Pơgăp mờ do 4 nam, hìu bơnhă bi K’Thị Nam ơm tàm thôn 2 geh Mpồl Tam klăc cau ùr sàh Đông Giang dong kờl càn 50 tơlak đong bơh Anih priă jền Chính sách xã hội Hàm Thuận Bắc nàng bơcri priă tam uă tờm sầu riêng mờ ròng kơn rồ. Tus tŭ do, broă lơh lơh sa bơh hìu bơnhă bi Nam dê neh lơh geh cồng nha, priă lơh geh hời rơ hời geh tam gơl, den tàng rài kis hìu bơnhă ngai sơlơ kơ̆ kơl jăp rlau tai.

“Hìu bơnhă añ geh càn priă gah mpồl cau ùr 50 tơlak đong nàng bơtàu tơnguh tờm sầu riêng, ròng kơn rồ. Tàm hìu kung bơcri priă lơh ală ding tuh dà ai tờm chi in nàng tờm chi in dờng gơs mhar. Añ gŏ cau tam tờm sầu riêng geh cồng nha den tàng añ lùp bơsram jat bal. Bè bơta chài den he lùp bơsram wơl bơh ală cau lơh suơn lài do lơh sầu riêng geh cồng nha, he lơh jat bal”.

Bal mờ hìu bơnhă bi K’Thị Nam gam geh hìu bơnhă bi K’Thị Ẩn, tơnơ̆ tŭ geh càn priă, bi Ẩn neh khin cha kơl sang mờr 2 lồ tờm điều kra ờ hoan ai geh cồng nha nàng tam gơl tus tam 1 rơbô tờm kơphê mờ 120 tờm sầu riêng. Tŭ do 2 bơta chi tam do geh hìu bơnhă bi Ẩn sơng ka sền gàr, gơs niam ngan, pơr gon cèng wơl priă lơh geh ai hìu bơnhă in tàm bàr pe nam tus.

“Hìu añ lài do uă ngan tam tờm điều mơya bàr pe nam do tam tờm điều gŏ ờ geh cồng nha den tàng tam gơl tus tam tờm kơphê, tam sầu riêng pơgăp rlau 1 lồ nggùl, kung kơnờm càn priă tai bơh Anih priă jền Chính sách nàng bơcri priă blơi sơntìl, phơng sih, ding dà..., tŭ do tờm chi gam gơs niam, añ kung lơh ngan sơng ka sền gàr 2 bơta tờm chi do nàng tơnơ̆ do cèng wơl lơh sa ai hìu bơnhă in”.

Mờ rlau 800 nă cau tàm mpồl cau ùr tus bal pơrjum tàm 5 mpồl thôn, ală nam do, nàng dong cau tàm mpồl in gĭt mờ ală priă càn dong kờl ờ sa priă cồng uă nàng bơtàu tơnguh lơh sa, Mpồl Tam klăc cau ùr sàh Đông Giang, càr Lâm Đồng neh pơgồp bal niam mờ Anih priă jền Chính sách- Xã hội Hàm Thuận Bắc, càr Lâm Đồng ai càn ală priă càn ờ sa priă cồng uă, lơh geh ală bơta ai cau tàm mpồl in bơtàu tơnguh lơh sa hìu bơnhă, hời rơ hời tam gơl niam rài kis.

Bi K’Thị Châu ơm tàm sàh Đông Giang, càr Lâm Đồng pà gĭt, kung bơh priă càn bơh Anih priă jền Chính sách – Xã hội, hìu bơnhă bi neh bơcri priă tam tờm sầu riêng mờ tờm kơphê tàm bă ù 1 lồ nggùl. Mơya, tơngai tơnhào kơphê mờ sầu riêng jŏ ir den tàng nàng ai lơyah tơngai ròng jòng tơngai, bi Châu ròng tai kơn rồ, sur, iar, ală bơta phan tam lơyah ngai nàng geh priă jền sùm ai hìu bơnhă in.

