Tàm hìu niam chài ƀòn Mduk, sơnah ƀòn Ea Kao, càr Dăk Lăk, gĭt nđờ jơ̆t nă làng bol tơl sơnam sền ngăc ngan tàm điện thọai, geh ală bơyô đoàn viên – mơkung là cau tàm mpồl măi mok sồ mpồl bơtiàn- jơh nùs bơto pơlam broă cih mat tàm VNeID. Tơnơ̆ tŭ lơh jơh, tơl nă cau lơh is, cih ală jơnau bơh tàm sră pơ àr dồ nă să dê tơmut tàm phan ngui măi mok. Mò H’Mai Mlô, dùl nă làng bol tàm ƀòn pà gĭt: “Lài do ờ hềt geh ală sau bơto pơlam den kung kơlôi ngan sơl, tài bơh he ờ gĭt bơta lơi, mờ hŭi sùm. Tŭ do kung cih geh jơnau tàm do rao. Ờ hềt mờng ngan, mơya he gam bơsram rơ hời sơl”.

 Ală dơ̆ “bơsram sồ” bè do neh gơ gơs mờng kwèng tàm uă sơnah ƀòn, sàh bơh càr Dăk Lăk dê, kờp bơh tŭ càr lam lơh 100 ngai lơh uă srơh “Jơh gùt làng bol bơsram sồ” bơh nggùl nhai 7. Rlau 2 rơbô mpồl măi mok sồ mpồl bơtiàn neh geh tơnggơs, mờ rlau 3 rơbô 500 nă kwang bàng, đoàn viên, cau dong kờl is kơnòm să crăp rcang “teh tơl mpồng hìu”, “ià tê sơñio broă”, dong làng bol lơh kwèng mờ măi mok.

 Ờ mìng ơm wơl tàm broă “tơn jơh bơta ờ gĭt” broă lơh bơh sơn rờp lơm, ală mpồl măi mok mpồl bơtiàn gam pờ geh ală “gah bơsram sồ” tàm hìu niam chài thôn, ƀòn halà tàm anih tờm drơng broă sră pơ àr gơnoar atbồ Dà lơgar sàh dê. Làng bol ià điện thoại tus, geh bơto pơlam crăp mờ ngui ală phan ngui sră pơ àr gơnoar atbồ Dà lơgar, sền gĭt jơnau yal ù tiah, tong priă dia điện tử, tơm priă ờ duh pal geh priă mat. Bi Y Sion Knul, Ƀí thư Đoàn Ơruh pơnu sàh Ea Na, càr Dăk Lăk, pà gĭt: “Gơrềng tus broă tơmŭt bal, làng bol kơlôi ngan tŭ lơh sră pơ àr gơnoar atbồ, sră nggal, sră pơ àr. Bol añ dong kờl làng bol tàm jơh ală broă do, bơh tong sră nggal bơh drơng broă Dà lơgar tus ngui VNeID bơh Ƀộ Kwang àng dê. Is ồn gơwèt mờ làng bol jơi bơtiàn dồ ết nă cau, broă lơh do geh tàm bơrlŭ bal, lơh sùm, nàng tơrmù ƀà tŭ tơngai lòt rê ai làng bol in”.

Lòt bal mờ mpồl dong kờl is, uă mpồl lơh sa kă bro viễn thông dờng kung pơgồp dà kơl hề ai srơh “Jơh gùt làng bol bơsram sồ”. Ală tiah bơsram geh dong kờl phan bơna  măi mok, gùng pờ internet, phan ngui AI ƀuơn ngan, ƀuơn ngui, dong làng bol sền gĭt mờ lơh mhar rlau. Ồng Nguyễn Văn Thản, Phó Kwang Lam bồ VNPT Dăk Lăk, pà gĭt: “Bol añ neh ai kwang bàng tus bal ală mpồl măi mok mpồl bơtiàn tàm sơnah ƀòn, sàh, thôn, ƀòn, sơnah ƀòn. Bal mờ gơnoar atbồ ƀòn lơgar, bol añ pờ ală ơdŭ bơto pơlam bơta chài sồ ai kwang bàng, kông cứk, viên cứk in, nàng bơto bơtê wơl ai làng bol mờ mpồl lơh sa kă bro in. Jơnau kờñ là nàng tơl nă làng bol in ndrờm gơtùi gĭt, wă mờ ngui ală măi mok sồ tàm rài kis pah ngai”.

 Ồng Bùi Thanh Toàn, Kwang lam bồ Sờh Jak chài mờ Măi mok càr Dăk Lăk pà gĭt: 100 ngai tơrgùm lơh srơh “Jơh gùt làng bol bơsram sồ” là broă lơh bơh sơn rờp nàng tam gơl sồ gơ gơs bơta mờng kwèng pah ngai bơh tơl nă làng bol dê. Tŭ neh gĭt sền gĭt, gĭt ngui, gĭt lơh broă tàm internet, den tơl broă lơh, drơng broă Dà lơgar pa ngan ngồn tus geh tơn mờ làng bol, nàng ờ geh cau lơi gơtìp lời wơl bơh ngkời:“Bol añ neh tam cah ală mpồl cau mờ lam lơh broă lơh 100 ngai lơh uă. Jơnau kờñ là rcang ai làng bol in bơta chài, bơta gĭt wă kwơ màng bè tam gơl sồ, ờ mìng tàm tiah anih tờm lơm mờ gam gơrề uă tus làng bol jơi bơtiàn  tiah sar lơgar ngài. Tŭ neh rơ hời mờng ngui, làng bol rơ̆p gĭt ngui ală măi mok sồ drơng broă lơh sa, kă bro mờ lơh jat broă drơng broă, sră pơ àr gơnoar atbồ Dà lơgar ƀuơn rlau tai”.

Bơh ală dơ̆ “ià tê sơñio broă” tus jơnau hơ bơh gơnoar atbồ mờ mpồl lơh sa kă bro dê, srơh “Jơh gùt làng bol bơsram sồ” gam dong măi mok ờ mìng là bơta krơi ngan gơwèt mờ tơl nă làng bol. Mờ tơnơ̆ pah ngai, tàm càr Dăk Lăk geh tai uă cau gơ gơs làng bol sồ, bơceh lơh lơh geh dùl mpồl bơtiàn sồ tơl làm, niam mờ geh cồng nha. Do là bơnàng jă kwơ màng nàng càr in lơh geh gơnoar atbồ sồ, mpồl bơtiàn sồ, lơh sa sồ.