Nam 1975, tơnơ̆ ngai tiah đah Jum dà lơgar tơngklàs jơh, tơrgùm dùl Dà lơgar, hìu bơnhă ồng Đặng Kháng kung bè làng bol kòn cau Prum ơm tàm sàh Bắc Bình kis kơ nờm tàm sre, tàm mìr, ròng phan ờ uă, ală hìu bơnhă uă ngan tam phan nàng rcang geh phan sa lơm, ờ kơlôi tus jơnau lơh phan lơh geh bơh broă lơh sa suơn sre nàng tăc tàm drà ờ.

Neh là cau ling Wa Hồ, tơnơ̆ tŭ rê wơl mờ rài kis bè ờs, bulah rài kis gơtìp uă kal ke, mơya khi là ală cau sùm lam lài lòt lài tàm broă bơtàu tơnguh lơh sa hìu bơnhă, jơh nùs lơh broă sa, nàng brồ guh bè ờs wơl rài kis.

Geh pơrjum tàm Mpồl cau ling yau, bơh dơ̆ pơrjum mpồl mờ ală mpồl cau bal, ồng Đặng Kháng geh iăt jơnau yal ală gùng dà broă  lơh dong kờl bơh Đảng, Dà lơgar dê bè broă lơh bơtàu tơnguh lơh sa- mpồl bơtiàn, is ồn geh lòt còp uă broă lơh bơh cau tàm Mpồl cau ling yau dê bơtàu tơnguh lơh sa hìu bơnhă, dong bal mờ gơ̆p tơn jơh jơgloh tơrmù rƀah, brồ guh lơh pas di pal.

Ồng Kháng lơh nền rơwah broă lơh ròng be, kơnrồ mờ pơgồp bal mờ tam rlau 1 rơbô jrong plai thañ long nàng bơtàu tơnguh lơh sa hìu bơnhă. Bơh sơn rờp ờ hềt geh priă den tàng hìu bơnhă ồng mìng blơi bàr pe nơm kòn be dra mờ be dam nàng lơh sơntìl. Tơnơ̆ 1 tơngai, kơnờm jơh nùs sền gròi den tàng mpồl be bơh bàr pe nơm neh gơguh tus jơ̆t nđờ nơm, pah nam hìu bơnhă ồng Kháng lơh geh mờr 100 tơlak đong bơh broă tăc be, kơnrồ. Ồng Kháng pà gĭt, rài kis hìu bơnhă ồng neh lòt gan ală ngai kal ke suơ̆i siar, tŭ do ờ duh plai kơlôi phan sa pah ngai bè ală nam lài do tai: “Tơnơ̆ tŭ tơngklàs rê, añ neh lòt ling 2 nam, tus nam 1976 añ rê wơl, gơnoar atbồ ƀòn lơgar rơwah añ mut tàm Mpồl Cau ling yau bơh nam 2004, tơngai do, hìu bơnhă añ gơtìp uă kal ke ngan sơl, mơya kơnờm tus bal tàm Mpồl Cau ling yau, geh Mpồl dong kờl ai càn priă, añ cèng rê bơcri priă bơtàu tơnguh lơh sa tam tờm plai thañ long, blơi bàr pe nơm kơnrồ, be nàng ròng tai. Bơh ngai bơtàu tơnguh lơh sa, ròng phan, lơh sa hìu bơnhă añ kung bè ờs rlau”.

Ồng Đặng Kháng đơs nền, să tờm ồng mờ hìu bơnhă geh bè ngai do là bơta pơnđơl pràn lơh ngan brồ guh bơh hìu bơnhă dê, mơya kung pal kờp tus broă lơh dong kờl bơh Đảng mờ Dà lơgar mờ is ồn là bơta dong kờl, bơto pơlam bơh Mpồl Cau ling yau dê.

Ồng Nguyễn Bảo Quốc, Củ tịc Mpồl Cau ling yau sàh Bắc Bình, càr Lâm Đồng pà gĭt, tơnơ̆ tŭ tơmŭt bal, Mpồl Cau ling yau sàh Bắc Bình, càr Lâm Đồng uă ngan geh làng bol ală jơi bơtiàn dồ ết nă cau ơm kis tàm bơrlŭ bal. Bơdìh mờ bơta sền gròi bơh Mpồl Cau ling yau càr, bal mờ ală gùng dà broă lơh bơh Đảng mờ Dà lơgar, bơh ală broă lơh srơh lơh sa Mpồl Cau ling yau dê lơh, ală cau tàm mpồl Cau ling yau sàh Bắc Bình sơr lèt gan kal ke brồ guh nàng bơtàu tơnguh lơh sa hìu bơnhă mờ geh rài kis hờm ram:“Ồng Đặng Kháng bơh 1 hìu bơnhă kal ke, tơnơ̆ tŭ tus bal tàm Mpồl Cau ling yau, đòm jat niam nùs nhơm cau ling Wa Hồ dê, kơnờm bơta sền gròi bơh Đảng, Dà lơgar geh gĭt mờ ală priă càn bơh Anih priă jền cíñ sác- xã hội mờ Anih priă jền Broă lơh sa suơn sre mờ bơtàu tơnguh ƀòn lơgar, rcang gĭt ală priă càn hơ̆ ồng Kháng neh bơtàu tơnguh lơh sa hìu bơnhă, tam rlau 1 rơbô jrong plai thañ long, ròng kơnrồ, be nàng brồ guh gơ gơs hìu bơnhă pas đau tàm ƀòn lơgar dê”.

Ờ mìng pơnđơl pràn lơh pas ai he in lơm, mơya cau ling yau Đặng Kháng gam lơh ngan hòi jà, bơto pơlam làng bol lơh broă sa tàm ù tiah he dê, nàng pleh bơta kơ̆p kơnờm wơl tàm bơta dong kờl bơh Dà lơgar dê. Lơh ngan sơr lèt gan kal ke brồ guh bơh cau ling yau Đặng Kháng dê neh lơh geh cơng tàng niam ngan ai nùs nhơm lơh is, pràn is mờ bồ tơngoh jơh nùs lơh sùm bơh cau ling Wa Hồ dê.