Ală gùng lòt bê tông tơrbŏ jòng gan thôn Gia Bắc 1, sàh Bảo Thuận. Bàr gah gùng, hìu đam ngai sơlơ dờng niam; ƀlàng jơng, suơn chi, pơng gàr geh lơh niam sàng goh. Tàm ală gơl gùng lài do lòt rê gam kal ke, tŭ do rơndeh pơn diang phan lơh geh bơh broă lơh sa suơn sre mut tơn tàm tiah làng bol ơm kis, kơnòm dềt lòt bơsram tàm hìu bơsram ƀuơn ƀoài ngan. Gơwèt mờ mò Ka Hôm, ơm tàm thôn Gia Bắc 1, gùng lòt ƀuơn ngan kung ndrờm bal mờ broă lơh sa, bơsram sră mờ rài kis bơh làng bol dê ờ hoan bòl glar rlau:  

“Gùng lòt rê ƀuơn ngan, làng bol jun pơndiang phan bơna ƀuơn ngan rlau, kơnòm bơsram lòt bơsram kung ƀuơn ngan sơl, lơh sa geh ală bơta bơtàu tơnguh. Sàh sền gròi, dong kờl làng bol in uă ngan, ngan là làng bol jơi bơtiàn dồ ết nă cau. Geh gùng lòt rê pa lòt rê ƀuơn ngan den hơ̆ sồng làng bol chờ hờp ngan, ưn ngài Đảng, Dà lơgar neh sền gròi bơcri priă lơh gùng lòt rê ai làng bol in”.

Bơta tam gơl tàm Gia Bắc 1 kung là dùl broă lơh tàm rùp wăc sềr ƀòn lơgar pa bơh sàh Bảo Thuận dê. Sàh geh 31 thôn gơwèt tiah làng bol jơi bơtiàn dồ ết nă cau, uă ngan là kòn cau K’Ho, geh tus mờr nggùl khà kờp làng bol sàh dê. Mìng is tàm nam pa do, bal mờ bơta pràn Dà lơgar dê, làng bol neh pà is rlau 2 rơbô thơk vuông ù, pơgăp 1 tơmàn 200 tơlak đong mờ uă ngai lơh broă; rlau 1 tơmàn 500 tơlak đong bơt, lơh niam wơl hìu ơm ai hìu bơnhă rƀah, hìu bơnhă pa lik klàs rƀah in. Tus tŭ do, 17 tàm 31 tiah làng bol ơm kis lơh geh tiah làng bol ơm kis lam lài, geh tus 55%; 21 tàm 31 tiah làng bol ơm kis lơh geh tiah làng bol ơm kis pơn rơ jak, geh tus 68%.

Bơh ngkời ală khà sồ do là broă lơh hòi jà nàng làng bol in wă, ring bal mờ gơ gơs cau tờm bơh broă lơh bơt bơtàu ƀòn lơgar pa dê. Tàm Gia Bắc 1, kra ƀòn ồng K’Đôi, lam bồ thôn, là dùl tàm ală cau tus tơn lơh broă hơ̆. Wă bơhiàn yau ờs mờng mờ rài kis tơl hìu bơnhă dê, ồng kơ̆ nùs mblàng yal nàng làng bol in wă là bơt bơtàu ƀòn lơgar pa ờ gŏ di là broă lơh is bơh Dà lơgar dê lơm ờ. Làng bol tă pơgồp bal ƀà, mờ dờp lèng tơn bơh ală broă lơh bơt bơtàu mờ bơta tam gơl bơh ƀòn lơgar dê.

“Bơh tŭ lam lơh broă lơh bơt bơtàu ƀòn lơgar pa, geh Dà lơgar sền gròi bơcri priă lơh mờ gơnoar atbồ ƀòn lơgar lam lơh ală broă rơndăp lơh geh ngan, bol añ tơrgùm mblàng yal, hòi jà làng bol tus bal. Làng bol lơh jat jơh nùs ngan, tă pơgồp ngai lơh broă, pà is ù pờ gùng, bal mờ gơ̆p lơh bal lơh sa den tàng muh mat ƀòn lơgar tam gơl uă ngan. Is ồn, làng bol geh gĭt, geh cribơyai, geh lòt sền, geh dờp lèng den tàng làng bol dùl nùs ring  bal”.

