Kờp tus bồ nam 2025, bă ù tam prìt tàm càr Gia Lai geh 7 rơbô 300 lồ, khà lơh geh pơgăp 237 rơbô tấn. Kông ty Pơgồp bal Broă lơh sa suơn sre măi mok pa Hưng Sơn gam tam rlau 550 lồ prìt tàm ală kơnhoàl Đăk Đoa mờ Chư Prông, càr Gia Lai. Pah nam, kông ty tăc mờ lơgar ndai pơgăp 20 rơbô tấn prìt tus ală drà kă bro dờng bè Nhờk mờ Hàn Quốc. Kờp dŭ, khà lơh geh nam do mờ nam tus rơ̆p gơguh tus 35 rơbô tấn. Ồng Nguyễn Quang Anh, Củ tịc Mpồl duh broă atbồ kông ty, pà gĭt, kơnờm ngui ală ding tuh dà ntờc măi mok lơgar Israel dê, ngui drone sền gàr tu kòp lơh aniai mờ ală anih mrềt ơn prap, phan bơna prìt bơh kông ty dê neh lơh niam nùs ală drà kă bro kal ke ngan. Ồng Nguyễn Quang Anh, đơs:“Ù tiah pơrhê bazan gơ dờp ngan mờ tờm prìt, tờm prìt cèng wơl cồng nha uă ngan, dilah cèng wơl cồng nha uă den pal geh ală broă lơh, ală broă lơh geh ngan, pal lơh kràñ ngan, pal sŏk sền geh kòp lơh aniai, bơta bơtàu tơnguh bơh tờm prìt dê. Tŭ do bol añ gam tăc tus lơgar Hàn Quốc, Nhờk, Lo mờ Trung Đông. Mìng is 4 drà kă bro do kung gam ờ tơl phan bơna nàng tăc mờ lơgar ndai”.

Jơh gùt càr Gia Lai tŭ do neh gơ hòi gơ jà geh 50 rơndăp broă lơh tam phan mờ bơta ơnàng rlau 8 rơbô 500 lồ, kờp jơh priă bơcri lơh rlau 10 tơmàn đong. Tàm hơ̆, Tập đoàn Hoàng Anh Gia Lai neh jơh nùs tus bal bơtàu tơnguh ală bơta kwơ bơh tờm chi sa plai dê. Tŭ do Tập đoàn gam tam uă tàm tiah tam prìt pơgăp 7 rơbô lồ tàm Gia Lai, Lào mờ Campuchia. Ồng Nguyễn Ngọc Mai, Kwang Lam bồ Kông ty Pơgồp bal Ròng phan Gia Lai (Gơwèt Tập đoàn Hoàng Anh Gia Lai) pà gĭt, mờ ù tiah gơ dờp, prìt bơh kông ty dê geh bơta bơkah niam ngan:“Tiah tam prìt ƀòn gia Nam Mỹ bơh kông ty gơwèt ù tiah bazan geh bơta jơnhoa pơndrờm mờ mat dà lềng là 800 thơk bè hơ̆ lơh geh ală bơta gơ dờp ai tờm prìt ƀòn gia Nam Mỹ in. Tài ală bơta jơnhoa mờ tơngai sơnam jŏ den tàng bơta bơkah niam tờm prìt dê pơndrờm mờ ală tiah ndai là uă rlau”.

Tŭ do, phan bơna prìt bơh Gia Lai dê tŭ neh geh mat tàm uă drà kal ke bè Nhờk, Hàn Quốc, Trung Đông... pà gŏ bơta pràn tàm pơrlòng mờ bơta niam lơh geh ală jơnau kờñ ală lơgar dê. Mò Đào Thị Thu Nguyệt, Phó Kwang làm bồ Sờk Broă lơh sa mờ măi mok mờ Kă bro phan càr Gia Lai, đơs nền: “Gơwèt mờ phan bơna prìt tŭ do dê gam hời rơ hời đơs nền bơta bơkah niam mờ mat kă bro prìt bơh Tây Nguyên đơs bal mờ Gia Lai đơs is. Tŭ do, drà kă bro bơh Gia Lai dê kung sơnđờm bơtàu tơnguh phan bơna prìt, jòi tai ală lơgar tăc phan mờ lơgar ndai nàng rề ơnàng, jòi drà kă bro phan”.

Mờ bơta ƀuơn ù tiah geh is mờ pơlam gùng dà bơtàu tơnguh broă lơh sa suơn sre măi mok pa, tờm prìt gam hời rơ hời đơs nền bơngă là phan bơna lơh geh bơh lơh sa suơn sre tăc phan mờ lơgar ndai kwơ màng bơh Gia Lai dê. Broă bơcri priă bơt bơtàu phan bơna prap gàr, pờ ơnàng anih lơh bal mờ tơnguh uă bơta pràn tăc tàm ală drà kă bro kal ke rơ̆p là bơta kwơ màng dong gah tam prìt bơtàu tơnguh kơ̆ kơl jăp jŏ jòng, tă pơgồp jơh nùs tàm gơguh lơh sa broă lơh sa suơn sre, bơtàu tơnguh ƀòn lơgar tàm tiah do dê.