Ờ geh vĕ mut mpồng, mìng geh ù tiah bơh lŭ mờ lŭ dê lơm, khat dùl nă cau lơi tŭ tus mờ ù tiah hàng niam bơnai lŭ Đá Đĩa rơ̆p lòt gan ƀòn lŭ geh mat sơnđan Phú Hạnh. Pa do ƀòn do nisơna tiơng pơn rơ tàm internet mờ gơ hòi gơ jà uă năc lòt nhơl rềp ngài tus mờ ƀòn nàng jòi gĭt ală ù tiah lŭ dê. Tiah do ờ mìng geh ù tiah hàng niam lơm, mờ gam lời wơl uă tềl lời wơl yau dê. Bơta is ồn là tàm ƀòn do kung gam gàr geh ală tơrlung dà lŭ yau bềng dà mờ lơngơm mrềt. Cau kơlôi sơnơng kah yau niam chài ồng Nguyễn Danh Hạnh tŭ lòt sền bè ală phan lời wơl lŭ bơh ƀòn Phú Hạnh dê đơs bè ală tơrlung dà lŭ yau bè do: "Bơh lòt sền bol añ gŏ là ală tơrlung dà do neh geh pơgăp 200 nam. Añ kơlôi là bơh hơ̆ kờñ pal geh prap gàr nàng tơnơ̆ do in ờ mìng bol he jòi gĭt tai bè dùl rài kah yau bơh bèp ồng dê lơm mờ gam drơng broă bơtàu tơnguh bè lòt nhơl”.

 Bơdìh mờ tơrlung dà lŭ, ƀòn Phú Hạnh gam gơ hòi gơ jà tài bơh ală gùng lŭ yau lòt jat ală sèng tờm duối dờng yau gĭt nđờ rơhiang sơnam lơh geh ală gùng lòt mìng dùl lơm tềl lời wơl jat tŭ tơngai dê. Bal mờ hơ̆ là ală pơng gàr geh rơndăp mờ lŭ geh bơka mờ ală bơkào uă dà hàng niam, bơkào sống đời, xương rồng... ală bơta tờm do gơ dờp mờ trồ tơngai ro kơnrañ. Rê mờ Phú Hạnh, uă cau bơh ngoh rơngăc tus ngoh rơngăc tŭ sền mờ mat tơn ală hìu geh rơndăp lơh mờ lŭ, ală wàng ròng phan poan jơng geh lơh bơh lŭ lơm mờ jơh bal ală ƀồc lŭ. Jơh ală bơta tàm bơrlŭ bal gơ gơs ù tiah bơh ƀòn phan lời wơl lŭ dê.

 Tàm ƀòn Phú Hạnh geh dùl nơm gùng lŭ lòt jat ală sèng tờm duối dờng sơnam yau ngan gơ lam tus dòr bơnơm lơyah geh hòi là dòr Cổ Thạch. Bơh dòr do wèt mat lik sền đah dà lềng gơtùi sền gŏ jơh ƀồt Hòn Yến, pòt Xuân Đài mờ ƀlàng bràs dòr Cổ Thạch tàm măt sền lơm. Năc lòt nhơl tus tàm do neh geh ai he in ală sền gĭt ờ gơtùi hŭi ngan. Kung bè uă năc lòt nhơl dơ̆ sơn rờp tus mờ ƀòn lŭ Phú Hạnh mờ guh tàm dòr Cổ Thạch, bi Nguyễn Chí Tường, năc lòt nhơl tus bơh càr Đồng Nai, kờñ ngan: "Dòr Cổ Thạch niam ngan, yau ngan bè câu Âu, oh sền gơ kờñ mờ ală sèng lŭ geh cau rơndăp gơ gơs tơl cờn lơh oh gŏ gơ kờñ ngan, oh gŏ tus tàm do là di pal ngan”.

Lòt gan gĭt nđờ bơta gơguh gơmù mìu tơngai dê, ală broă lơh bơt bơtàu lŭ tàm ƀòn Phú Hạnh kung gam kis sùm mờ tŭ tơngai, lơh geh bơta is rơmis ai ƀòn in. Ồng Nguyễn Lâu, ơm tàm thôn Phú Hạnh, sàh Tuy An Đông, càr Dăk Lăk pơn yờ să ngan bè phan lời wơl lŭ kung gam lời wơl tàm ƀòn he dê mờ tŭ do ồng gam drơng năc lòt nhơl tus sền tiah do:"Năc tus tàm do sùm hòi añ lam lòt guh tàm dòr Cổ Thạch, khi lùp añ lŭ do là bè lơi, den añ kung yal do là lŭ yau, lài do cau rơndăp ờ geh sơmang mờ kung gam kră ngan bè do. Bơh tŭ hơ̆ tus tŭ do kung gam bè ờs sơl”.

 Uă ngan tiah tàm ƀòn Phú Hạnh tŭ do gam lời wơl ală broă lơh bơt bơtàu lŭ gơ jat bal mờ rài kis làng bol dê. Do ờ mìng là dùl anih ơn prap phan kwơ lŭ yau geh is mờ ală phan lời wơl gĭt nđờ rơhiang sơnam lơm mờ gam là rùp hin geh is krơi ngan, niam ngan dong năc lòt nhơl in tàm tơrbŏ bal mờ kah yau mờ bơta hàng niam bè ờs bơh dùl ù tiah- hơ̆ là ù tiah bơh ală phan lời wơl dê.