Ƀòn O Ngol: Ƀòn lơgar pa pơgồp bal mờ sền gàr niam chài kòn cau Jrai

VOV4.K’Ho- Tàm broă bơt bơtàu ƀòn lơgar pa, broă sền gàr mờ ngui niam bơhiàn niam chài jơi bơtiàn dê sùm geh càr Gia Lai is ồn sền gròi. Tàm ƀòn O Ngol, sàh Ia Vê, kơnhoàl Chư Prông, săp ntas cing mồng, jơnau đơs pơnđick mờ ală bơhiàn lơh Yàng ờs mờng kung gam geh gàr niam sùm mờ lơh gơrề uă tàm mpồl bơtiàn. Mờ bơta tàm sơm bat tê bal bơh kra ƀòn, cau chài mờ rơnàng kơnòm să dê, ală bơta kwơ niam chài ờs mờng gam geh sền gàr ndrờm bal mờ bơta bơtàu tơnguh, pơgồp bơnah bơt bơtàu ƀòn lơgar ngai sơlơ pas niam, niam jak mờ cèng bềng bơhiàn niam chài jơi bơtiàn dê.

Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Ngai lồi poh tàm Hìu Niam chài mpồl bơtiàn ƀòn O Ngol, sàh Ia Vê, kơnhoàl Chư Prông, càr Gia Lai hô hơng săp đơs ñiŏ nhơl tàm bơrlŭ mờ săp ntas cing mồng dê.  Hơ̆ là nùs nhơm bơh dơ̆ mblàng bơto dròng cing mồng mờ đơs jơnau pơnđick kòn cau Jrai, mờ bơta tus bal bơh uă ngan ală rơnàng làng bol mờ ală cau chài, kra ƀòn tàm sàh dê. Là cau tơnggơs mpồl tơrgùm wơl cau ùr tàm ƀòn O Ngol tus bal sền gàr bơhiàn niam chài jơi bơtiàn dê, bi Siu H’Biáo, đơs:“Jơnau pơnđick kòn cau Jrai kung geh bàr pe jơnau đơs lơh pa jờng rơ ală cau ling khin cha jak chài tàm rài tam lơh. Pơn yơu bè jơnau đơs “Ơ ală kồñ, wa; ală bi”, jơnau "Hơ̆k kơdơ̆k – chờ hờp ngai tơngklàs”, ală jơnau đơs pơnđick jờng rơ nùs nhơm kăc màng bơh bèp ồng lài do dê. Is ồn, ală jơnau đơs pơnđick jat tàm gùng đơs pơnđick mờ ală wa cau dờng sơnam đơs nàng jờng rơ Wa Hồ tề lam kăc màng. Broă lơh tŭ do ờ gam kal ke bè lài do tai; bơh tŭ geh điện thoại ngăc ngar, he gĭt ngui gơ den geh kwơ ngan ai broă lơh in. Pơn yơu bè tơrgùm mpồl, tŭ kờñ yal jơnau mờ tàm bơyai broă lơh den ƀuơn ngan”.

Kra ƀòn Siu Jo pơn yờ să đơs: O Ngol là ƀòn pôs đồng kăc màng, làng bol sùm tam klăc bal, pin dờn ngan tàm bơta đơng lam bơh Đảng dê. Rlau 10 nam do, O Ngol sùm lơh geh sră jờng rơ ƀòn niam chài kấp càr. Tàm hơ̆, pơn rơ ngan là ală broă lơh prap gàr mờ ngui niam ală bơta kwơ niam chài ờs mờng. Kra ƀòn Siu Jo đơs: “Añ gơ lơh chờ hờp ngan tài bơh geh rơnàng kơnòm să tàm pơrdờn tai bơsram dròng cing mờ sền gàr niam chài ờs mờng bèp ồng dê lời wơl. Mìng is ƀòn O Ngol geh 3 mpồl dròng cing tàm ală rơnàng sơnam; mpồl dròng cing ơruh pơnu, mpồl dròng cing kơnòm pa tàu mờ mpồl dròng cing cau dờng sơnam... Geh bal cau chài bèp Nga dê mờ Kwang lam bồ thôn kung dròng cing bal mờ oh mi sơl. Să tờm añ ờ pal kơlôi sơnơng tai, tài bơh neh geh mpồl dròng cing tàm pơrdờn, tơnơ̆ do neh kra rê mờ ồng pàng den neh geh ală dơ̆ lơh chờ kwơ màng bơh ƀòn dê ndrờm kờñ geh tus săp ntas cing dê lơm”.

