Mìng mờ bàr pe bơta tàm điện thoại ngăc ngar, ală ding tuh dà is tàm tiah tam phan 50 lồ plai màk bơh Mpồl Lơh broă bal Xanh Cao Nguyên, sàh Cư M'gar, càr Dăk Lăk dê mut lơh dơ̆ lĕ bal. Dà tuh mờ phơng sih geh tam gơl jat jơnau kờñ dờng pràn bơh phan tam dê ala tài bơh kơnờm tàm mờng chài bè lài do. Ồng Nguyễn Văn Thanh Bình, Kwang lam bồ Mpồl lơh broă bal pà gĭt, măi mok sồ dong Mpồl lơh broă bal atbồ jơh broă lơh lơh sa, bơh sơng ka sền gàr, cih tŭ tơngai tàm pơ àr tam phan tus jòi gĭt tiah tờm lơh gơlik phan bơna dê:

"Broă lơh ngui măi mok sồ neh pơgồp bơnah tơrmù ƀà priă tă cau lơh broă, tơnguh cồng nha atbồ lơh sa mờ gròi sền bơta bơkah niam. Mờ bơta ơnàng tơl suơn tam phan bơh 5 tus 10 lồ, mpồl lơh broă bal ƀuơn ngan tàm broă tam phan, lơh sàng goh phan, prap gàr mờ lơh gơlik jrô. Bơh hơ̆, phan bơna geh tơnguh jơh bal bè khà bal mờ bơta bơkah niam, lơh geh ală jơnau sồr tăc phan mờ lơgar ndai”.

Gùng dà broă lơh tơnguh bơta kwơ gơguh tai bơh ngui jak chài măi mok, tam gơl sồ mờ bơtàu tơnguh broă lơh sa suơn sre tàm pơdar gam ngai sơlơ loh làng tàm càr Dăk Lăk. Jat ồng Đặng Bá Đàn, Phó Kwang lam bồ Anih tờm dong kờl pơlam lơh broă sa suơn sre Dà lơgar tiah Tây Nguyên mờ tiah đah Jum tàm gùl lơgar, do là jơnau sồr ờ gơ tùi pleh klàs gơwèt mờ càr geh bơta ơnàng broă lơh sa suơn sre lam lài gùt lơgar tŭ càr Dăk Lăk geh pơgăp 214 rơbô lồ kơphê mờ khà lơh geh mờr 590 rơbô lồ pah nam, bal mờ mờr 79 rơbô lồ tờm chi sa plai geh kwơ uă. Ồng Đặng Bá Đàn pà gĭt, tŭ do bơnàng jă broă lơh dong kờl ai tam gơl sồ tàm broă lơh sa suơn sre neh tơl làm đau sơl, broă kwơ màng là ai ală cồng nha kơlôi sơnơng mờ broă lơh gơ dờp mờ làng bol dùl bă mhar rlau, ƀuơn wă rlau mờ ƀuơn rlau.

 “Bol añ pal tàm tơrbŏ bal geh jơh ală bơta nàng lơh geh bơta pràn mờ mhar rlau nàng ai tam gơl sồ bơh cồng nha kơlôi sơnơng tus ală broă lơh tus mờ làng bol dùl bă niam ngan rlau jơh mờ ƀuơn ngan nàng làng bol in gơtùi mut ngui. Bol he sih phơng ai tờm chi lơi hơ̆, kờñ gĭt phan bơna bè lơi hơ̆ den mìng kờñ ngui măi mok sồ jòi gĭt tiah tờm lơh gơlik gàr niam ală jơnau yal di ngan rlau jơh gơwèt mờ măi mok pa tŭ do mờ Việt Nam mờ dunia gam ngui”.

