Tàm ƀòn Hwiê, sơnah ƀòn Ea Kao, broă lơh ai jơnau đơs tă pơgồp bè gùng dà broă lơh tơmŭt bal neh geh lam lơh tus tơl hìu bơnhă làng bol. Jat khà kờp atbồ, tŭ tơmŭt bal, ƀòn Hwiê pa rơ̆p geh 454 hìu bơnhă mờ 1 rơbô 914 nă cau, bă ù ơnàng rlau 496 lồ. Broă tơmŭt bal 2 ƀòn dờp geh bơta ring bal uă tài bơh tàm uă nam do, uă ngan làng bol neh đềt mềr ngan. Bi H’Trang Buôn Yă, làng bol ơm tàm ƀòn Hwiê yau pà gĭt:

“Pah dơ̆ geh ñô bau, chơ̆t ƀồc khi kung lòt tàm do, den tàng oh gŏ 2 ƀòn kung đềt mềr, gơ rờm bal mờ gơ̆p. Tŭ do tơmŭt bal oh kung ring bal sơl, gŏ bơta tơmŭt bal rơ̆p đềt mềr rlau tai, ngai sơlơ niam rlau tai. Oh kơ̆p kờñ cau đơng lam bồ rơ̆p rềp làng bol, ơm bal mờ làng bol, wă bơhiàn rài kis làng bol dê nàng lam ƀòn he ngai sơlơ bơtàu tơnguh rlau tai”.

Bơta ring bal bơh làng bol tàm ƀòn Hwiê dê geh tơngŏ loh bơh cồng nha tă pơgồp jơnau đơs mờ 96% cau tĕ khà ring bal gùng dà broă lơh tơmŭt bal. Kwơ màng ngan rlau là, làng bol ờ mìng ring bal mờ broă rơndăp tăp sèng mpồl lơh broă tiah ơm kis lơm mờ gam kơ̆p kơnờm ƀòn pa rơ̆p geh tai ală bơta nàng bơtàu tơnguh lơh sa, sền gàr bơhiàn niam chài is mờ bơtàu tơnguh rài kis. Hơ̆ kung là gùng dà pơlam mờ kấp ủy ƀòn Hwiê sền gĭt bơh tŭ lơh broă lơh tơmut bal dê. Ồng Y Vui Ayun, Bí thư Chi bộ ƀòn Hwiê pà gĭt:

“Bàr ƀòn tơnơ̆ tơmŭt bal rơ̆p ring bal bơtàu tơnguh lòt nhơl mpồl bơtiàn mờ bơtàu tơnguh bè ală bơhiàn niam chài is jơi bơtiàn bơh kòn cau Rơđê dê bè phan soh, ală broă lơh niam chài đơs crih tam ya ƀòn dê, broă rơndăp lơh bol añ rơ̆p bơtàu tơnguh tàñ ồi kòn cau bơh tiah do dê. Bol añ kung kờñ geh jơnau dan mờ Đảng ủy pờ ơdŭ bơto dròng cing mồng nàng ală kơnòm dềt tơnơ̆ do in tàm pơr dờn wơl bèp ồng dê”.

Bơh jơnau tàm ƀòn Hwie gơtùi gŏ, nàng dùl gùng dà broă lơh dờng gơ lòt mut tàm rài kis, bơta kwơ màng ờ mìng là lơh geh ală broă jàu bè khà kờp làng bol uă halà bă ù ơnàng lơm mờ gam pal gàr geh bơta tàm klăc bal bơh mpồl bơtiàn mờ ală bơta kwơ niam chài neh geh bơt bơtàu bơh uă rơnàng dê. Mờ nùs nhơm hơ̆, sơnah ƀòn Ea Kao neh lơh gùng dà broă lơh rơndăp bơh 25 gơmù gam 18 mpồl lơh broă, mơkung ai lơh lài gàr niam bè ờs ală ƀòn geh uă kah yau mờ bơhiàn niam chài is bơh kòn cau Rơđê dê. Ồng Đặng Gia Duẩn, Bí thư Đảng ủy sơnah ƀòn Ea Kao, pà gĭt:

