Neh gơ gơs bơta mờng kwèng, drim lơi kung bè hơ̆ lơm, bi Kơ Să K’Hà (kòn cau K’Ho) ơm thôn 4, sàh Dam Rong 4, càr Lâm Đồng guh bĭc gờñ ngan nàng ai kòn tu in sa. Ală đồng zơu nha bơnung geh pĭc bơh mho ngai lài nàng sền gròi mpồl kòn tu gam tàm tơngai sa. Bi K’ Hà pà gĭt, lài do, hìu bơnhă bi mìng tam kơphê mờ ală bơta phan tam lơyah ngai, mơya priă lơh geh tŭ geh tŭ ờ. Lơh jat gùng dà broă lơh tam gơl rơndăp tăp sèng phan tam bơh tiah do dê, bal mờ bơta mblàng yal, hòi jà bơh kwang bàng Mpồl cau ùr sàh, nam 2022 hìu bơnhă bi khin cha tam gơl 1 bơnah bă ù  gam tam kơphê tus tam tờm zơu ròng tu: “Añ đơs mờ bơklau là ùr bơklau he pal tam tờm zơu lài, tơnơ̆ hơ̆ tus bal ơdŭ bơto pơlam ròng tu nàng geh bơta gĭt wă ròng tu dilah kòn tu gơtìp kòp den hơ̆ sồng gĭt tam cah is mờ ƀuơn ngan bơsong. Tơnơ̆ tŭ geh lài suơn zơu, ùr bơklau kơrhia ngan mìng blơi 2 lạng nggùl sơntìl kòn tu ròng lơm. Dơ̆ ròng tơrlòng lài, ùr bơklau ròng mờ lơh geh 20 kĭ rơsòn tu, bơh hơ̆ ùr bơklau añ hời rơ hời tam gơl priă lơh geh mờ geh tai broă lơh tam tờm zơu ròng tu”.

Ròng tu cèng wơl priă lơh geh uă mơya hoàc huơr dờng tài bơh tu ƀuơn ngan gơtìp kòp tài bơh tiah ơm kis. Tu digơlan gơtìp kòp lơh gơbàn chơ̆t dồ ròt, gơrềng ờ niam bơh trồ tiah duh mrềt, khih phan sa tài bơh jơng kah sơnơm sền gàr phan tam, mờ hoàc huơr bè bơta pràn niam kòn sơntìl dê. Gơwèt mờ hìu bơnhă bi Kơ Să K’Hà kung ờ pleh klàs sơl; tŭ jơh 4 dơ̆ ròng ndrờm ờ geh cồng nha, kòn tu chơ̆t jơh dồ ròt, pal tuh sang jơh. Neh geh tŭ bi kờñ lời tĕ.

 Mờ mờ nùs nhơm lơh ngan lơh jat broă lơh tam gơl rơndăp tăp sèng phan tam, hìu bơnhă bi Kơ Să K’Hà pơn jat tai bơcri priă bơtàu tơnguh broă tam tờm zơu ròng tu. Dơ̆ ròng lơh geh 7 tơlak đong, geh dơ̆ lơh geh 10 tơlak đong. Nam 2025, priă lơh geh bơh tam zơu ròng tu bơh hìu bơnhă bi dê lơh geh rlau 50 tơlak đong tơnơ̆ tŭ kờp jơh priă tă lơh.

Broă lơh bơh bi Kơ Să K’Hà ờ mìng cèng wơl cồng nha lơh sa ai hìu bơnhă in lơm, mờ gam lơh geh bơta pràn gơrề uă tàm mpồl bơtiàn, pơgồp bơnah lơh kơ̆ kơl jăp bơta pin dờn bơh mpồl cau ùr dê tàm broă lơh tam gơl lơh sa bơh tiah do dê. Bi Kơ Să K’Bích – Lam bồ Mpồl cau ùr thôn 4- tŭ do là Lam bồ Mpồl lơh bal tam tờm zơu ròng tu sàh Dam Rong 4 pà gĭt, tŭ do geh mờr 30 nă cau tàm mpồl, tàm hơ̆ geh 20 nă cau gàr sùm broă lơh sa. Bơh hơ̆, ală cau tàm mpồl ờ mìng tam pà bal mờng chài rơ̆ ru tam tờm zơu ròng tu lơm mờ gam sơlơ tơnguh tai nùs nhơm tam klăc, tàm dong tàm kờl bal tàm rài kis:“Broă lơh do geh tơnggơs mờ jơnau kờñ lơh bal, tam pà bal mờng chài ròng tu mờ dong kờl bal mờ gơ̆p. Pơn yơu bè tŭ ờ tơl nha zơu halà ờ tơl đồng den oh mi pà bal mờ gơ̆p in càn. Broă blơi sơn rờp kòn tu bơh tơl hìu bơnhă dê rcang, bè blơi bơh Kông ty Duy Phương halà ală tiah ndai, Mpồl lơh bal ờ tus bal ờ”.

Tàm broă lơh lơh broă, nàng sơlơ tơnguh tai bơta lơh bal đah ală cau tàm mpồl, Mpồl lơh bal tam tờm zơu ròng tu sàh Dam Rong 4 neh tơnggơs ală mpồl Zalo, Facebook nàng kờñ tam pà bal jơnau yal, cribơyai mờ lùp bơsram mờng chài lơh sa, tăc bro phan. Bơh broă lơh do, oh mi ờ mìng geh tai priă lơh geh lơm mờ gam geh tơnguh uă bơta gĭt wă bè tam gơl rơndăp tăp sèng phan tam, phan ròng, hời rơ hời pờ ơnàng bơta gĭt wă mờ tam gơl bồ tơngoh kơlôi sơnơng tàm broă lơh sa. Bi Kơ Să K’Bích pà gĭt tai: “Tàm tŭ mblàng yal tam gơl rơndăp tăp sèng phan tam, Mpồl cau ùr kung pơgồp bal mblàng yal tơn jơh ală bơhiàn yau bơrngơl gơla. Mơya, bơta do, kờñ pal geh tŭ tơngai. Kơ̆p kờñ là tàm tơngai tus, bơta gĭt wă bơh oh mi dê rơ̆p tơnguh tai, ală bơhiàn yau bơrngơl gơla tàm broă tam phan mờ rài kis lơh kơryan bơta bơtàu tơnguh rơ̆p geh rơ hời geh tơn jơh. Bơh bồ tơngoh kơlôi sơnơng tam gơl den rài kis rơ̆p ngai sơlơ niam rlau, ờ hoan bòl glar rlau. Ala mat Mpồl lơh bal, să tờm añ sùm lơh ngan lơh krơh niam tàm broă tam tờm zơu, ròng tu nàng tề lam oh mi tam klăc bal, pờ ơnàng mờ bơtàu tơnguh broă lơh. Añ kơ̆p kờñ ngai sơlơ geh uă oh mi tus bal nàng geh tai priă lơh geh, tam gơl niam rài kis hìu bơnhă dê”.