Hìu bơnhă bi Điểu Đên là dùl tàm 60 hìu bơnhă làng bol jơi bơtiàn dồ ết nă cau ơm tàm ƀòn Bu Lum, sàh Quảng Trực, càr Lâm Đồng trờn rê ơm tàm tiah hìu ơm pa dờng niam bơh dà lơgar dê bơt lơh. Bơta chờ hờp bơh bi bal mờ làng bol geh uă rlau 2 dơ̆ tŭ hìu pa lòt bal mờ phan bơna bơt bơtàu gùng che ồs đèng, gùng lòt, hìu sơnơm lơh sir. Bi Điểu Đên yal, ồs đèng tàm hìu pa pràn ngan mờ bè ờs, ờ hoan gơtìp gơ sơ̆t đèng den tàng bi neh ngui 2 tơlak đong geh dà lơgar dê pà nàng blơi glah ơm piang đèng, kơ am trŭ dà đèng. Tŭ do ùr bơklau bi dê rơ̆p tềm pềr priă jền nàng blơi tai tùh mrềt, phan ngui pờ tơlik jơnau đơs crih lơh rài bồ tơngoh mờ bi kơ̆p kờñ ală tiah làng bol jơi bơtiàn dồ ết nă cau tàm ală sàh ndai kung geh bè hơ̆ sơl. Bi Điểu Đên pà gĭt:

"Añ gŏ Đảng, Dà lơgar sền gròi tus làng bol tiah nhàr lơgar uă ngan. Tàm ƀòn do làng bol brơn brài ngan, làng bol lời jơh hìu ơm ngài nàng rê tàm do tài bơh tàm do niam uă rlau, geh gùng che ồs đèng ƀuơn ƀoài ngan. Añ kơ̆p kờñ Dà lơgar sền sơwì, sền gròi ai lơh lài tus mờ ală ƀòn ndai, ală hìu bơnhă ờ hềt geh ồs đèng nàng khi in kung geh dờp lèng ồs đèng ngui pah ngai bè tàm do sơl”.

Ơm rềp mờ ƀòn Bu Lum là ƀòn Bu Dắr. Bơh tŭ geh gùng che ồs đèng Dà lơgar dê, uă hìu bơnhă crăp is ƀong đèng mờ Camera sòl đah gùng lòt, sòl àng ai broă lòt rê tŭ trồ mang mìu càl, mơkung di tŭ dong kờl làng bol lòt gùng geh bơta aniai mờ rcang gàr lài broă ntung kơñau tai sơl. Broă lơh atbồ ƀòn bơh Lam bồ ƀòn Bu Dắr-  ồng Vũ Minh Tiến dê bè hơ̆ mơkung ƀuơn, geh cồng nha uă rlau ngan sơl:

"Gùng che ồs đèng rê tus den tam gơl pa uă muh mat sàh tiah nhàr lơgar in, làng bol brơn rài ngan. Tàm ƀòn do 2, 3 hìu ngui bal dùl nơm măi kông – tơ tuh dà tŭ mut tàm kàl tài bơh đèng 3 pha ngui ƀuơn rlau pơndrờm mờ măi zờu. Đèng sòl àng pơgồp bơnah tơrmù ƀà rềs àr lòt rê tàm gùng, uă hìu bơnhă gam crăp camera nàng rcang lài tung kơñau”.

Broă ală gùng che đèng dà lơgar geh bơcri priă lơh tus tàm tiah nhàr lơgar neh lơh geh ală bơta ƀuơn ngan nàng mpồl lơh broă in lơh geh cồng nha kơnòl broă atbồ, sền gàr gơnoar tờm, lơngăp lơngai tiah nhàr lơgar dà lơgar dê. Jat Thượng tá ồng Phan Văn Khá, Chính trị viên Pôs đồng ling sền gàr tiah nhàr lơgar Mpồng nhàr lơgar Bu P'Răng, ală gùng che đèng geh bơt bơtàu, lơh kơ̆ kơl jăp mờ gàr niam broă lơh kơ̆ kơl jăp neh drơng geh cồng nha broă lơh đơng lam, sồr lơh, gàr niam jơnau tàm yal tơngĭt bal tàm lơh jat kơnòl broă dê. Thượng tá ồng Phan Văn Khá pà gĭt tai:

"Broă dŭi gùng che đèng tus tàm tiah sar lơgar ngài neh pơgồp bơnah bơtàu tơnguh lơh sa mờ gàr niam sền gàr dà lơgar lơngăp lơngai. Gơwèt mờ làng bol, tŭ geh gùng che đèng den geh ală bơta ngui ală rơndeh rơndồ măi mok, jak chài măi mok nàng bơtàu tơnguh lơh sa, kơ̆ kơl jăp rài kis. Gơwèt mờ kwang bàng, cau ling mpồl ling dê, gùng che đèng dong lơh jat niam kơnòl broă ling klàng sền gàr dà lơgar, tiah nhàr lơgar, lơh pràn tam gơl sồ tàm broă lơh”.

