Tàm gùl ƀùi drim, hìu niam chài Ƀòn drà Cao Thắng, sơnah ƀòn Ea Kao gal ngan làng bol tus lơh sră ù tiah, hộ tịc, sră pơ àr tiah ơm kis. Ờ gam bơta làng bol pal lòt uă tiah, kơ̆p uă ngai bè lài do tai, kwang bàng sơnah ƀòn cèng jơh bal mpồl lơh broă “dùl mpồng” mù tơn tàm tiah làng bol ơm kis nàng drơng broă làng bol. 

Ồng Lương Đình Trường, làng bol ƀòn drà Cao Thắng pà gĭt, uă nam do làng bol kơlôi rcang ngan tŭ tus tàm anih lơh broă sră pơ àr gơnoar atbồ tài bơh ngài, ờ gĭt lùp cau lơi tai. Tŭ do kwang bàng rê tus tơn tàm tiah do bơto pơlam tơl broă lơh den tàng cau lơi kung brơn brài lơm:

“Làng bol brơn brài ngan, chờ hờp mờ làng bol tus tàm do gal ngan nàng bơsong sră pơ àr gơnoar atbồ. Kwang bàng rềp làng bol, mblàng yal bơto pơlam loh làng, bơta do di ngan mờ gùng dà broă lơh bơh Đảng mờ Dà lơgar dê”.

Mò Đỗ Thị Nguyệt, Phó Kwang Lam bồ Anih tờm Drơng broă Sră pơ àr gơnoar atbồ dà lơgar sơnah ƀòn Ea Kao, mìng tàm ƀùi drim sơn rờp lam lơh tàm tiah làng bol ơm kis neh geh 170 nă cau tus lơh sră pơ àr, sơr lèt uă ngan mờ jơnau kờp dŭ geh ai bơh sơn rờp.

“Gơwèt mờ tơngleh kwơ màng lòt lơh broă sră pơ àr gơnoar atbồ dà lơgar den jơnau kờñ bơh Anih duh broă Làng bol sơnah ƀòn dê là lơh ngan bơsong tàm pơgăp 7 ngai mờ gơwèt mờ sră nggal ƀuơn den rơ̆p dờp wơl cồng nha bơsong tàm ngai tơn”.

Tơnơ̆ 1 poh lơh broă gơnoar atbồ ƀòn lơgar 2 kấp, tàm Ea Kao, bơta làng bol gơ lơh loh ngan rlau jơh ờ mìng là sră pơ àr mhar lơm mờ gam là gơnoar atbồ rềp làng bol rlau, rcang lài rlau.

Lòt tàm gùng bê tông jòng 600 thơk pa lơh sir tàm ƀòn drà 5 dê, ồng Dương Lê Sơn ờ mpồn geh bơta chờ hờp. Sùm rlau 50 nam, gơl gùng do kung gam là gùng ù. Uă dơ̆ lòt pơrjum hòi jà làng bol pờ gùng ndrờm ờ geh cồng nha. Mơya mìng tơnơ̆ bàr pe nhai lơh jat gơnoar atbồ pa, làng bol neh ring bal pà is rlau 200 thơk vuông ù mờ tă pơgồp mờr 200 tơlak đong nàng lơh gùng lòt.

“Gơnoar atbồ 2 kấp den ngăc ngar mờ nhăp nhar rlau, dong kờl làng bol tàm bơtàu tơnguh lơh broă sa kung bè gùng lòt rê. Jơh gùt làng bol tam klăc, jơh tơl nă cau tàm sơm bat tê bal gĭt wă là he lơh gùng lòt den niam ngan den tàng làng bol lơh jat jơh nùs ngan”.

Bơh ală broă lơh pơn rơ bè hơ̆, sơnah ƀòn Ea Kao lam lơh srơh “Broă dà lơgar, broă ƀòn lơgar, ù tiah biàng kung pà is sơl” nàng pờ ơnàng gùng lòt rê, bơka niam tiah drà mờ bơtàu tơnguh lòt nhơl. Lơh jat gùng dà broă lơh do, uă hìu bơnhă bal mờ hìu Yàng Phờk Phổ Hiền đơs là, broă pà is ù ờ mìng nàng pờ gùng lơm mờ gam pờ geh ù tiah ơm kis pa ai làng bol in tai.

