Mò Ngô Thị Kim Xuyến, ơm tàm sơnah ƀòn 1, ƀòn drà dềt Quảng Phú, kơnhoàl Cư Mgar pà gĭt:“Añ chờ hờp ngan, chờ hờp bàr pe ngai do ờ gơtùi bĭc tơn. Añ ưn ngài Đảng, Dà lơgar mờ mpồl kwang àng lơh ai hìu bơnhă añ in geh hìu nàng ơm, chờ hờp ngan”.

Ai oh H’En Niê ơm tàm ƀòn Kmiên, sàh Ea Drông, ƀòn drà dờng Buôn Hồ den ngoh rơngăc pà gĭt tàm ngai sơnđờm mut lơh hìu ơm pa bè do:“Ngoh rơngăc ngan, ờ gĭt đơs bơta lơi tai, geh kwơ uă ngan, geh dùl nơm hìu ơm ram mhŭ nàng hìu bơnhă in ơm tàm kàl mìu, kàl prang duh. Tơnơ̆ do 2 nă ùr bơklau tơryang tơryồng lơh broă, lơh ngan nàng bơtàu tơnguh lơh sa”.

Ală hìu ơm do gơwèt Ală jơnau neh lơh nền lơh pa 4 rơbô 285 nơm hìu pà ai hìu bơnhă rƀah, hìu bơnhă pa lik klàs rƀah tàm ù tiah càr Dăk Lăk in (hòi lơyah là Ală jơnau neh lơh nền 214) bơh Kwang àng càr dê đơng lam, lơh jat bơh bồ nhai 3 nam do. Jat hơ̆, mờ kờp jơh priă lơh lơh mờr 343 tơmàn đong, tơl nơm hìu lơh pa geh dong kờl 80 tơlak đong, tàm hơ̆ 60 tơlak đong bơh priă dong kờl bơh Dà lơgar dê mờ 20 tơlak đong bơh kes priă càr. Bal mờ hơ̆, Ală jơnau neh lơh nền kung dong kờl lơh niam wơl hìu ơm ai 1 rơbô 120 nơm hìu mờ khà priă dong kờl 30 tơlak đong tơl nơm hìu.

Tơnơ̆ nggùl nhai lam lơh, neh geh 1 rơbô 026 nơm hìu gơwèt Ală jơnau neh lơh nền 214 geh sơnđờm mut lơh, kờp dŭ lơh sir tàm nhai 4 do. Thiếu tướng ồng Lê Vinh Quy, Kwang lam bồ Kwang àng càr Dăk Lăk pà gĭt, tơnơ̆ tŭ tơn jơh broă lơh Kwang àng kấp kơnhoàl, càr jàu Kwang àng kấp sàh, ƀòn drà dềt in lam lơh tơn mờ jơnau kờñ pơnđơl pràn lơh ngan lơh sir lơh 4 rơbô 285 nơm hìu tàm tơngai 5 nhai nggùl. Thiếu tướng ồng Lê Vinh Quy, đơs: “Pơn đơl pràn lơh sir tŭ tơngai mut lơh tus ngai 15/8/2025. Bol añ kung neh lam lơh tus ală oh mi Lam bồ kwang bàng  180 sàh, sơnah ƀòn, ƀòn drà dềt nàng ală oh mi in pơn jat tai tă pơgồp jơnau đơs ai kấp ủy, gơnoar atbồ ƀòn lơgar mờ ai mpồl cau bal mờ ală mpồl bơh kấp ủy, gơnoar atbồ ƀòn lơgar lơh tơn, jơh nùs dong kờl ai làng bol in lơh ală broă lơh do nàng gàr niam tàm tơngai tus, lơh di tơngai mờ niam kơnhăp”.

Bal mờ Ală jơnau neh lơh nền 214 bơh Kwang àng càr dê đơng lam, tàm càr Dăk Lăk geh 3 Ală jơnau neh lơh nền ndai gam lơh jat mờ jơnau lờñ lơh 3 rơbô 027 nơm hìu dong kờl hìu bơnhă geh sră dong kờl Dà lơgar, cau geh màng mờ Dà lơgar, hìu bơnhă rƀah, hìu bơnhă pa lik klàs rƀah. Ală Jơnau neh lơh nền do geh tam pà priă jền rê tàm ƀòn lơgar nàng lam lơh. Ồng Nguyễn Hải Đông, Ƀí thư Huyện ủy kơnhoàl Krông Búk pà gĭt, kơnhoàl jơh nùs lơh ngan rơ̆p lơh sir broă bơt bơtàu mờ lơh niam wơl 141 nơm hìu tàm bồ kàl mìu tus do: “Bol añ neh ai jơnau kờñ lơh sir jơh broă bơt bơtàu mờ lơh niam wơl jơh ală nơm hìu lài mờ ngai 15/07 do. Bol añ sồr lơh kràñ cê jơh nùs ală mpồl lơh broă, ală mpồl, ală mpồl lơh sa kă bro kung bè là ală tiah tơrgùm nàng bol añ in lơh sir lài mờ tŭ tơngai mut lơh pơndrờm mờ càr mờ bàr pe ƀòn lơgar tus di tŭ gờm chờ tơngkah kir sơnrai Ngai Kăc màng nhai 8 jai pha".

Mờ bơta jơh nùs lơh ngan, tàm sơm bat tê bal bơh jơh ală anih lơh broă cíñ trị tàm càr Dăk Lăk, ală nơm hìu kơnhăp gam mhar ngan ala ală hìu lơh ing, hìu ồm sèt ñhăt dà mìu. Hìu ơm pa rơ̆p lơh geh tai bơta gơn kơnờm nàng ală hìu bơnhă in sơr lèt gan kal ke, sơlơ pin dờn rlau tai tàm ală broă lơh, gùng dà broă lơh bơh Đảng mờ Dà lơgar dê, jơh nùs brồ guh tàm rài kis.