Ală ngai bồ nam 2026, tus tiah lơh broă bơt bơtàu Hìu bơsram 3 kấp Buôn Đôn (thôn Thống Nhất, sàh Buôn Đôn, càr Dăk Lăk), gĭt nđờ jơ̆t nă cau lơh phan, kỹ sư bal mờ uă măi mok bơh cau bơcri priă lơh dê, tam pà gơs uă mpồl, gơ jal ngan koh lòs, bơrlŭ bê tông lơh jrong, tri kơlik hìu; cau ndai crăp ală bơta, rcang tuh bê tông bơnàng cờn 1 geh hìu tờm 3 cờn dê. Ồng Trần Văn Long, đơng lam bồ mut lơh broă broă lơh bơt bơtàu pà gĭt, ală cau lơh broă kung gam ai uă ngan rlau jơh cau lơh broă, măi mok nàng lơh mhar tŭ tơngai mut lơh. Tŭ do broă lơh sơr lèt gan broă rơndăp lơh geh ai:“Tŭ do, tàm tiah lơh broă geh 5 mpồl bơyai lơh lơh bal, gam rơndăp tơl mpồl bơyai lơh 1 nă cau đơng lam bồ, 5 nă kỹ sư bal mờ bơh 40 tus 50 nă cau lơh phan mut lơh bơt bơtàu 5 bơta bơnah broă bơh rơndăp broă lơh dê. Ală bơnah broă lơh geh lam lơh gàr niam tŭ tơngai mut lơh geh ai. Bol añ gam lơh ngan bơsong ală bơta trồ tiah trồ tơngai duh, ro kơnrañ, lam mut lơh uă dơ̆ nàng lơh sir sơrlèt gan tŭ tơngai, tàm jàu ai ală tiah in mut ngui”.

Jat ala mat cau tờm bơcri priă, ồng Võ Văn Lợi, Phó Kwang lam bồ Mpồl Atbồ rơndăp broă lơh bơcri priă bơt bơtàu broă lơh Drơng broă làng bol mờ Lơh sa mờ măi mok càr Dăk Lăk (Mpồl B), tus tŭ do jơh ală Hìu bơsram ơm sa bĭc tơn tàm hìu bơsram tiah nhàr lơgar tàm càr neh lơh sir bơnah bơnàng hìu, rcang tuh bê tông lơh bơnàng cờn 1. Khà ai priă lơh geh rlau 32%, ndrờm mờ pơgăp 120 tơmàn đong, gàr niam di tŭ tơngai mut lơh. Mut tàm tơngai kàl prang uă, Mpồl neh lơh broă rơndăp lơh dong kờl ală mpồl bơyai lơh tơrgùm mut lơh nàng lơh sir broă lơh bơt bơtàu tàm nhai 8 tus do, kờp bal tŭ geh mìl càl kal ke. Ồng Võ Văn Lợi pà gĭt:“Tus tŭ do, broă lơh bơt bơtàu sền gàr gàr niam di tŭ tơngai mut lơh. Mơya, tài bơh bơta krơi is kàl mìu càl rơbŭt dờng tàm tiah nhàr lơgar càr Dăk Lăk tàm nam 2026 gơlik geh kal ke ờ gơtùi gĭt lài, bol añ neh lơh ală gùng dà broă lơh dong kờl bè măi mok, rơndeh rơndồ, mpồl cau lơh broă mờ lam mut lơh 3 dơ̆ nàng bơtơl mờ tŭ tơngai mut lơh. Bơh hơ̆, ngui uă ngan rlau jơh ală ngai trồ tiah tơngai niam tàm kàl prang nàng lơh broă broă bơt bơtàu”.

 Jat ồng Nguyễn Thiên Văn, Phó Củ tịch Anih duh broă Làng bol càr Dăk Lăk, tơnơ̆ jơnau sồr bơh cau tờm bơcri priă dê, ală tiah mờ ală mpồl bơyai lơh neh lơh ngan lơh  mhar tŭ tơngai mut lơh, gờñ lơh sir broă lơh bơt bơtàu nàng drơng broă kơnòm bơsram tiah nhàr lơgar in, mơkung gờm chờ kung bè Jơnau lơh nền tàm pơrjum bơh Pơrjum dờng dơ̆ 14 bơh Đảng dê tàm rài kis. Ồng Nguyễn Thiên Văn đơs sùm: “Lam lơh Jơnau lơh nền tàm Pơrjum dờng dơ̆ 14 bơh Đảng dê geh ring bal, ală tiah rơ̆p lơh ngan ngồn di pal mờ ală bơta geh ngan bơh càr dê, nàng kờñ bơt bơtàu ală broă lơh geh ngan gơwèt mờ mpồl cau pơgru mờ kơnòm bơsram ơm sa bĭc tơn tàm hìu bơsram, lơh geh ală bơta niam ngan rlau jơh nàng cau pơgru mờ kơnòm bơsram in iang nùs bơto bơtê mờ bơsram. Bơh hơ̆, lơh jat geh cồng nha jơnau kờñ bơto bơtê tàm ù tiah ală sàh tiah nhàr lơgar đơs is mờ jơh gùt càr Dăk Lăk đơs bal”.

Ală jrong lơh bơnàng hìu kơnhăp kơ̆ geh lơh, ală jrong hìu rơ hời tơnguh jơnhoa, lơh geh bơnàng kờl ai ală bơnàng hìu lơh mờ bê tông kơnhăp kơ̆ tàm ală hìu bơsram ơm sa bĭc tơn tàm hìu bơsram tiah nhàr lơgar càr Dăk Lăk dê. Bơh nam 2026- 2027, tiah do rơ̆p gơ gơs tiah kơl dìng rơsìh jơnau bơsram gĭt wă ai rlau 3 rơbô nă kơnòm bơsram tàm tiah nhàr lơgar in. Ală kơnòm bơsram hơ̆ rơ̆p lơh ngan pơn đơl pràn bơsram sră, lơh ngan nàng tàm rài tơnơ̆ do ờ ngài, mờ bơta pràn rơnàng kơnòm să mờ bơta bơsram gĭt wă bơh he dê, pơgồp bơnah bơt bơtàu tiah nhàr lơgar càr Dăk Lăk ngai sơlơ kơ̆ kơl jăp, bơtàu tơnguh mờ cèng bềng bơhiàn niam chài is.