Sàh Vụ Bổn, càr Dăk Lăk geh 8 hìu bơsram mờ ală kấp bơsram bơh mầm non tus kấp bàr. Jat gùng dà broă lơh rơndăp tăp sèng, sàh gam wơl 3 hìu bơsram, geh 2 hìu bơsram kấp 1 mờ kấp 2 mờ 1 hìu bơsram mầm non. Ồng Nguyễn Huy Hoàng, Chủ tịch Anih duh broă Làng bol sàh Vụ Bổn pà gĭt, broă lơh geh lơh jat tàm ală bơta kờp sền bơta geh ngan ngồn bơh hìu bơsram dê, tă pơgồp jơnau đơs mờ Đảng ủy, đơng lam bồ ală hìu bơsram mờ kờp sền ală bơta geh ngan bơh tiah do dê.

“Tàm tŭ lơh broă lơh, bol añ dan jơnau dan mờ Đảng ủy, mpồl đơng lam bồ hìu bơsram, jat tàm nùs nhơm ai cau bơsram lơh anih tờm. Gơwèt mờ dùl ù tiah sar lơgar ngài, tiah kal ke bol añ kung gam gàr niam di gùng dà broă lơh bơh Đảng, Dà lơgar mờ di pal mờ ală bơta geh ngan dê”.

Bal mờ broă lơh sir broă lơh, ală hìu bơsram lơh pràn mblàng yal, gĭt nùs nhơm bơh kwang bàng, cau pơgru mờ mè bèp kơnòm bơsram dê. Ală broă gơrềng tus rơndăp hìu bơsram, ơdŭ bơsram, mpồl kwang bàng mờ ală bơta bơsram sră geh cribơyai, mblàng lơh loh nàng lơh geh bơta ring bal lài mờ tŭ lam lơh. Mò Võ Thị Cẩm Hoa, Lam bồ Hìu bơsram Mẫu giáo Hoa Ban Trắng, sàh Dliê Ya, càr Dăk Lăk, pà gĭt:

“Bol añ mblàng yal tus mờ jơh ală kwang bàng, cau pơgru, cau lơh broă in: Iang nùs, bè ờs nùs nhơm, rcang lài nùs nhơm nàng lơh jat gùng dà broă lơh tơmŭt bal bơh Dà lơgar dê. Dơ̆ 2 là, mblàng yal tàm ală mpồl Zalo mờ mè bèp kơnòm bơsram bơnah lơi iang nùs; bulah geh tơmŭt bal den oh kòn he dê kung bơsram tàm ală tiah rềp ngan rlau jơh, ƀuơn ngan rlau jơh”.

Ai tàm hìu bơsram kấp dùl Nguyễn Trãi, sàh Vụ Bổn, ală kal ke bơh sơn rờp bè broă lơh rơndăp hìu bơsram kung geh hìu bơsram cribơyai, mblàng lơh loh. Bơh bơta sền gĭt, uă kwang bàng, cau pơgru mờ mè bèp kơnòm bơsram ring bal mờ gùng dà broă lơh. Ồng Trần Hải Đường, Lam bồ Hìu bơsram pà gĭt:

"Do là gùng dà broă lơh di ngan nàng tơrmù ƀà ală hìu bơsram mờ tơnguh khà cau pơgru. Tài bơh tŭ do, khà cau pơgru geh tiah jơng kah geh tiah ờ tơl. Bè nùs nhơm bơh bơta sền gĭt ală bơta den mpồl kwang bàng, cau pơgru mờ mè bèp kơnòm bơsram ndrờm ring bal lơm. Hời rơ hời nàng bơt bơtàu hìu bơsram tơl jơnau kờñ dà lơgar, kung bè ai bơta ring bal làng bol gĭt wă ngai sơlơ gơguh tai”.

 Jơh gùt càr Dăk Lăk tŭ do geh 1 rơbô 267 hìu bơsram dà lơgar. Tơnơ̆ uă dar kờp sền, gùng dà broă lơh pa ngan rlau jơh kờp dŭ gơmù 646 hìu bơsram, ndrờm mờ rlau 50% khà bơh sơn rờp. Tàm dơ̆ lơh broă mờ ală Sờh, gah, ồng Lương Nguyễn Minh Triết, Kwang bàng Đảng dà lơgar, Bí thư Tỉñ ủy càr Dăk Lăk sồr broă rơndăp tăp sèng pal jat nền gùng dà broă lơh bơh Dà lơgar dê, tơrmù di pal hìu bơsram bơh sơn rờp atbồ pơgồp bal mờ rơndăp tăp sèng wơl mpồl cau lơh broă jat gùng dà tơrmù cau lơh broă atbồ bơto bơtê, tơnguh cau lơh broă bơto bơtê tơn.

“Cau pơgru lơh atbồ bơto bơtê den gơtùi tus bơto bơtê tơn, halà rê tàm sàh sơnah ƀòn dong kờl ai broă atbồ bơto bơtê tàm sàh, sơnah ƀòn in. Gàr bè ờs broă lơh kơnòm bơsram tàm ală tiah hìu bơsram, tiah bơsram, săp sèng tam pà geh cồng nha mpồl cau pơgru nàng tơnguh bơta pràn jak atbồ, geh cồng nha bơcri priă mờ tơnguh cồng nha bơto bơtê mờ bơsram. Ngan là ờ gŏ di lơh gơrềng tus broă bơsram, bơta pràn gĭt mờ broă bơto bơtê bơh kơnòm bơsram dê”.

Rơndăp tăp sèng ală hìu bơsram tàm càr Dăk Lăk gam geh lơh jat jat gùng dà tơrmù dipal hìu bơsram bơh sơn rờp, ngui geh cồng nha phan bơna mờ mpồl cau, mơya kung gam gàr bè ờs broă bơsram sră. Bơta rcang lài bơh gơnoar atbồ, gah bơto bơtê mờ bơsram bal mờ ală hìu bơsram, gam lơh geh bơta ring bal bơh kwang bàng, cau pơgru mờ mè bèp kơnòm bơsram dê, bơt bơtàu bơnàng jă nàng broă lơh rơndăp tăp sèng wơl hìu bơsram, ơdŭ bơsram geh bơyai lơh bè ờs, ờ gơrềng tus kơnòm bơsram, ngan là tàm tiah sar lơgar ngài mờ tiah nhàr lơgar dê.