Tàm ƀòn Prum Lâm Thuận, sàh Hàm Thuận Bắc, càr Lâm Đồng, ồng Thông Long geh gĭt tus là dùl nă cau chài uh kèng saranai tiơng pơn rơ ngan. Ờ mìng bè hơ̆ lơm ồng gam mblàng bơto wơl broă do ai uă kơnòm dềt tàm ƀòn in, dong kòn cau Prum sền gàr gùng đơs crih ờs mờng, pơgồp bơnah prap gàr bơhiàn niam chài is jơi bơtiàn dê.

Mò Thông Thị Hạnh, Lam bồ Mpồl lơh broă mặt trận thôn Lâm Thuận, sàh Hàm Thuận Bắc, pà gĭt, ồng Long ờ mìng lơh krơh niam lam lài tàm bơtàu tơnguh lơh sa, bơt bơtàu ƀòn lơgar pa lơm mờ gam jơh nùs tus bal bơt bơtàu Đảng, bơt bơtàu ală anih lơh broă cíñ trị, sền gàr mờ ngui niam ală bơta kwơ niam chài ờs mờng bơh yau bơh mpồl bơtiàn kòn cau Prum dê.

“Lài do hìu bơnhă ồng Thông Long kung kal ke ngan sơl, mơya kơnờm lơh ngan den tàng tŭ do lơh sa hìu bơnhă kung kung bơtàu tơnguh đau sơl. Ồng Long kung sền gàr broă lơh ờs mờng uh kèng saranai, mờ kung bơto wơl ai ală oh kòn kòn sau in uh kèng Saranai nàng drơng tàm dơ̆ lơh chờ tàm ƀòn. Tŭ do ồng geh uă kơnòm bơsram jat bơsram broă uh kèng saranai”.

Tŭ do bulah sơnam neh dờng mơya ồng Thông Long kung gam lời jơh dà kơl hề bơta pràn, jơh nùs jơh tồr ai bơta bơtàu tơnguh mpồl bơtiàn kòn cau Prum tàm tiah do in. Bơdìh mờ broă pơgồp bal dà kơl hề bal mờ Mpồl đơng lam thôn Lâm Thuận, sàh Hàm Thuận Bắc, ồng gam geh pồ lơh kra ƀòn, cau trăng gàr broă bơyai lơh dơ̆ lơh chờ tàm hìu duh khoai Pô Chei tàm do, pơgồp bơnah sền gàr niam chài kòn cau Prum tàm ƀòn in.

 Tàm dơ̆ rlô bơkang, ồng Thông Long sùm pờ ơdŭ bơto uh kèng saranai ai ală ơruh pơnu mờ kơnòm pa tàu in. Săp ntas bơh kèng saranai dê bơh chờm iăt tồn là ƀuơn ngan mơya nàng bơnĕ bơnài bal mờ săp ntas sơnggơr Ghi năng,  paranưng sồr cau uh kèng pal geh bơta chài ngan ngồn, ngan là broă ai nhơm tàm tŭ uh kèng. Den tàng bè hơ̆ mờ ờ gŏ di cau lơi kung gơtùi uh kèng lơm ờ. Ồng Thông Long pà gĭt, bulah khà cau bơsram ờ hềt kờp jơh bồ nao tê mơya ồng kung gam chờ hờp mờ mblàng lời wơl jơh nùs. Tŭ do ală cau neh geh ồng bơto uh kèng saranai neh ala ồng drơng tàm ală dơ̆ lơh chờ ƀòn lơgar tàm do dê.

“Añ kung jat bơsram ồng bơsram uh kèng saranai jŏ ngan rao, kơnờm bơta gĭt wă bơh lài den tàng broă bơsram kung mhar gĭt ngan sơl. Añ uh kèng saranai bơh hơ̆ tus tŭ do, tơnơ̆ do añ mblàng bơto wơl ai rơnàng kơnòm să tàm ƀòn, oh kòn kòn sau tàm hìu bơnhă. Añ kơ̆p kờñ pơgồp bơnah sền gàr niam chài ờs mờng bơh yau bơh kòn cau Prum he dê, ờ gŏ lời gơtìp roh tĕ ờ, mơkung kơ̆p kờñ oh kòn kòn sau tơnơ̆ do tàm pơrdờn mờ lơh ai gơ in di mờ bơhiàn ờs mờng bơh yau bơh mò pàng lài do dê lời wơl, nàng sền gàr niam chài kòn cau Prum ngai sơlơ niam bơnĕ rlau tai”.

Gơwèt mờ kòn cau Prum, săp ntas kèng saranai là đờng nhơm kwơ màng, tam klăc bal cau mờ ală Yàng. Săp ntas kèng hơ̆ dê rơ̆p ờ tŭ lơi roh tĕ tài bơh neh geh ală cau kòn, ală cau bơsram bơh ồng dê tàm pơr dờn wơl mờ sền gàr. Tŭ săp stas kèng saranai mpông bal mờ sơnggơr Ghi năng, paranưng mpông tàm gùl ƀòn kòn cau Prum dê ngan là săp mpông bơh kir sơnrai jơi bơtiàn, nting tơngkah tơl nă cau in bè kơnòl sền gàr niam chài bơhiàn ờs mờng bơh gĭt nđờ rài, gàr săp ntas kèng saranai mờ kơ̆p kờñ bè dùl rài kis lơngăp lơngai mờ gơ boh gơbài.