Mờ bă ù geh is rlau 35 rơbô 700 lồ, tàm hơ̆ rlau 90% bă ù lơh broă sa suơn sre, kơnhoàl Krông Búk, càr Dăk Lăk sền bơta ƀuơn, bơta pràn lam lài bơh he dê là bơtàu tơnguh ală tờm chi tam jŏ nam. Ồng Nguyễn Hải Đông, Ƀí thư Huyện ủy kơnhoàl Krông Búk, pà gĭt, kơnhoàl gam tơrgùm lơh broă rơndăp lơh ngui ù tus nam 2030, nàng kờñ gàr niam tam pà di pal đah ală ù drơng jơnau kờñ bơtàu tơnguh lơh sa mpồl bơtiàn. Ồng Nguyễn Hải Đông, đơs:“Kơnhoàl gam apah ală cau gĭt uă jrô broă lơh bơto pơlam lam lơh ală broă lơh nàng gàr niam mờ jơnau sồr bal bơh càr, bơh Dà lơgar dê. Tŭ lơh geh broă lơh do den broă hòi jà bơcri priă kung bè broă bơt bơtàu phan bơna, tăc ù, pà ù ai làng bol in rơ̆p gàr niam. Dilah lơh geh broă lơh den broă jàu bè bơtàu tơnguh lơh sa- mpồl bơtiàn mờ broă jàu rlau 8% kơ̆p kơnờm rơ̆p lơh geh”.

Kờp jơh bă ù geh is gơguh tus 176 rơbô lồ, Ea Súp là kơnhoàl geh ù tiah dờng ngan rlau jơh càr Dăk Lăk. Mơya, do den là dùl tàm ală kơnhoàl rƀah ngan rlau jơh càr dê; dùl bơnah gơbàn kwơ màng ngan là pơhì pơhà ù tŭ geh gĭt nđờ jơ̆t rơbô lồ gơ kòl wơl tàm ală rơndăp broă lơh mờ gơtìp làng bol sơgràm. Nàng bơsong broă lơh, kơnhoàl gam jơh nùs lơh jat ală broă lơh ai wơl ù gơtìp sơgràm lơh geh ù tiah niam, gơ hòi gơ jà ală mpồl lơh sa kă bro geh bơta pràn jak in bơcri priă lơh. Mờ ală pơnđơl pràn lơh ngan do, kơnhoàl Ea Súp kơ̆p kơnờm ờ mìng pờ geh tŭ tơngai niam bơtàu tơnguh lơh broă sa suơn sre dờng lơm mờ gam wèt tus gơ hòi gơ jà ală rơndăp broă lơh lơh broă sa suơn sre ngui măi mok pa, pơgồp bơnah yờ tơnguh uă bơta kwơ lơh sa, tơnguh priă lơh geh nàng kờñ bơtàu tơnguh rài kis ai làng bol in. Ồng Đỗ Xuân Dũng, Phó Ƀí thư Huyện ủy kơnhoàl Ea Súp đơs nền:“Gơtùi đơs nền là ù tiah bè ù tiah nàng bơtàu tơnguh broă lơh sa suơn sre, phan brê tàm ù tiah kơnhoàl Ea Súp dê là dờng ngan. Den tàng kơnhoàl Ea Súp kờñ ngan hòi jà ală cau bơcri priă lơh tus mờ Ea Súp dờp atbồ ală bă ù mờ bol añ kờp dŭ ai wơl nàng atbồ, bơcri priă lơh sa, bơtàu tơnguh lơh broă sa suơn sre, phan brê jat rơndăp ù tiah mờ jat jơnau cih bơh adat boh lam dê”.

Đơs ngan gơnoar broă bơh bơta pràn ù tiah tàm broă lơh kwơ màng bơtàu tơnguh lơh sa- mpồl bơtiàn bơh càr dê, tàm ngai lơh broă sơn rờp mờ Sờh Broă lơh sa suơn sre mờ Tiah ơm kis càr Dăk Lăk tơnơ̆ tŭ rơndăp tăp sèng tơrmù di pal mpồl lơh broă (tơmut bal mờ Sở Broă lơh sa suơn sre mờ Bơtàu tơnguh Ƀòn lơgar bal mờ Sờh Phan kwơ geh is mờ Tiah ơm kis), ồng Nguyễn Thiên Văn, Phó Củ tịc Anih duh broă Làng bol càr pà gĭt: Càr gam lơh jat dồ ròt broă bơsong nàng lơh jat geh cồng nha ală bơta pràn do. Tàm hơ̆, broă lơh ai ù gơtìp sơgràm pal lơh jat kràñ cê jơh nùs, bal mờ hơ̆ là kờp sền, tam gơl niam rơndăp ù tiah ngui ù geh lam lơh dồ ròt bal, gàr niam di pal mờ tơl tiah mờ pơlam gùng dà bơtàu tơnguh bal bơh càr dê. Ồng Nguyễn Thiên Văn sồr Sở Broă lơh sa suơn sre mờ Tiah ơm kis tơrgùm mơ tơngume dê:“Lơh pràn tŭ tơngai bơklơn ai ù gơwèt mờ ù gơtìp sơgràm pal lơh mơ, tài bơh bol he neh lơh broă rơndăp lơh ai jơh ù tiah gơtìp sơgràm tàm ù tiah jơh gùt càr rao mờ tơnơ̆ tŭ ai ù gơtìp sơgràm pal tă pơgồp jơnau đơs ai Anih duh broă Làng bol càr in nàng yal mờ Mpồl lơh kơnòl broă sùm Tỉñ ủy càr bè broă lơh ngui ù tơnơ̆ ai wơl, sồr ală oh mi mhar lơh tơngume do den hơ̆ sồng dồ ròt bal mờ lơh jat niam Jơnau lơh nền tàm pơrjum bơh càr, đảng ƀộ kung bè jơnau sồr bơh Dà lơgar dê”.

Atbồ mờ ngui ù geh cồng nha ù tiah kơ̆p kơnờm ờ mìng dong càr Dăk Lăk lơh geh jơnau kờñ gơguh lơh sa 8% lơm mờ gam lơh geh bơnàng jă kơ̆ kơl jăp ai bơta bơtàu tơnguh kơ̆ kơl jăp. Mờ ală broă lơh di pal, bơh rơndăp ù tiah di pal, bơcri priă lơh phan bơna bơt bơtàu, gơ hòi gơ jà mpồl lơh sa kă bro tus sền gàr tiah ơm kis, càr Dăk Lăk gơtùi lơm ngui bơta pràn uă ngan rlau jơh bơta ƀuơn, bơta pràn ù tiah dê, lơh do gơ gơs bơta gơn kơnờm kwơ màng nàng bơtàu tơnguh bơta niam rài kis làng bol dê mờ sơlơ tơnguh tai lơh sa ală tiah ngai sơlơ bơtàu tơnguh.