Rơndeh par pơndiang năc bồ nhai 3 mù tàm ƀlàng rơndeh par Buôn Ma Thuột pơndiang bal ală năc bơh ƀòn dờng Hồ Chí Minh. Tàm ală cau do, geh bal ală cau kis tàm lơgar ndai kung sùm rê còp Buôn Ma Thuột, tiah rềp mềl mờ he dê tàm rài gam kơnòm să bè  mò Thu Mai. Mò Mai đơs, pa lik bơh ƀlàng rơndeh par, tus gùng tàm tìp Đam San-Nguyễn Lương Bằng-Võ Nguyên giáp, ù tiah sàh Hòa Thắng, mò gơlơh bè neh hŭi jơh gùng rê tềng đap ală tam gơl sơrbăc mhar tàm tiah do dê: “Mìng bàr pe nam, bàr pe nam lài den lòt, gŏ kung ờ di bè tŭ do. Tŭ do wơl rê wơl gŏ sơwing mat tơn, tài bơta tam gơl mhar ir”.

Tàm uă bơta tam gơl bơh Buôn Ma Thuột dê, tam gơl loh làng ngan rlau jơh ngan là tàm tiah Ƀlàng rơndeh par Buôn Ma Thuột. 50 nam lài, bulah tiah do geh mat sơnđan là ƀlàng rơndeh par Hoà Bình, mơya bềng lơm nhơ̆t ja, che lòs lò, ală ƀlàng mền, bal mờ uă broă lơh bơt bơtàu ling klàng, anih cuh phào, là dùl tàm 2 tiah geh bơyai lơh dơ̆ tam lơh cui rơcai ngan rlau jơh tàm ngai 10 nhai 3 nam 1975. Mơya tŭ do, tiah do neh gơ gơs tiah tờm kwơ màng bơh ală gùng lòt tê gùng ù gờl- gùng rơndeh par; bơh ală gơl gùng rơndeh lòt mhar tàm tơrbŏ bal Khánh Hòa- Buôn Ma Thuột, Gùng dờng 27 tơrbŏ bal càr Dăk Lăk mờ Lâm Đồng mờ gùng dờng Võ Nguyên Giáp gơlam song tơn mut tàm anih tờm ƀòn dờng dê. Deh mờ dờng tàm ƀòn dờng Buôn Ma Thuột mơya ơm ngài ƀòn dờng neh uă nam, mò Hoàng Thị Kim Anh kung ngoh rơngăc mờ chờ hờp tềng đăp ală tam gơl uă ngan do dê: “Hơn chờ mờ chờ hờp tài bơh rê tàm do den gŏ Buôn Ma Thuột bơtàu tơnguh pràn ngan. Añ gam ờ đal gĭt tai ală bơta bơh lài do dê tai”.

50 nam neh lòt gan, ờ mìng ală bơta jê sồt bơh rài tàm lơh neh sơm bời lơm mờ Buôn Ma Thuột, bơh dùl ƀòn drà dờng nrah nring mờ mat sơnđan “Muăt jrùm sùm”, mờ mìng rlau 100 rơbô nă cau, tŭ do neh gơ gơs ƀòn dờng kấp 1- tiah tờm kơphe bơh lơgar Việt Nam dê. Sàh Hoà Thắng mờ gùt dar ƀlàng rơndeh par Hoà Bình lài do, bơh jŏ mìng geh rlau 10 hìu bơnhă làng bol ală ƀòn Mường càr Hoà Bình mut lơh ƀòn, den tŭ do neh là dùl tàm ală anih tờm jak chài măi mok lơh broă sa suơn sre, phan brê dờng ngan rlau jơh gùt lơgar, tăc tờm sơntìl mờ ală broă lơh chài tam phan- măi mok- lơh broă sa suơn re- phan brê ai jơh gùt tiah Tây Nguyên in. Ồng Nguyễn Quang Ngọc, làng bol jơi tờm ƀòn Mường càr Hoà Bình deh nam 1960, tàm sàh Hoà Thắng pà gĭt, bơta tam gơl tam ù tiah do dê là bơh gle đơr barah bơrài gơ gơs dờng ơnàng niam pa ngan bè tŭ do: “Lài do, ală ồng pàng ờ geh bè do ờ. Tơnơ̆ do Dà lơgar pa tam gơl ai làng bol in lơh kơphê, tam pà ù ai làng bol in. Hơ̆, tàm Hoà Thắng do là uă hìu tŭ do bơt geh là kơnờm suơn ờng sơntìl. Lơh suơn ờng sơn tìl di. Do nè, cau lơh dùl nam geh priă tơmàn lơm nè”.

Sàh Hoà Thắng neh geh rlau 1 rơbô 200 hìu bơnhă. Tŭ Tây Nguyên geh ală kàl geh tơnhào uă, Hoà Thắng chờ bal bơta chờ hờp tài kơphê, sầu riêng, tiêu giă gơguh uă ngan, làng bol Hoà Thắng sơlơ pas gơs mhar ngan. Ală hìu kuơ̆ geh lơh jat kềng gah nhàr tiah drà Buôn Ma Thuột. Broă tàm tơrbŏ gùng dờng Võ Nguyên Giáp sơlơ lơh ƀòn lơgar do sơlơ pa ngan.

Bơh dùl ƀòn drà dờng rài tam lơh, tơnơ̆ 50 nam Buôn Ma Thuột brồ guh gơ gơs tiah tờm kơphê bơh lơgar Việt Nam dê, dùl anih tờm lơh sa, ngui jak chài tam phan pa gah lơh broă sa suơn sre, phan brê bơh Tây Nguyên dê. 50 nam lài, dơ̆ tam lơh tơngklàs Buôn Ma Thuột là sơnđờm ai kàl nam pa jai pha dờng, den Buôn Ma Thuột niam bơnĕ ngai do là cồng nha 50 nam ring lơngai, lơngăp lơngai is mờ tơrgùm dùl. Bơh do, ƀòn dờng sơnđờm dùl gùng lòt pa, gùng lòt bơh bơtàu tơnguh mờ mut gơrờm bal, gơ gơs tiah tus bơh kơphê dunia dê.