Gơwèt mờ oh Nông Trà Vy, kơnòm bơsram ơdŭ 6A2 Hìu bơsram ơm sa bĭc tơn 2 kấp kấp 1 mờ kấp 2 Ea Rốk, geh ơm wơl tàm hìu bơsram nàng bơsram sră, ơm kis tàm hìu bơsram là bơta chờ hờp dờng.

“Oh gŏ ơm bơsam tàm hìu bơsram ơm sa bĭc tơn chờ hờp ngan, hìu bơsram dờng rơng đàis, cau pơgru sền gròi kơnòm bơsram kờñ gơboh bol oh ngan”.

 Hìu bơsram pa dờng niam, tiah ơm kis sàng goh niam, geh tơl ală bơta dong ală oh in iang nùs ơm sào sa, geh tai tơngai bơsram sră mờ nhơl chờ bal mờ gơ̆p bơyô. Oh Trần Hà Thiên, kơnòm bơsram ơdŭ 7A2, pà gĭt:

“Kòn gơ lơh gŏ chờ hờp kờñ ngan tŭ geh mut bơsram tàm hìu bơsram ơm sa bĭc tơn dờng niam, niam rơng đàih, gơ̆p bơyô niam, chờ hờp, cau pơgru rcang tơl dơ̆ sào sa mờ sền gròi tus kơnòm bơsram bol oh”.

Bơta chờ hờp hơ̆ sơlơ geh kwơ tŭ hìu bơsram là broă lơh bơt bơtàu is ồn bơh Bộ Ling klàng dê lơh pà làng bol sàh Ea Rốk in- ù tiah sàh tiah 3 gam uă kal ke. Broă lơh tơngŏ bơta sền gròi, lòt bal mờ Bộ Ling klàng mờ gơnoar atbồ tiah do dê tàm broă lơh bơto bơtê, lơh geh ală bơta bơsram sră, tiah ơm kis niam rlau ai ală oh tàm ù tiah do in. Sơnđờm mut lơh nhai 3 nam 2026, mìng tơnơ̆ rlau 6 nhai mut lơh, hìu bơsram neh ai mut ngui di dơ̆ sơnđờm mut nam bơsram pa nhai 9 nam 2026, gờñ dùl nam bơsram pơn drờm mờ broă rơndăp lơh bơh sơn rờp dê.

Ùr pơgru Lương Thị Hoa, cau pơgru hìu bơsram pà gĭt, tiah ơm kis ơm sa bĭc tơn tàm hìu bơsram ai tơlik jơnau sồr pa gơwèt mờ mpồl cau pơgru, ờ mìng tàm broă bơto bơtê lơm mờ jơh bal broă atbồ, sền gàr kơnòm bơsram, ngan là ală oh dơ̆ sơn rờp ơm ngài hìu bơnhă.

“Atbồ mờ sền gàr ală kơnòm bơsram tàm uă sơnam krơi is, is ồn là ală kơnòm bơsram kấp 1, tŭ pa ơm ngài hìu bơnhă tus ơm tàm hìu bơsram ơm sa bĭc tơn, uă oh gam kwi kwơ mờ kah hìu bơnhă. Den tàng bè hơ̆, atbồ kơnòm bơsram ờ mìng lơh jat kơnòl broă atbồ lơh jat jơnau sồr lơm, mờ gam pal sền gròi, rềp mềr, sền gàr mờ pơndờm pơnđiang, sùm ơm bal, jat sền pràn kơl dang să jan, nùs nhơm bơh ală oh dê”.

Bơta sền gròi hơ̆ gam geh tàm tơl dơ̆ sào sa pah ngai bơh ală kơnòm bơsram dê. Bi Đinh Thị Thoả, cau lơh broă trŭ gơm phan sa hìu bơsram, pà gĭt, sơnđờm broă lơh bơh 4 giơ nggùl drim mờ sùm jơh broă tàm tŭ 7 giơ mang. Bơh broă rcang phan ngui sa, rào goh phan, trŭ gơm tus tam pà bơnah phan sa, pơs wàs hìu bềp, broă lơh tàm pơn jat sùm jơh ngai.

“Bol añ sơnđờm lơh broă bơh ngai 13/10. Mpồl cau trŭ gơm phan sa tŭ do kung kal ke ngan sơl, kung pal kơnờm bơta dong kờl bơh ală cau pơgru tai. Bol añ kung lơh ngan jơh bơta pràn he dê, nàng lơh sir niam ngan kơnòl broă bơh he dê”.

Nàng bơyai lơh broă lơh ơm sa klo ngai, ơm sa bĭc tơn tàm hìu bơsram tàm ală bơta broă lơh bơt bơtàu ờ hềt ai mut ngui gờñ rlau mờ broă rơndăp lơh, hìu bơsram neh rcang ală broă lơh, pơgồp bal mờ gơnoar atbồ mờ ală mpồl lơh broă tàm tiah do dê.