Lơh geh bơta ring bal nàng mpồl bơtiàn in lơh bal, gơnoar bơh cau geh bơngă pin dờn dê gam tơngŏ tàm broă hòi jà tam gơl bồ tơngoh kơlôi sơnơng, broă lơh nàng tơl hìu bơnhă in brồ guh. Tàm thôn B’Đơr, sàh Bảo Lâm 2, Lam bồ thôn ồng K’Juyên sùm tus tơl tàm hìu bơnhă nàng mblàng yal, hòi jà. Deh mờ dờng tàm gùl làng bol ồng wă geh ală gùng dà broă lơh ờ mìng đơs dùl dơ̆ tàm pơrjum lơm mờ pal kơ̆ nùs mblàng yal, hòi jà làng bol mờ jơnau đơs bơh làng bol he dê.

Bơh sền gàr bơta tam klăc bal, pơs wàs gùng ƀòn tus lơh broă sa, tơrmù rƀah, ồng K’Juyên ndrờm hòi jà làng bol dong kờl bal, is ồn sền gròi ală hìu bơnhă gam kal ke. Tài bơh gơwèt mờ ồng, dùl tiah làng bol ơm kis bơtàu tơnguh ờ mìng kờñ geh gùng lòt niam, ù tiah sàng goh lơm mờ làng bol pal geh broă lơh sa, rài kis ngai sơlơ bơtàu tơnguh rlau.

“Mờ gơnoar là lam bồ thôn, añ sùm geh kơnòl hòi jà làng bol rềp bal, tam klăc bal, dong kờl bal mờ gơ̆p nàng bơt bơtàu ƀòn lơgar àng- tơlir- sàng goh- niam. Gơwèt mờ ală hìu bơnhă gam kal ke, bol añ sùm mblàng yal, hòi jà làng bol tơrgùm lơh sa, hời rơ hời brồ guh”.

Tơngai bơh nam 2026-2030, càr Lâm Đồng lơh ngan geh 42 sàh lơh sir broă lơh ƀòn lơgar pa, 2 sàh lơh sir broă lơh ƀòn lơgar pa tơngai pa; tơrmù hìu bơnhă rƀah tiah làng bol jơi bơtiàn dồ ết nă cau, tiah kơh bơnơm bơh 2 tus 3% pah nam, ai 50% khà sàh, khà thôn lik bơh mpồl kal ke uă ngan. Ală broă jàu pa ai tơlik jơnau sồr uă rlau bè jak chài măi mok, tam gơl pa bơceh lơh, tam gơl sồ.

Tàm sàh Tà Năng, mò Ka Să K’Hiêr, Bí thư Ci bộ thôn Ma Bó, gam lam lài tàm ală broă lơh. Bơh cồng nha tam kơphê, plai màk, ròng phan, mò hòi jà làng bol tam gơl pa broă lơh; mơkung bơto pơlam tơn ală hìu bơnhă ngui VNeID, drơng broă  internet, gĭt mờ jơnau yal, broă lơh tàm internet.

“Mờ gơnoar là Bí thư Ci bộ thôn, añ sùm sền gròi mblàng yal, hòi jà làng bol lơh jat niam ală gùng dà broă lơh bơh Đảng, Dà lơgar, ngan là gĭt mờ jơnau yal tàm internet. Dùl mpồl làng bol gam ờ hoan gĭt mờ bơta chài măi mok dê den tàng añ sùm tus tàm tơl hìu bơnhă làng bol bơto pơlam ngui VNeID, lơh jat drơng broă dà lơgar mờ jòi gĭt ală broă lơh bè ù tiah, sră kham sơm kòp ờ sa priă, gàr tơl niam rài kis mpồl bơtiàn”.

Bơh hòi jà làng bol pà ù, tàm sơm bat tê bal bơt bơtàu tiah ơm kis, bơtàu tơnguh broă lơh tus lam lài ngui jak chài măi mok, tàm gơl sồ, gơnoar bơh kra ƀòn, cau geh bơngă pin dờn tàm broă lơh bơt bơtàu ƀòn lơgar pa ngai sơlơ loh làng. Mờ jơnau đơs geh mpồl bơtiàn pin dờn mờ bơta lơh krơh lam lài, khi pơgồp bơnah lơh kah wơl bơta pràn tàm dơlam is làng bol dê, ai ală broă jàu gơ lòt mut ngan ngồn tàm rài kis, bơt bơtàu ală ƀòn lơgar tiah làng bol jơi bơtiàn dồ ết nă cau tàm càr Lâm Đồng dê ngai sơlơ bơtàu tơnguh.