Lơh jat broă lơh bơt bơtàu ƀòn lơgar pa,  Đảng ƀộ sàh Tà Nung sền gĭt do là kơnòl broă cíñ trị kwơ màng, là bơta pràn chồl bơtàu tơnguh lơh sa- mpồl bơtiàn. Tàm hơ̆, broă lơh bơto bơtê cíñ trị bồ tơngoh geh lam lơh dồ ròt bal, lơh geh bơta ring bal tàm bơta gĭt wă mờ broă lơh bơh kwang bàng, đảng viên mờ ală rơnàng làng bol in lơh jat ală broă jàu ƀòn lơgar pa.

Bơdìh hơ̆, sàh Tà Nung neh hòi jà tă pơgồp bal uă ngan rlau jơh ală priă jền nàng bơcri priă bơtàu tơnguh phan bơna bơt bơtàu. Tus tŭ do, ală gùng lòt ƀòn lơgar geh lơh niam, jơh ală gùng lòt thôn, ƀòn neh lơh kơ̆ mờ bê tông, dong broă lòt rê mờ jun pơndiang phan bơna ƀuơn ngan. Ală broă lơh bơtơ̆t rbòng dà geh lơh kơ̆ kơnhăp, gàr niam broă tuh dà, pơgồp bơnah tơnguh uă cồng nha lơh geh bơh phan tam dê. Mờ hìu bơsram, hìu lơh sơnơm, hìu niam chài kung geh bơcri priă lơh bơt bơtàu, lơh geh jơnau kờñ pơrjum, bơsram mờ sền gàr pràn kơl dang să jan làng bol in.

Tàm gah lơh sa, sàh pơn jờng làng bol tam gơl rơndăp tăp sèng phan tam, phan ròng jat gùng dà lơh gơlik phan bơna, ngui bơta chài măi mok pa tàm broă lơh sa. Nam 2024, priă lơh geh kờp bal tơl nă cau bơh sàh dê lơh geh 60 tơlak đong. Is ồn, broă lơh suơn sre ngui măi mok pa pơgồp bal mờ lòt nhơl mpồl bơtiàn neh cèng wơl cồng nha lơh sa, lơh geh broă lơh kơ̆ kơl jăp ai uă cau lơh broă ƀòn lơgar dê.

Drờm bal mờ bơtàu tơnguh lơh sa, sàh kung sền gròi sền gàr mờ ngui niam bơhiàn niam chài niam ngan bơh jơi bơtiàn dê. Uă broă lơh niam chài, đơs crih tam ya geh bơyai lơh sùm, lơh geh tiah lơh broă niam ai làng bol in. Ală srơh “jơh gùt làng bol tam klăc bal bơt bơtàu rài kis niam chài”, “Cau lơh sa kă bro jak”, “5 ờ, 3 sàng goh, 5 ờ 3 geh” geh lam lơh jrô ơnàng làm uă, pơgồp bơnah bơt bơtàu rài kis jak chài, pa ngan.

Ală broă lơh gàr tơl niam rài kis mpồl bơtiàn lơh geh cồng nha, gàr niam tơl nă làng bol ndrờm geh gĭt mờ ală drơng broă gah lơh sơnơm, bơto bơtê mờ dong kờl broă lơh sa. Tŭ do sàh Tà Nung ờ gam hìu bơnhă rƀah tai. Khà làng bol blơi Sră kham sơm kòp ờ sa priă lơh geh 97%. Jơh ală kơnòm dềt tàm sơnam bơsram ndrờm geh lòt bơsram, cồng nha bơto bơtê sùm geh bơtàu tơnguh...

Jat ồng Kră Jăn Ha Diệp, Phó Ƀí thư Đảng ủy sàh Tà Nung yal, ală cồng nha lơh geh là cơng tàng ai bơta lơh ngan sùm bơh jơh ală anih lơh broă cíñ trị mờ làng bol dê. Nàng pơn jat tai gàr niam mờ lơh jat ală cồng nha lơh geh tàm bơt bơtàu ƀòn lơgar pa, sàh tơnguh uă gơnoar, kơnòl bơh kấp ủy, gơnoar atbồ, mặt trận mờ ală mpồl lơh broă cíñ trị- mpồl bơtiàn, is ồn là gơnoar bơh làng bol dê. Tơl gùng dà broă lơh pal geh mblàng yal jrô ơnàng làm uă, lơh geh bơta ring bal uă tàm làng bol.

Bal mờ lơh pràn bơtàu tơnguh lơh sa suơn sre jat gùng dà kơ̆ kơl jăp jŏ jòng, sàh sền gròi rlau tai broă gơ hòi gơ jà mpồl lơh sa kă bro mut bơcri priă. Tà Nung kung sơlơ tơnguh hòi jà ală priă jền nàng bơcri priă lơh sir phan bơna bơt bơtàu, sền gròi sền gàr tiah ơm kis, bơt bơtàu ù tiah ƀòn lơgar àng- tơlir- sàng goh- niam.

Mờ bơta tàm sơm bat tê bal bơh jơh ală anih lơh broă cíñ trị mờ làng bol, sàh Tà Nung gam hời rơ hời lơh sir jơnau kờñ lơh sir broă lơh ƀòn lơgar pa tơnguh uă mờ ƀòn lơgar pa lam lài. Jơnau kờñ uă ngan rlau jơh là tơnguh uă bơta niam rài kis ai làng bol in, gàr niam bơtàu tơnguh kơ̆ kơl jăp jŏ jòng.