Ồng Võ Viết Khoa, Lam bồ Hìu bơsram ơm sa bĭc tơn 2 kấp kấp 1 mờ kấp 2 Ea Rốk, pà gĭt, tơnơ̆ tŭ phan bơna bơt bơtàu geh mpồl lơh broă mut lơh broă tàm jàu, hìu bơsram mhar rơndăp tăp sèng ală bơta kờñ pal geh nàng bơyai lơh ală broă lơh. Ngai 13/10, hìu bơsram bơyai lơh sa klo ngai ai jơh 515 nă kơnòm bơsram in, di tŭ dong kờl mè bèp in tàm ală bơta ờ hềt bơyai lơh geh ơm sa bĭc tơn tàm hìu bơsram. Tus ngai 30/10, hìu bơsram ngan ngồn lam ơm sa bĭc tơn tàm hìu bơsram ai 337 nă kơnòm bơsram in.

 “Hìu bơsram tă pơgồp jơnau đơs mờ Đảng ủy, gơnoar atbồ ală tiah geh broă lơh dong kờl gơwwèt mờ oh kòn gơwèt cau jơi bơtiàn dồ ết nă cau kung bè hìu bơnhă geh rài kis kal ke rê tàm do bơsram. Bol añ pơgồp bal niam mờ mè bèp kơnòm bơsram, mpồl ala mat mè bèp kơnòm bơsram nàng lơh broă lơh pơgồp bal tŭ ală kơnòm bơsram tus tàm do bơsram sră, lơh bè hơ̆ nàng lơh geh ală bơta ƀuơn ngan rlau jơh nàng oh kòn in geh bơta chài sền gròi is să tờm he dê”.

Bal mờ lơh ngan bơh hìu bơsram dê, gơnoar atbồ tiah do sùm lòt sền, pơgồp bal tă bơsong kal ke tàm tŭ bơyai lơh ơm sa klo ngai, ơm sa bĭc tơn tàm hìu bơsram. Ồng Trịnh Văn Cường, Phó Chủ tịch Anih duh broă Làng bol sàh Ea Rốk, pà gĭt, broă lơh bơt bơtàu hìu bơsram ơm sa bĭc tơn Ea Rốk geh tŭ tơngai mut lơh mhar ngan. Cau dờp lơh broă neh ngan ngồn “sơrlèt trồ tơngai duh, jai pha trồ mìu” nàng lơh sir mìng tơnơ̆ pơgăp 6 nhai, di tŭ ai hìu bơsram mut lơh broă tơn tàm nam bơsram 2026-2027. Tus tŭ do, jơh ală bơta broă lơh bơt bơtàu ndrờm neh lơh sir mờ ai mut ngui.

Ồng Trịnh Văn Cường đơs sùm, do là broă lơh is ồn geh kwơ bơh Bộ Ling klàng dê lơh pà ai làng bol sàh Ea Rốk in. Hìu bơsram ờ mìng bơtơl phan bơna bơt bơtê lơm mờ gam lơh geh ală bơta nàng tiah do in sền gròi niam ngan ai oh kòn in tai, ngan là kơnòm bơsram gơwèt hìu bơnhă rƀah, hìu bơnhă geh dờp bơta dong kờl mpồl bơtiàn mờ ală oh geh rài kis kal ke.

“Sàh đơng lam tơn là Cơldŭ lơh broă Niam chài mpồl bơtiàn mờ Mpồl lam bồ Hìu bơsram sùm lòt sền broă lơh ơm sa klo ngai, ơm sa bĭc tơn, is ồn là broă lơh gàr niam sàng goh phan ngui sa, lĭp sră yal loh làng phan sa pràn să dơ̆ sào sa ai ală sau in. Gàr niam lơh bè lơi dơ̆ sào tơl bơta pràn să mờ ngan là ală sau đơs là dơ̆ sào bơkah ngan, gàr niam bơta pràn să nàng iang nùs bơsram sră”.

Bơh bơta chờ hờp bơh kơnòm bơsram tus bơta tơryang tơryồng bơh cau pơgru, cau trŭ gơm phan sa mờ kơnòl bơh gơnoar atbồ tiah do dê, hìu bơsram ơm sa bĭc tơn bơh Bộ Ling klàng dê lơh pà ai sàh tiah 3 Ea Rốk in gam gơ gơs tiah kơldìng ai kơnòm dềt tiah kal ke. Bơta kwơ bơh broă lơh bơt bơtàu dê ờ mìng tàm phan bơna bơt bơtàu dờng rơng đàis niam lơm mờ gam tàm tŭ tơngai bơsram sră, ơm kis mờ bơtàu tơnguh niam, ngan là mờ ală kơnòm bơsram geh rài kis kal ke.