Ală ngai lồi nam, Tiah sền gàr brê bơnơm Kon Ka Kinh wă mpồl đơng lam càr Gia Lai tus sền tơn ù tiah tàm tiah do dê, lòt sền bơta gam geh brê tŭ do dê, chi che tàm brê mờ pơlam gùng dà bơtàu tơnguh lòt nhơl ƀòn brê bơnơm. Tơnơ̆ mờr 1 jiơ lòt tàm brê, sền gŏ tơn mờ mat bơta li la phan brê mờ bơta gam bè ờs ờ hoan geh ngan, Củ tịc Anih duh broă Làng bol càr Gia Lai ồng Phạm Anh Tuấn prơ uă ngan tềng đăp tiah brê bơnơm gam bè yau ngan do:“Gơtùi đơs là, Brê Dà lơgar Kon Ka Kinh là phan kwơ brê bơnơm pà gời ờ mìng ai càr Gia Lai in lơm, mờ gam ai lơgar Việt Nam mờ dunia in tai. Ngai do, mpồl lơh broă geh tơl làm ală sờh, gah broă mờ mpồl lơh broă lòt nhơl lòt sền bal nàng jòi broă bơsong prap gàr, mơkung lơh jat niam bơta kwơ lòt nhơl, mơkung jà gơ̆p bơyô ală lơgar tus sền gĭt tiah brê bơnơm niam bơnĕ ngan do”.

Ồng Ngô Văn Thắng- Kwang atbồ Brê Dà lơgar Kon Ka Kinh pà gĭt, brê là dùl tàm ală bă brê pơn rơ ngan rlau jơh tàm dòr bơnơm Trường Sơn dê. Mờ gĭt nđờ rơhiang bơta dơm chi dờng, ală mpồl phan brê kwơ mờ uă gơl gùng lòt jơng jòng geh is niam ngan, Kon Ka Kinh geh tơl làm bơta ƀuơn bơta pràn nàng gơ gơs tiah tus brê bơnơm niam ngan bơh càr Gia Lai dê. Tàm tơngai tus, pơlam gùng dà bơh mpồl lơh broă bơtàu tơnguh lòt nhơl ƀòn brê bơnơm, dong lơh geh broă lơh lòt nhơl kơnhăp kơ̆ ai làng bol ală tiah mờ pơgồp bơnah sền gàr brê kơnhăp jŏ:“Tàm tơngai tus, bol añ rơ̆p lơh pràn atbồ, sền gàr nàng gàr niam ù tiah niam bơnĕ, bơta kwơ brê drơng broă lơh prap gàr; mơkung sơlơ tơnguh tai pơgồp bal mờ ală mpồl lơh broă lòt nhơl bơt bơtàu bàr pe phan bơna, drơng broă mờ phan bơna drơng broă năc lòt nhơl; lơh tơrlòng lài bàr pe dơ̆ lòt nhơl- gơl gùng cèng bơta bơto bơtê- kơlôi sơnơng; yal yơngĭt uă rùp hin brê tus ală viện, hìu bơsram. Bol añ kung rơ̆p lơh sră nggal, rơndăp broă lơh nàng dan bơcri priă lơh sir phan bơna bơt bơtàu, drơng niam ngan rlau jơh ai năc lòt nhơl in”.

Tàm dùl ƀòn brê bonơm lòt nhơl sền gĭt ù tiah hàng niam gơwèt mờ Kon Ka Kinh là ală sre kai ntùng Đăk Tơ Pê (sàh Kdang), ờ ngài ir mờ tiah drà Pleiku. Tàm trồ tơngai gơ sòl tàm trồ mho, jơh ală ù tiah bè àng rlau tài bơh ală dà rơmĭt- tơlir- bơrkuh tàm bơrlŭ bal, lơh geh dùl rùp wăc sềr tiah kơh bơnơm tàm rơndăp rơndồl. Bơta niam hơ̆ lơh tiah do hời rơ hời gơ gơs tiah ơm rlô, check-in, cùp rùp bơh uă năc lòt nhơl dê. Sền gŏ loh làng bơta ƀuơn bơta pràn, Đảng ƀộ, gơnoar atbồ sàh Kdang, càr Gia Lai gam hời rơ hời pơlam gùng dà bơtàu tơnguh ală dơ̆ lòt nhơl mpồl bơtiàn, lòt nhơl sền gĭt pơgồp bal mờ ù tiah brê bơnơm geh is niam bơnĕ ngan. Mò Lê Thị Huệ, Ƀí thư Đảng ủy, Củ tịc Mpồl duh broă Làng bol sàh Kdang pà gĭt:“Sàh gam lòt sền mờ rơ̆p hòi jà bơcri priă lơh tàm tơngai tus. Sàh kơ̆p kờñ nam 2035, tiah lòt nhơl do rơ̆p geh mut ngui, là tiah tus bơh năc lòt nhơl rềp ngài dê”.