“Geh uă ngan broă jàu lơh jat tàm jơnau yal rơndăp tăp sèng do, bơta kah yau geh kờp sơn rờp ngan. Gơwèt mờ ală tiah geh bơhiàn ờs mờng bơh jŏ rài bè ală ƀòn lơgar kòn cau Rơđê lài do den lơh ngan gàr wơl nàng sền gàr mờ ngui niam ală bơta kwơ niam chài ờs mờng. Làng bol kung kwi kwơ tơnơ̆ tơmŭt bal den ală sră pơ àr gơnoar atbồ bè lơi? Tus ndo Đảng ủy rơ̆p ai Kwang bàng lòt tơn tàm ală ƀòn, jơnum làng bol tiah drà tơnơ̆ tŭ tơmŭt bal nàng tam gơl wơl ală bơta sră pơ àr kwơ màng ai làng bol in geh jơnau kờñ mờ làng bol gơtùi tus tàm Anih tờm Sră pơ àr gơnoar atbồ Dà lơgar nàng tam gơl ală sră pơ àr tơnơ̆ rơndăp tăp sèng, mờ is ồn jơh ală sră pơ àr do ndrờm ờ sa priă”.

Broă lơh bơh sơnah ƀòn Ea Kao dê kung là gùng lòt bal bơh càr Dăk Lăk dê sơl: tơmŭt bal ờ mìng là jơnau kờp sền bè khà làng bol uă halà bă ù geh is lơm, mờ gam pal kờp tus ù tiah niam chài mờ bơta tam klăc bal bơh tơl mpồl bơtiàn dê.

Jơnau kờñ bơh càr Dăk Lăk dê là tơrmù khà thôn, ƀòn, jơnum làng bol tiah drà bơh 2 rơbô 801 mpồl lơh broă gơmù gam 1 rơbô 556 mpồl lơh broă. Ồng Vũ Lê Các, Phó Kwang lam bồ Sờh Broă dơlam is càr Dăk Lăk pà gĭt, tàm tŭ bơt bơtàu gùng dà broă lơh, càr Dăk Lăk sùm sền dờng màng bơta krơi is bơh tơl tiah dê:

“Gơwèt mờ càr Dăk Lăk, tiah geh uă ƀòn làng bol jơi bơtiàn dồ ết nă cau ơm kis, bol añ is ồn sền gròi tus broă prap gàr ală bơta kwơ niam chài ờs mờng mờ gàr niam bơta tam klăc bal bơh mpồl bơtiàn dê. Den tàng gơwèt mờ ală ù tiah geh bơta is ồn bè tiah sar lơgar ngài, tiah nhàr lơgar, ù tiah lòt rê kal ke halà ală ƀòn geh bơta kwơ niam chài is ồn, ală tiah sền sơwì tơl làm ală bơta jat jơnau sồr lài mờ tŭ lơh nền gùng dà broă lơh rơndăp tăp sèng dê”.

Digơlan tơnơ̆ dơ̆ rơndăp tăp sèng, bàr pe mat ƀòn rơ̆p ờ gam tai tàm sră pơ àr gơnoar atbồ dê. Mơya dilah bơhiàn niam chài kung gam geh sền gàr, nùs nhơm tam klăc bal tàm ƀòn lơgar kung gam bơt bơtàu mờ làng bol kung gam gŏ he là cau tờm bơh bơta tam gơl dê, den tàng tơl dơ̆ rơndăp tăp sèng rơ̆p ờ duh pal là bơta roh tĕ ờ, mờ là bơta sơn đờm ai dùl ù tiah bơtàu tơnguh pa bơh ală ƀòn lơgar tàm tiah kơh bơnơm Dăk Lăk dê.