng bơtàu tơnguh. Pa do, ù tiah tơnggơs Chi bộ sơn rờp bơh kơnhoàl Cheo Reo dê geh Anih duh broă Làng bol càr Gia Lai bơcri priă lơh gơ gơs Tiah lời kir sơnrai tàm bă ù ơnàng pơgăp 1 lồ 7 sào. Tiah do gơ gơs “ù tiah tam lơh” bơto bơtê bơhiàn ờs mờng kăc màng ai ală rơnàng in. Di dơ̆ tơngkah kir sơnrai 81 nam Kăc màng nhai 8 geh cồng nha mờ Ngai Sơntờm Dà lơgar ngai 2/9, rê còp tiah lời kir sơnrai, ồng Trịnh Thanh Khiết, Phó Bí thư Đảng ủy sàh Phú Túc đơs nền: “Jơnau bơsram dờng ngan rlau jơh bơh broă mờ tơnggơs Chi bộ đảng sơn rờp tàm Cheo Reo ngan là bơta lơh nền ngan ngồn bơh kwang bàng đảng viên dê gơwèt mờ làng bol kòn cau mờ làng bol tàm tiah do dê...pal lơh bal mờ làng bol, pal rềp mềr mờ làng bol...”.

Rềp làng bol, bal mờ làng bol là jơnau bơsram bơh ală ngai sơn rờp tơnggơs Chi bộ Đảng tàm Cheo Reo (Gia Lai) tus tŭ do pơn jat tai geh lơh ngan ngồn mờ kơnòl bơh tơl nă kwang bàng, đảng viên tàm ƀòn lơgar dê. Tơnơ̆ rơndăp tăp sèng, tŭ do ƀòn Đất Bằng geh mờr 800 hìu bơnhă, mờ rlau 3 rơbô 180 nă cau, jơh ală ndrờm là kòn cau Jrai. Chi bộ tŭ do geh 73 nă đảng viên, là mpồl cau tờm bal mờ Mặt trận Dà lơgar mờ ală mpồl cau mblàng yal, hòi jà làng bol lơh jat gùng dà broă lơh bơh Đảng, adat boh lam bơh Dà lơgar dê; bơtàu tơnguh lơh sa, bơt bơtàu rài kis niam chài. Là kwang bàng kơnòm să neh jơh bơsram Đại họk, bi Rơchơm Bết, (kòn cau Jrai), Bí thư Chi bộ mơkung là Lam bồ ƀòn Đất Bằng đơs nền: “Să tờm añ là Bí thư Chi bộ thôn, sùm sền gĭt kơnòl bơh he dê là sùm mblàng yal, hòi jà làng bol bơtàu tơnguh lơh sa, lơh jat niam gùng dà broă lơh bơh Đảng, adat boh lam bơh Dà lơgar dê... Gơwèt mờ ală broă gam ờ hềt loh làng, gơlik geh tàm thôn, bol añ sùm rcang lài gĭt loh ală bơta nàng di tŭ bơsong...”

Broă lơh đơng lam, sồr lơh bơh kấp ủy đảng tàm Đất Bằng tơrgùm tàm ală broă ngan ngồn tàm rài kis. Tàm nhai 7 pa do, Chi bộ pơgồp bal mờ Mặt trận, mpồl cau kờp sền dong kờl mờr 200 hìu bơnhă lơh ring bal ală jơnau yal tơngĭt sră dờp gơnoar ngui ù. 60 hìu bơnhă gam dờp broă lơh dong kờl mpồl bơtiàn geh hòi jà tam gơl bơh dờp priă mat tus pơyoa bơh tàm tài khoản. Bal mờ hơ̆ là ală broă lơh sền gròi hìu bơnhă cau dờp bơta dong kờl mpồl bơtiàn dê, dong kờl cau kal ke, kham sơm kòp ai cau dờng sơnam in, rcang lài kơryan kòp bơtờp.

Bal mờ broă mblàng yal, hòi jà, kwang bàng, đảng viên tàm Đất Bằng gam lòt lài tàm broă tam gơl broă kơlôi sơnơng, broă lơh, ngan là tàm broă lơh sa. Đất Bằng tŭ do neh lơh gơs ală tiah lơh kòi sre, bùm blàng, tào; uă gơl gùng mut tàm tiah lơh sa geh bơcri priă lơh, lơh geh ală bơta niam nàng làng bol in bơtàu tơnguh lơh sa. Đảng viên kơnòm să Kpă Tuyên là dùl tàm ală cau lam lài tàm broă ngui bơta gơguh jak jak chài măi mok tàm broă lơh sa, tam gơl broă lơh yau. "Là dùl nă Đảng viên, să tờm añ sùm bơsram mờ lơh jat krơh niam bơh ală cau lòt lài dê tàm broă lơh broă sa. Lài do, broă lơh sa suơn sre uă ngan gơ wèt tàm kàl lơh sa den tàng priă lơh geh ờ hềt uă… Tŭ do, kơnờm bơta pơlam gùng dà mờ rơcang lài ngui bơta jak chài - măi mok, ai măi mok mờ ală phan tuh dà is tàm broă lơh sa… broă ngui măi mok pa neh dong tơnguh uă cồng nha tam phan."

Bơh "gar sơntìl pơrhê" geh rơ sìh tàm ƀòn Ma Hinh 79 nam lài, tus ală cau đảng viên tŭ do dê, gùng dà kăc màng tàm ƀòn Đất Bằng, sàh Phú Túc, càr Gia Lai kung gam geh tàm pơrdờn mờ ală broă lơh geh ngan, ngan ngồn. Hơ̆ là rềp làng bol, wă làng bol, bal mờ làng bol tă bơsong kal ke; là lam lài tàm bơtàu tơnguh lơh sa, ngui jak chài măi mok, bơ̆t bơtàu rài kis ngai sơlơ niam bơnĕ rlau tai.