Tŭ do, tàm tiah kơh bơnơm đah mat tơngai mut càr Gia Lai geh uă bơta ƀuơn bơta pràn dờng ai bơtàu tơnguh lòt nhơl ƀòn brê bơnơm mờ ală ù tiah hàng niam krơi is ngan, cèng bềng bơhiàn niam chài bơh brê bơnơm dờng ơning ơnàng dê. Biển Hồ – yô mat Pleiku, sùm gàr là tiah is ồn tàm nùs nhơm làng bol mờ năc lòt nhơl dê. Mat dà ring niam sòl gŏ mhwăl trồ, ală sèng tờm nho dờng jŏ nam gĭt nđờ rơhiang nam neh lơh geh dùl ù tiah dờng ơning ơnàng mơkung lơbơn niam ngan sơl. Pơgăp mờ hơ̆ ờ ngài, bơnơm ồs Chư Đang Ya là tiah tus gơ kờñ ngan bơh mpồl rơnàng kơnòm să mờ ală cau cùp rùp mờ làng bol dê pah dơ̆ kàl bơkào blàng gơ lì. Bi Nguyễn Việt Cường, cau ờs cùp rùp tus bơh Hà Nội, pà gĭt bơta niam ngan tŭ dơ̆ sơn rờp lòt tus ù tiah do: “Ngan ngồn gơ kờñ ngan, niam ngan. Añ kơ̆p kờñ càr rơ̆p bơtàu tơnguh tiah do, nàng uă cau in geh tus sền rlau tai”.

Nàng lơh bơta pràn ai bơtàu tơnguh in, ală nam pa do, Gia Lai neh bơcri priă lơh sir gùng lòt rê tus ală tiah prap gàr mờ ù tiah hàng niam tờm; rơndăp tăp sèng wơl ală drơng broă lơh is tàm ală tiah “check-in”; mơkung tơnguh uă cồng nha cau pơlam yal tơngĭt jơnau mpồl bơtiàn mờ lơh ngan ngồn broă lơh wă năc tàm ală tiah lòt nhơl ƀòn brê bơnơm. Kơnờm pờ ơnàng broă lơh gơ hòi gơ jà, Gia Lai neh geh mat loh làng rlau tai tàm ală gơl gùng lòt nhơl ală tiah Tây Nguyên mờ tiah jat kềng gah dà lềng tàm gùl lơgar, lơh geh ală phan bơna li la uă bơh gùng lòt jơng, sền gĭt brê, lòt sền broă lơh sa suơn sre tus tiah lòt nhơl tơnau dà- bơnơm- niam chài. Nam 2025, càr neh wă rlau gĭt nđờ jơ̆t tơlak dơ̆ năc lòt nhơl, dùl bơnah ờ dồ ết tàm ală broă lơh hơ̆ là bơh broă lơh lòt nhơl ƀòn brê bơnơm tàm tiah đah mat tơngai mut dê. Mò Đỗ Thị Diệu Hạnh – Kwang lam bồ Sờh Niam chài, Tàp pràn să jan mờ Lòt nhơl càr Gia Lai pà gĭt, tàm tơngai bơh nam 2026-2030, lòt nhơl geh sền gĭt là dùl tàm ală broă lơh tờm lơh sa bơh càr dê: “Tơrgùm sền gàr, ngui niam ală bơta kwơ niam chài, ù tiah hàng niam, kah yau. Tơrgùm lơh broă lơh yal tơngĭt uă mat kă bro phan bơh lòt nhơl dê, tơrgùm tàm tơrbŏ tiah đah mat tơngai lik- đah mat tơngai mut, bơtàu tơnguh lòt nhơl dà lềng, lòt nhơl mpồl bơtiàn, lòt nhơl sền gĭt. Dŭt ndơl kung là lơh geh mpồl lơh broă bơtàu tơnguh lòt nhơl, lơh geh ală phan bơna lòt nhơl krơi is ngan tàm rài tơnơ̆ do”.

Bơtàu tơnguh lòt nhơl ƀòn brê bơnơm gam pờ geh ai càr Gia Lai in dùl gùng lòt kơnhăp kơ̆, nàng brê bơnơm in geh sền gàr, bơta kwơ ù tiah geh lơh kah wơl, mơkung lơh geh broă lơh sa jŏ jòng ai làng bol in. Hơ̆ kung là bơnàng jă nàng Gia Lai in bơtàu tơnguh lơh sa ƀòn lơgar jat gùng dà tơlir mờ kơnhăp kơ̆ tàm rài tơnơ̆ do.