Ồng Trần Minh Huy, Lam bồ Ồs đèng Tuy Đức, Kông ty Ồs đèng Lâm Đồng (Kông ty dờng Ồs đèng tiah đah Jum dà lơgar), pà gĭt, tàm ù tiah nhàr lơgar, tiah sar lơgar ngài, broă gàr niam pờ đèng lơngăp lơngai mờ pờ sùm ờ mìng drơng broă bơtàu tơnguh lơh sa, mpồl bơtiàn in lơm mờ gam pơgồp bơnah bal mờ gơnoar atbồ mờ mpồl lơh broă geh gơnoar gàr kơ̆ sền gàr dà lơgar, lơngăp lơngai, bơt bơtàu tiah nhàr lơgar kơ̆ kơl jăp.

"Tuy Đức là tiah nhàr lơgar den tàng phan bơna bơt bơtàu gùng che đèng kal ke ngan mơya kơnờm bơta sền gròi bơcri priă lơh den tàng tus tŭ do sền bal neh geh sùm đèng, 99% ù tiah geh gùng che đèng. Ală rơndăp broă lơh kơ̆ kơl jăp làng bol ơm kis tiah nhàr lơgar là rơndăp broă lơh tờm bơh Chính phủ dê mờ tŭ lam lơh den geh phan bơna bơt bơtàu đèng, pal gàr niam broă pờ đèng ai làng bol tiah nhàr lơgar in, gàr niam broă pờ đèng ai lơngăp lơngai sền gàr dà lơgar”.

Kung bè hơ̆ sơl, gùng che ồs đèng ngan ngồn neh pơgồp bơnah uă ngan tàm bơtàu tơnguh lơh sa, kơ̆ kơl jăp rài kis, gàr niam lơngap lơngai rơndăp tăp sèng tiah sar lơgar ngài, tiah nhàr lơgar sàh Dăk Wil, càr Lâm Đồng dê. Ală nam do, gùng che đèng dà lơgar neh gơ gơs bơta gơn kơnờm kwơ màng sơlơ tơnguh tai bơtàu tơnguh lơh sa tàm ƀòn lơgar. Đèng geh sùm dong làng bol khin cha bơcri priă blơi măi mok, ală ding tuh dà tềm pềr, ngui jak chài măi mok tàm broă lơh sa, tơnguh uă cồng nha tơnhào mờ bơta niam bơkah bơh ală bơta phan tam tờm bè kơphê, tiêu, sầu rêng mờ uă bơta phan tam tờm chi sa plai. Chủ tịch Anih duh broă Làng bol sàh Dăk Wil ồng Hoàng Văn Tám đơs:

 "Sàh jờng rơ uă ngan bơta tă pơgồp bơh gah ồs đèng dê tàm broă bơcri priă lơh lơh pràn wơl gùng che đèng tàm sàh tiah nhàr lơgar Dăk Wil, tơrmù ƀà bơta ngài đah ƀòn lơgar sàh mờ ală tiah nhàr. Gùng che ồs đèng gàr niam pờ đèng kơ̆ kơl jăp ai lơh sa mờ rài kis pah ngai in, tam gơl mut mat ƀòn lơgar, lơh geh ală bơta ai sàh in lơh ală gùng che đèng sòl àng, làng bol lòt rê ƀuơn ngan, gàr niam lơngăp lơngai lòt rê tàm gùng, sền gàr lơngăp lơngai, rơndăp tăp sèng, rcang lài kơryan cau lơh tìs”.

Ală gùng che đèng ờ mìng drơng jơnau kờñ ngui pah ngai, lơh sa bơh làng bol dê lơm, mờ gam gàr niam broă pờ đèng ală tiah làng bol ơm kis tơrgùm bal, ală pôs đồng ling sền gàr tiah nhàr lơgar mờ mpồl ling gam ngai mang lơh kơnòl broă sền gàr tiah nhàr lơgar. Is ồn, ală rơndăp broă lơh kơ̆ kơl jăp làng bol ơm kis tiah nhàr lơgar là gùng dà broă lơh dờng bơh Dà lơgar dê; tàm hơ̆, phan bơna bơt bơtàu ồs đèng geh gĭt nền là dùl tàm ală jơnau tờm ngan nàng làng bol in kơ̆ anih ơm, bơtàu tơnguh lơh sa.