Ƀòn O Ngol geh mờr 120 hìu bơnhă, mờ mờr 500 nă cau, gơ lơh bè jơh ală cau tàm do ndrờm là kòn cau Jrai lơm. Ƀòn neh lơh sir broă lơh ƀòn lơgar pa bơh 7 nam lài. Làng bol sùm tam klăc bal bơt bơtàu rài kis hờm ram, chờ hờp. Is ồn, broă gàr niam ală broă lơh niam chài bè cing mồng, bơyai lơh ràng tơlik đờng goòng jơi bơtiàn, tam ya xoang, đơs pơnđick là jơnau kờñ ờ gơtùi ờ geh tàm rài kis làng bol kòn cau Jrai dê. Gơwèt mờ ồng Siu Huỳnh- Ƀí thư Ci ƀộ, Lam bồ thôn O Ngol yal, đơs pơnđick mờ ràng tơlik dròng cing jañ mồng neh gơmŭt tàm poăc mhàm rao: “Mpồl bơtiàn ngai sơlơ bơtàu tơnguh jat gùng dà pa ngan, pal jat ală bơta gơguh jak rài kis dê, mơya să tờm añ kung pơn đơl pràn lơh ngan bơsram đơs pơnđick, đơs ală jơnau đơs bơhiàn kăc màng dê mờ jơnau pơnđick kòn cau Jrai. Mờ gơnoar broă là Ƀí thư Ci ƀộ mơkung là Lam bồ thôn, añ sùm kơlôi sơnơng pal lơh bè lơi nàng lơh geh jơnau sồr broă lơh, kơnòl broă geh jàu dê. Añ pal sùm lơh krơh lài ngan, kis bè lơi di pal nàng làng bol in sền tàm hơ̆ nàng bal mờ gơ̆p pơn đơl pràn lơh ngan, añ pal lơh broă niam, di adat boh lam den tàng đơs làng bol hơ̆ sồng iăt mờ lơh jat. Cồng nha lơh geh bơh bồ tơngai lơh broă tus tŭ do, ƀòn bol añ lơh bơta lơi kung ndrờm lòt lài lơm, ngan là tàm srơh bơt bơtàu ƀòn lơgar pa”.

Ồng Siu Khlo, Ƀí thư Đảng ủy sàh Ia Vê, kơnhoàl Chư Prông, pà gĭt: Lơh jat Jơnau sồr sồ 12 bơh Mpồl Lơh kơnòl broă sùm Tỉñ ủy càr Gia Lai dê bè bơt bơtàu ƀòn lơgar pa tàm tiah làng bol jơi bơtiàn dồ ết nă cau, bơh lồi nam 2018, ƀòn O Ngol neh lơh geh ală broă jàu, mờ gơ gơs dùl tàm ală ƀòn lơgar pa pơn rơ ngan bơh càr dê: “Ƀòn O Ngol lơh ja gùng dà broă lơh “Dà lơgar mờ làng bol lơh bal, làng bol neh pờ gùng lòt tàm ală thôn dờng ơnàng rlau mờ sàng goh niam. 2 gah gùng ƀòn ndrờm geh gùng che ồs đèng sòl àng den tàng ờ gơlik geh bơta ntung kơñau phan, rềs àr mpồl bơtiàn. Hìu đam niam, suơn chi geh pơng gàr, geh ală tờm chi, tàm dơlam là suơn kơphê mờ tiêu... Tŭ do uă hìu bơnhă neh geh hìu ơm dờng niam, blơi phan ngui lơh broă sa bè rơndeh kông nông, rơndeh lơ òr; ai rơndeh măi den ndrờm là rơndeh pa lơm. Is ồn ƀòn geh hìu niam chài mpồl bơtiàn, geh mpồl dròng cing mồng mờ ală bơta đờng goòng jơi bơtiàn bè đờng goong, đờng Tơrưng, Ală cau chài lơh niam săp ntas cing mờ làng bol sùm gĭt sền dờng màng mờ sền gàr bơhiàn niam chài bơh jơi bơtiàn he dê”.

Ƀòn O Ngol, sàh Ia Vê, kơnhoàl Chư Prông (càr Gia Lai) ngai do là ƀòn lam lài bè dùl ƀòn lơgar pa tàm tiah làng bol jơi bơtiàn dồ ết nă cau dê. Do là bơta niam tàm broă sền gàr hwềng tờm niam chài jơi bơtiàn dê tàm tơngai rài kis pa tŭ do dê. Mờ bơta mut lơh bal bơh jơh ală anih lơh broă cíñ trị, gơnoar broă lam lài bơh kra ƀòn, cau geh bơngă pin dờn, mờ bơta tàm pơrdơn jơh nùs bơh rơnàng kơnòm să dê neh pơgồp bơnah sền gàr bơta kwơ niam chài jơi bơtiàn, mơkung sơlơ tơnguh tai srơh bơt bơtàu ƀòn lơgar pa jat gùng dà kơ̆ kơl jăp jŏ jòng, niam jak mờ cèng bềng bơhiàn niam chài.

Viết bình luận