Ƀòn K’La, xã Đray Sáp kung barah barài bè gĭt nđờ ƀòn lơgar kòn cau Rơdê tàm càr Dăk Lăk sơl, mờ gùng lòt ƀòn lơgar pa mờ ală suơn kơphê tŭ gŏ tŭ ờ ală hìu rơng. Mơya mut tàm dơlam ƀòn K’La là bơta krơi is ngan mờ dùl nơm hìu măi lơh gơlik kơphê ngai mho gơ rề bơta ƀô bơkah uă ngan. Hơ̆ là hìu măi bơh Kông ty tă pơgồp bal Êđê Café.

Y Pôt Niê – cau crơng gơs mờ là Cau lam bồ đơng lam bơh kông ty dê kung gam ơm tàm do sơl. Bi ngui ală măi chàng, măi, khum rơwah, mờ tê lơh jài- sơndồi đơs jài, bơceh lơh tơngume sồ bè jơnau yal mpồl cau lơh broă he dê ngui măi mok pa ngan nàng lơh gơlik ală bơta kơphê niam bơkah.

Tơnơ̆ 4 nam sơnđờm mut lơh broă, bơh dùl nă ƀák sĩ wơl rê wơl mờ broă lơh kơphê, Y Pôt Niê neh sơrlèt uă kal ke bè kơryan dà đơs, bè bơta ờ tơl priă jền mờ mờng chài. Bi đơs, añ bơtoah ngan tŭ bơh sơnrờp neh sền dờng màng bơta bơnĕ bơnài bal đah niam chài mờ kă bro phan. Phan bơna “Kơphê nhŭ” bal mờ jơnau yal bè bơnhă ồs sing mờ lòng, chèng gang, mpal ƀŏ mờ mpàng tê tơryang tơryồng bơh ală mè tàm ƀòn K’La dê tŭ lơh gơlik geh kơphê do, neh dong bi jòi gŏ uă năc mờ jơh bal cau lơh broă bal tai:“Añ bơtoah ngan tŭ pa sơnđờm mut lơh broă, phan bơna tờm sơnrờp, neh cèng tus ală cau geh bal bơta kờñ bè añ. Khi neh hòi điện thoại sồr geh lòt bal. Bơh hơ̆ să tờm añ neh rơndăp tăp sèng geh cau lơh broă tàm kông ty. Cau den drơng broă phan lơh geh, cau den drơng broă chàng, măi. Ai să tờm añ là cau lòt jòi, lòt hòi jà kă bro phan tàm ală càr, tus bal ală drà mờ is ồn rlau tai là lòt hòi jà kă bro tàm lơgar ndai”.

Kơryan bè dà đơs geh bơsong mờ lơh ngan bơsram sră sùm, tŭ do Y Pốt Niê neh geh tơl pin dờn tàm ală dơ̆ lòt ală lơgar: Thái Lan, Nhờk, Đức, Canada. Ƀòn K’La ờ hoan geh cau mờ ơm ngài mờ tiah tờm Ƀuôn Ma Thuột, kung ờ lơh kal ke geh sơl Êđê Café, tài bơh phan bơna bơh kông ty dê geh tăc tàm gùt jơh ală drà kă bro phan điện tử. Bal mờ ală cau kra tàm ƀòn K’La tŭ do kung gĭt bè broă lơh pa bơh Êđê Café dê, gŏ geh bơta niam, bơta jak chài bơh rơnàng kơnòm să dê. Ồng bàp Băm, 64 sơnam, prơ ngan: "Khai jak ngan. Kơphê gar pĭc dum khai gĭt, pĭc lir khai gĭt, pĭc mơda khai kung gĭt sơl. Dilah mờ kơphê he pĭc dum jơh lơm den khai blơi giă kas rlau. Kơphê pĭc lir den giă ờ hoan uă, mơya kung ờ hoan lơyah ir bè đại lý ờ. Dilah đại lý blơi 135 rơbô đong den tàm do khai blơi bơh 136 rơbô tus 137 rơbô đông”.

Sơr lèt gan kal ke, priă lơh geh, priă cồng geh tam gơl pah nam, Y Pôt gŏ chờ hờp ngan tài bơh ală lơh ngan bơh he dê neh cèng wơl bơta kwơ kơ̆ kơl jăp ai ƀòn lơgar in.

Ală ngai lồi nam 2024, Y Pôt Niê neh tus bal pơrjum cau yal jơnau pờ tơlik tàm internet Đoàn Dà lơgar bè “gĭt wă, lơh broă bơh ơruh pơnu dê bè rài pa mờ gơnoar broă, kơnòl broă bơh rơnàng kơnòm să dê”, Y Pôt Niê sơlơ pin dờn là ală bơta kwơ mờ he ntoăt jat rơ̆p ai broă lơh kơphê, ai ƀòn lơgar mờ rơnàng kơnòm să tus mờ ală cồng nha pa: "Să tờm añ kờñ lơh geh bơta gơ kờñ nàng ală kơnòm dềt mờ ală cau lơh broă pa in bè tơnơ̆ do là broă lơh kơphê bơh he dê là nàng gŏ geh bơta kwơ bơh broă lơh sa suơn sre, bơta kwơ bơh ƀòn lơgar, nàng ai ală bơyô kơnòm să làng bol jơi bơtiàn dồ ết nă cau in geh bơta tam gơl bồ tơngoh kơlôi sơnơng, lơh niam rlau tai, bơtàu tơnguh broă lơh sa suơn sre tàm ƀòn lơgar ngai sơlơ pràn kơl dang kơ̆ kơl jăp rlau tai”.