Tàm tiah lòt nhơl mpồl bơtiàn ƀòn Ako Dhông, sơnah ƀòn Buôn Ma Thuột, ù tiah cing mồng bal mờ ală dơ̆ bơyai lơh đơs crih tam ya ờs mờng bơh yau neh gơ hòi gơ jà uă ngan năc lòt nhơl tus bal sền gĭt tàm ală ngai bồ sơnam pa. Bi Freya, năc lòt nhơl tus bơh lơgar Mỹ, pà gĭt, ù tiah tơlir niam, nhơm trồ tiah ram mhŭ bal mờ bơta rềp mềr bơh làng bol mờ bơta niam chài ù tiah do dê là ală bơta gơ lời wơl niam is ồn ngan dê:“Bol añ geh wă rò jơh nùs ngan, chờ hờp ngan geh tus tàm do mờ gơ lơh bè kàl prang, bơta mờ bol añ ờ kwèng ngan tài bơh hìu bơnhă bol añ ơm tàm Mỹ, trồ tiah mrềt ngan tàm tơngai sơnam pa. Den tàng, bol añ chờ hờp ngan tŭ geh dờp lèng bơta ram mhŭ tàm kàl do. Tàm Mỹ, tơl nă cau sùm sa chờ hờp uă rlau, ai tàm do, gơ lơh bè geh uă bơta bơtòm tơrgùm mờ sa chờ hờp bal mờ hìu bơnhă uă rlau là mờ gơ̆p bơyô mờ cau ndai”.

Gơwèt mờ năc lòt nhơl tàm lơgar, Dăk Lăk kung là tiah tus tàm tơngai bồ sơnam pa nàng pơgồp bal mờ ơm rlô să, sền gĭt ù tiah brê bơnơm mờ jòi gĭt niam chài kơnhoàl ù tiah. Bi Nguyễn Ngọc Chân, ơm tàm ƀòn dờng Hồ Chí Minh pà gĭt, ală dơ̆ lòt bè hơ̆ dong ală oh kòn bi dê geh tai bơta gĭt wă mờ sền gĭt bơta geh ngan:“Tàm tơngai bồ sơnam pa den 2 nă sau geh ơm rlô bơsram, den tàng hìu bơnhă añ tus Buôn Ma Thuột là tiah tờm kơphê Việt Nam dê, kờñ ai 2 nă sau in lòt jòi gĭt bè niam chài, gĭt bè niam chài bơh tiah do dê kung bè bơta ù tiah, ai ală sau in gĭt wă geh ù tiah Tây Nguyên là bè lơi”.

Tàm ù tiah niam chài bơh kòn cau Rơđê dê, broă sa phan sa ờs mờng, sền ràng tơlik đơs crih tam ya mờ tìp mat lơh kwèng bal mờ ală cau chài neh cèng wơl ai năc lòt nhơl in ală sền gĭt pal kah ngan. Bơh ală bơta kwơ neh geh bơh jŏ hơ̆, làng bol tàm ală ƀòn lơgar neh hời rơ hời bơtàu tơnguh lòt nhơl jat tàm bơhiàn niam chài mpồl bơtiàn dê.

Jat ồng Y Nuel Niê, kra ƀòn ƀòn Ako Dhông, ală nam pa do, lòt nhơl mpồl bơtiàn geh làng bol tàm ƀòn sền gròi bơcri priă, lơh geh ală broă lơh pơgồp bal mờ sền gĭt ƀòn brê bơm mờ niam chài. Tàm nam pa, mpồl atbồ lòt nhơl mpồl bơtiàn bơh ƀòn dê lam lơh tai ală phan bơna mờ broă lơh nàng kờñ tơnguh uă bơta niam drơng broă năc lòt nhơl in: “Ală phan bơna, is ồn là bè phan sa rơ̆p li la rlau pơndrờm mờ nam 2025, ală broă lơh ndai bè đơs crih kung pal tam gơl pa ngan rlau. Tàm ƀòn he dê den pah nhai rơ̆p geh broă lơh đơs crih tam ya ờ sa priă drơng năc lòt nhơl in”.

Gơwèt mờ ală mpồl lơh sa kă bro lòt nhơl tàm Dăk Lăk, bơtàu tơnguh lòt nhơl pơgồp bal mờ ƀòn brê bơnơm mờ niam chài mpồl bơtiàn là gùng lòt kơnhăp kơ̆. Mò Nguyễn Thị Ngọc Anh, Kông ty pơgồp bal lòt nhơl ƀòn brê bơnơm mpồl bơtiàn Ko Tam, sơnah ƀòn Tân Tập, pà gĭt, lòt nhơl ƀòn brê bơnơm- mpồl bơtiàn ờ mìng cèng wơl priă lơh geh lơm, mờ gam wèt tus broă sền gàr tiah ơm kis, ngui geh bơta ƀuơn broă lơh sa suơn sre- ròng phan tàm càr dê:“Tài bơh là tiah lòt nhơl ƀòn brê bơnơm, niam chài mpồl bơtiàn den tàng bol añ tơrgùm tàm lơh bơka niam ù tiah, rcang ală phan biăp bùm kơnuh plai đo bơh ròng phan, tam phan nàng drơng bè broă trŭ gơm phan sa. Tài bơh bol añ rcang lài mờ ròng tam phan tàm dùl bă tiah den jơh ală ngai sa ơm rlô, ngai sa tềp, giă bol añ gàr bè ờs ờ tam gơl, kung ờ sa tai khat dùl bơnah priă lơi tai pơndrờm mờ ngai bè ờs”.

 Ngui niam bơhiàn niam chài mpồl bơtiàn mờ bơta ngan ngồn tàm tơl bơta sền gĭt, lòt nhơl Dăk Lăk gam rơ hời lơh niam nùs năc lòt nhơl. Tàm ală ngai bồ sơnam pa, săp ntas cing, gùng tam ya xoang mờ bơta rềp mềr, kờñ gơboh năc bơh làng bol ală ƀòn lơgar dê neh gơ gơs bơta tờm lơh geh bơta gơ hòi gơ jà ai năc lòt nhơl tiah do dê.