Ƀùi drim tàm ƀlàng bràs dà lềng Nha Trang, ală sèng bràs rơmĭt neh rê wơl mờ bơta niam bè ờs mờng kwèng ngan. Tơl mpồl năc lòt nhơl lòt jơng tàm bơta càl lơngơm  dà lềng, muh mat chờ hờp. Ală chă uă dà lĭp rơ lir ơn tàm ƀàng bràs dà lềng, săp đơs hô hơng kơnòm dềt dê nhơl nhiŏ, ntas nsừc dà lềng ndrờm ngan bè gùng tă nhơm kis pràn wơl tơnơ̆ dơ̆ mìu dờng dà tih dà lìu kah yau.

Ồng Trần Văn Tân ơm tàm sơnah ƀòn Nha Trang pà gĭt, mìng bàr pe ngai lài, tiah do sơrlồng sơrlàng sồ siă bơh dà tih dê pơr dô bơh dà dờng Cái gơ mù tàm do. Tờm chi pă, plai lơ  u ro, khàr đùh, phan lơh ka tàm bơrlŭ bal mờ bŏ ù gơ gơs gơnru jòng gĭt nđờ kơi sồ. Gĭt nđờ rơhiang nă cau lơh phan tiah ơm kis bal mờ ală mpồl lơh sa kă bro lòt nhơl mờ mpồl cau tàm tiah do, khòm tơrgùm ngai mang. Ồng Tân gŏ hừh nùs ngan tài bơh tơnơ̆ gĭt nđờ dà kơl hề tuh tơlik, dà lềng neh sàng goh, niam wơl tàm bơta chờ hờp bơh jơh làng bol mờ năc lòt  nhơl dê: “Tơl nă cau tă pơgồp bal 1 tê, cau lơgar ndai kung tus dong kờl bal. Mìng 2, 3 ngai neh lơh sàng goh blàng bràs dà lềng. Tŭ do dà lềng kung tơlir niam wơl. Tŭ do gŏ bè hơ̆ chờ hờp ngan”.

Ờ mìng wàs sàng goh dà lềng lơm, gah lòt nhơl Khánh Hoà tàm ală ngai mìu dờng dà kŏ dà lìu kung ai jơh bơta pràn tài mpồl bơtiàn dê. Gĭt nđờ nơm kanô, moto dà, plung bơh ală mpồl lơh sa kă bro dê geh hòi jà tơrgùm dong kờl làng bol tiah gơtìp ngơr bam dà. Tŭ dà tih hoàc soăt, ală mpồl lơh broă pơn jat tai trŭ gơm gĭt nđờ rơbô bơnah phan sa, pà phan ngui sa pah ngai, pà phe, ào mpha, pơgồp bơnah sền gròi gàr niam rài kis ai làng bol in.

Tus tŭ do, jơh ală tih lòt nhơl kềng gah dà dờng Cái neh pờ mpồng wơl tơnơ̆ ală ngai ơm ing. Ồng Nguyễn Văn Hòa, Kwang lam bồ Sờh Niam chài- Tàp pràn să jan mờ Lòt nhơl càr Khánh Hoà pà gĭt:“Năc lòt nhơl tus sền, ơm rlô să neh gal ngan rao. Bè đah gah niam chài rơ̆p hòi jà, dong kờl ală mpồl bơtiàn bơcri priă lơh pờ ơnàng ală phan bơna pa gơ hòi gơ jà năc lòt  nhơl. Gah do kung rơ̆p bơyai lơh ală broă lơh cèng bơta ală lơgar nàng gơ hòi gơ jà năc tus mờ càr Khánh Hoà tàm tơngai lồi nam”.

Ồng Nghiêm Xuân Thành, Ƀí thư Tỉñ ủy càr Khánh Hòa, pà gĭt: Lòt nhơl geh uă ngan tàm rơndăp tăp sèng drơng broă bơh càr Khánh Hoà dê, geh sền là “phan dŭi’ dong bơtàu tơnguh wơl lơh sa mhar ngan rlau jơh. Ồng sồr: “Trồ tơngai neh niam, năc lòt nhơl gam lòt tus. Den tàng, pal mhar ngan lam lơh gơ hòi gơ jà lòt nhơl lơngăp lơngai. Gah lòt nhơl rơ̆p gơrềng tus ală mpồl lơh sa kă bro, lơh gơlik phan mờ kă bro phan, gơrềng tus kes priă dà lơgar, lơh geh broă lơh, den tàng gah lòt nhơl là pal lơh mơ tơn”.