Bi K’Thị Châu pà gĭt, nàng phan tam in dờng gơs niam tàm tơngai trồ tơngai duh bè nam do, bi khin cha bơcri priă lơh ding dà tuh dà is, tềm pềr geh dà tuh ai phan tam in, tơrmù ƀà ngai lơh broă, mơkung gàr niam phan tam geh tuh tơl dà nàng dờng gơs mhar, cèng wơl cồng nha lơh sa uă.

“Añ geh càn Anih priă jền Chính sách- xã hội bơcri priă tam kơphê mờ sầu riêng. Nàng geh dà tuh, hìu bơnhă añ bơcri priă rlau 200 tơlak đong, bal mờ tờ tơnau dà crăp ding, lơh bét, den hơ̆ sồng tam tờm chi. Ală tờm chi do jŏ ngan ai tơnhào, den tàng añ pal tam khoah, tam tơngời, ròng sur, ròng kơnrồ nàng geh tai priă jền ngui pah ngai, priă jền nàng blơi phơng sih, sơnơm ai ală tờm kơphê, tờm sầu riêng in”.

Ngan ngồn pà gŏ, ală nam do, priă càn Chính sách neh dong uă hìu bơnhă làng bol jơi bơtiàn dồ ết nă cau sàh tiah kơh bơnơm Đông Giang in geh ală priă jền nàng bơcri priă bơtàu tơnguh lơh sa, tơnguh priă lơh geh mờ lơh geh broă lơh kơnhăp kơ̆. Ngan là ală hìu bơnhă rƀah, hìu bơnhă pa lik klàs rƀah mờ ală cau dờp bơta dong kờl mpồl bơtiàn dê neh hời rơ hời bè ờs wơl rài kis, brồ guh lik klàs rƀah kơnhăp kơ̆.

Mò K’Thị MHảo, Chủ tịch Mpồl Tam klăc cau ùr sàh Đông Giang, càr Lâm Đồng pà gĭt, tus tŭ do, priă càn mờ Mpồl gam atbồ bồ pơgăp 12 tơmàn đong, mờ 350 nă cau tàm mpồl càn. Tơnơ̆ tŭ cau tàm mpồl geh càn priă, Mpồl neh sồr ală Mpồl pơgồp bal mờ ală thôn lơh pràn mblàng yal, bơto pơlam cau tàm mpồl in ngui priă càn geh cồng, di jơnau kờñ.

“Tàm tơngai pa do, bàr pe nă cau tàm mpồl rcang lài càn priă mờ tam gơl phan tam. Bơdìh mờ phan tam tờm là tờm điều, cau tàm mpồl kung rcang tam gơl bơh tờm điều tus tờm kơphê, tờm sầu riêng mờ tŭ do broă lơh do bơtàu tơnguh niam, cèng wơl cồng nha tam gơl lơh sa ai hìu bơnhă in. Uă cau tàm mpồl gĭt ngui jak chài măi mok tàm broă lơh sa, ală hìu bơnhă neh khin cha bơcri priă lơh ală ding dà tuh dà pa ngan nàng tơrmù ƀà dà kơl hề lơh broă mờ tơngai tuh dà tơngai pa den tàng phan tam dờng gơs mhar rlau”.

Tus tŭ do, rài kis bơh uă cau tàm mpồl cau ùr dờp lèng priă càn dong kờl ờ sa priă cồng uă bơh Anih priă jền Chính sách- xã hội Hàm Thuận Bắc, càr Lâm Đồng ngai sơlơ bơtàu tơnguh. Bơh priă ai càn do ờ mìng dong oh mi lơh geh broă lơh, tơnguh priă lơh geh ai hìu bơnhă in lơm mờ gam pơgồp bơnah lơh tam gơl bơta gĭt wă bơh cau ùr jơi bơtiàn dồ ết nă cau tiah kơh bơnơm Đông Giang, càr Lâm Đồng dê tàm bơtàu tơnguh lơh sa, bơt bơtàu ƀòn lơgar pa.