“Nàng lơh geh dùl tiah drà lòt jơng bè hơ̆ là niam ngan ai broă tàp pràn să jan ai ală cau kra in, cau jat Yàng Phờk in. Añ ơm tàm hìu Yàng Phờk Phổ Hiền chờ hờp ngan nàng ai broă lơh bơt bơtàu do geh lơh geh cồng nha niam bơnĕ lài mờ nam 2030”.

Ờ mìng là phan bơna bơt bơtàu tam gơl, bơta lơngap lơngai rơndăp tăp sèng tàm kấp hơ đơm kung tam gơl loh làng. Bi Hồ Hậu, cau tờm dùl homestay tàm sơnah ƀòn Ea Kao pà gĭt, uă dơ̆ broă geh mpồl kwang àng bơsong mhar ngan kơnờm jat tàm ù tiah do dê.

“Lơngăp lơngai rơndăp tăp sèng niam rlau uă ngan; pơn yơu añ geh dùl homestray tàm gùng Nguyễn Trường Tộ, tàm ƀùi mho hơ̆ gơtìp cau kơñau den pờ wơl camera pơyoa ai kwang àng in. Drim ngai tơnơ̆ añ guh tàm kwang àng lơh broă den Lam bồ Kwang àng sơnah ƀòn pà gĭt neh kŭp geh cau kơñau tơn rao”.

Tơnơ̆ tŭ tơmŭt bal, sơnah ƀòn Ea Kao neh bơsong rlau 2 rơbô sră pơ àr gơnoar atbồ dà lơgar mờ khà di mờ lài mờ tơngai pơrgon lơh geh 100%; sră nggal pơyoa tàm internet lơh geh mờr 99%; khà niam nùs bơh làng bol mờ mpồl lơh sa kă bro dê lơh geh ngan ngồn. Uă broă jàu lơh sa- mpồl bơtiàn lơh sir sơr lèt gan broă rơndăp lơh, tàm hơ̆ lùp priă dia sơr lèt rlau 107% broă rơndăp lơh càr dê jàu.

Ồng Đặng Gia Duẩn, Ƀí thư Anih duh broă Đơng lam Đảng sơnah ƀòn Ea Kao pà gĭt, cồng nha dờng ngan rlau jơh tơnơ̆ 1 nam lơh broă pa là lơh geh bơta ring bal tàm Làng bol mờ bơta ring bal tàm mpồl kwang bàng.

“Broă dờng màng ngan rlau jơh là bol añ lơh jat tơngume ring bal làng bol, kwang bàng dùl nùs bal sùm jơh tơngai lơh broă bơh nam 2025-2030. Bol añ kung neh ai lơh jat Jơnau lơh nền tàm pơrjum tam gơl pràn bè tam gơl pa sră pơ àr gơnoar atbồ mờ tam gơl sồ, bè lòt nhơl pơgồp bal kă bro phan drơng broă mờ rơndăp ù tiah. Tàm tơngai tus bơdìh mờ broă lơh jat ală Jơnau lơh nền tàm pơrjum kwơ màng bol añ rơ̆p tơrgùm uă ngan tàm broă tơnguh tai 2 nơm khà”.

Dùl nam ờ hềt di là tŭ tơngai jòng, mơya bơh ală gùng lòt geh pờ ơnàng, ală sră nggal geh bơsong mơ tơn tàm tiah làng bol ơm kis tus bơta rcang lài bơh gơnoar atbồ ƀòn lơgar dê.. broă lơh gơnoar atbồ ƀòn lơgar 2 kấp tàm Ea Kao gam pà gŏ bơta tàm ntrờn loh làng bơh dùl broă lơh sră pơ àr gơnoar atbồ rềp làng, mềr mờ làng bol mờ drơng broă làng bol ngan ngồn rlau tai.