Jat ồng Nguyễn Thanh Hiền, Phó Lam bồ Mpồl atbồ Tiah broă lơh sa suơn sre ngui măi mok pa ƀòn dờng Hồ Chí Minh, bơdìh mờ bơta ƀuơn bè ù tiah, nhơm trồ tiah nàng bơtàu tơnguh broă lơh sa suơn sre geh bơta bơkah niam uă, broă lơh dờng, tàm tơngai lam lơh Jơnau lơh nền tàm pơrjum sồ 57 bơh Bộ Chính trị dê bè bơtàu tơnguh jak chài, măi mok, tam gơl pa bơceh lơh mờ tam gơl sồ Dà lơgar, bal mờ Jơnau lơh nền tàm pơrjum sồ 68 bè bơtàu tơnguh lơh sa làng bol dê lơh is, Dăk Lăk geh tai ală bơta nàng lơh pràn ngui ală măi mok pa ngan bè lơh is tàm broă lơh broă, ngui bồ tơngoh jak kòn bơnus lơh gơlik (Ai), internet ală phan (IoT), ală jơnau yal tơngĭt tàm broă lơh sa suơn sre.

"Dăk Lăk pal lơh pràn ngui jak chài măi mok tàm broă lơh, tam gơl bơh kơlôi sơnơng lơh broă sa suơn sre tus lơh sa broă lơh sa suơn sre. Ală gah ngan là Sờh Jak chài mờ Măi mok, Sờh Broă lơh sa suơn sre mờ Tiah ơm kis sơlơ tơnguh tai broă lơh kơlôi sơnơng, ngui tàm broă lơh sa, tơnguh bơta kwơ broă lơh sa suơn sre kung bè tơnguh broă lơh sa phan bơna dờng gơtùi tus mờ ală drà tăc phan mờ lơgar ndai bè nùs nhơm ală jơnau lơh nền tàm pơrjum bơh Dà lơgar dê”.

Mơya, nàng lơh geh broă lơh sa suơn sre ngui măi mok pa ngan ngồn, broă ngui măi mok tàm tơl broă lơh is rah rài là ờ hềt tơl. Bơta kwơ màng là bơt bơtàu ală tiah lơh sa tơrgùm bal, phan bơna bơt bơtàu ring bal mờ ù tiah tơl dờng nàng gơ hòi gơ jà mpồl lơh sa kă bro in bơcri priă lơh gơlik jrô.

Mờ mờr 827 rơbô lồ ù lơh sa suơn sre bal mờ mpồl phan tam li la uă, càr Dăk Lăk geh uă ală bơta nàng bơtàu tơnguh ală bơta kwơ phan lơh geh bơh broă lơh sa suơn sre dờng. Mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà gĭt, Jơnau lơh nền tàm pơrjum dờng Đảng bộ càr tơngai lơh broă bơh nam 2025-2030 sền gĭt bơtàu tơnguh broă lơh sa suơn sre ngui măi mok pa, broă lơh sa suơn sre tơlir mờ lơh sa tàm pơ dar là gùng lòt kwơ màng. Càr gam tơrgùm rơndăp ù tiah ală tiah lơh sa ngui măi mok pa pơgồp bal mờ bơta pràn tơl tiah dê, mơkung rcang phan bơna mờ ù niam nàng gơ hòi gơ jà ală cau bơcri priă dờng.

"Bol añ ai lơh lài gơ hòi gơ jà bơcri priă, lơh broă bal bè phan bơna bơt bơtàu tàm ală anih tăc bro phan, ală bơta pràn nàng dong kờl bè priă bơcri, dong kờl măi mok lơh sàng goh phan mờ ơn prap, kung bè tàm tơrbŏ bal ală bơta kwơ ală phan bơna nàng phan bơna rơ̆p lơh geh jơnau sồr drà kă bro dê. Tŭ lơh geh dùl anih ring bal den jơnau kờñ gơguh tai 2 nơm khà là geh ngan, mơkung lơh geh bơta gơn kơnờm bơtàu tơnguh lơh sa broă lơh sa suơn sre tàm tơngai tus”.

Bơh broă lơh ngui măi mok sồ tàm ƀlàng sre tus pơlam gùng dà lơh geh ală tiah lơh sa dờng mờ ală bơta kwơ lơh sir, Dăk Lăk gam hời rơ hời tam gơl bơh gơguh tai jat bơta jrô tus bơtàu tơnguh jat bơta jrô. Do geh sền là bơnàng jă nàng càr in tơnguh uă bơta kwơ phan lơh geh bơh broă lơh sa suơn sre, tơnguh bơta pràn tàm pơrlòng mờ wèt tus gơ gơs anih tờm broă lơh sa suơn sre ngui măi mok pa tàm tiah Tây Nguyên.