Klau pơgru Kpă Pual pà gĭt, bơta bơtoah ngan nàng gơ gơs “cau gĭt wă jrô broă lơh” tàm gah kơlôi sơnơng dà đơs kòn cau Jrai dê là tàm nam 2008, Hìu bơsram Đại họk Tây Nguyên mờ gah broă Bơto bơtê kấp 1 jơnau đơs dà kòn cau Jrai. Do là broă pa, cèng bơta krơi is, ờ geh cau pơgru. Klau pơgru Kpă Pual geh Sở Bơto bơtê mờ Bơsram càr Gia Lai yal tơngĭt lơh cau pơgru bơto ai Hìu bơsram Đại họk Tây Nguyên in; bơto bơtê cau pơgru ai hìu bơsram in jài mờ bơto bơtê ai cau bơsram in tai. Tơnơ̆ hơ̆ ồng geh Ƀộ Bơto bơtê mờ Bơsram jà tus bal cih sră bơsram dà kòn cau Jrai bơh ơdŭ 1 tus ơdŭ 5. Bal mờ hơ̆, Viện Kơlôi sơnơng Bơto bơtê (Ƀộ Bơto bơtê mờ Bơsram) jà tus bal kơlôi sơnơng, cih sră bơto bơtê 2 dà jat tàm ală jơnau đơs mè deh dê (là dà kòn cau Jrai) Sră drơng broă lơh gàr niam cồng nha bơto bơtê hìu bơsram (SEQAP)….Klau pơgru Kpă Pual đơs:“Să tờm añ den bơsram gah Toán, mơya añ gŏ jơnau đơs dà kòn cau Jrai he dê kung gam ết ngan cau kơlôi sơnơng jòi gĭt jrô, bơh hơ̆ añ kung jòi gĭt is, jòi tơrgùm nàng prap gàr mờ jơnau kờñ là nàng bơto bơtê wơl ai rơnàng tơnơ̆ do in. Añ gŏ niam chài bơh kòn cau Jrai dê gam uă bơta niam mờ ết ngan cau kờñ jòi gĭt nàng sền gàr. Añ kung kơ̆p kờñ ờ mìng să tờm añ lơm mờ ală cau geh bơta gĭt wă bè dà kòn cau Jrai den kung bal mờ gơ̆p kơlôi sơnơng tơrgùm dùl nàng ờ gŏ gơtìp roh tĕ niam chài bơh yau bơh jơi bơtiàn he dê”.

Deh mờ dờng bơh tàm ƀòn lơgar, ntào dờng tàm tŭ bơsram sră, den tàm tŭ bơto bơtê, kơlôi sơnơng, cih sră, klau pơgru Kpă Pual neh ngui bơta tàm rài kis kòn cau Jrai dê dùl bă mờng kwèng ngan. Is ồn, ală jơnau đơs nrĭ, ală jơnau đơs pơn yơu, jơnau yal khan bơh kòn cau Jrai dê neh geh ồng tơmut tàm sră bơsram, nàng kờñ pơgồp bơnah sền gàr bơhiàn niam chài jơi bơtiàn he dê. Klau pơgru Kpă Pual, đơs tai: “Ală jơnau cih, ală jơnau đơs, jơnau đơs pơn yơu den bol añ cih wơl nàng prap lời wơl, ndrờm bơh bơta geh ngan tàm rài kis bơh làng bol kòn cau Jrai dê lơm. Hơ̆ là ală jơnau đơs geh tơrgùm bơh rài kis tiah ƀòn lơgar, ală jơnau yal khan bơh lài do cèng gơtha bơto bơtê uă ngan. Digơlan là ală jơnau đơs bè broă lơh tàm rài kis pah ngai, bè broă sền gàr broă lơh bơh yau... jơh ală bơta hơ̆ den bol añ cih wơl nàng bơto bơtê wơl ai rơnàng tơnơ̆ do in”.

Kpă Pual uă nam lơh broă tàm gah bơto bơtê mờ tiah kal ke Krông Pa, càr Gia Lai. Bơh sơnrờp mìng tus bal tàm khoă bơh sơnrờp Sư phạm 1 nam neh lòt bơto bơsram, tơnơ̆ geh lòt bơsram Trung kấp Sư phạm tàm càr Kon Tum. Tơnơ̆ tŭ jơh bơsram, rê wơl bơto bơtê tàm ƀòn lơgar geh 3 nam, klau pơgru Kpă Pual dan pơn jat tai lòt bơsram Đại họk bơsram jài lơh broă jài Quy Nhơn. Tàm tŭ lơh broă, ồng geh rlau 10 nam lơh Kwang atbồ hìu bơsram, den lơh Phó Cơldŭ bơto bơtê kơnhoàl Krông Pa, tơnơ̆ tŭ geh ntrờn guh Sở Bơto bơtê mờ Bơsram càr Gia Lai, at gơnoar broă Kwang atbồ Mpồl Bơto bơtê Jơi bơtiàn. Tơnơ̆ hơ̆, klau pơgru Kpă Pual pơn jat tai dan rê mờ ƀòn lơgar, lơh cau pơgru tus ngai ơm rlô lơh broă.

“Ơm rlô jơh sơnam lơh broă mơya ờ rlô broă lơh” tŭ do rê mờ ƀòn lơgar, mơya klau pơgru Kpă Pual kung gam tơryang tơryồng kơlôi sơnơng, tus bal sền sơwì sră bơsram jơnau đơs dà kòn cau Jrai bơh Ƀộ bơto bơtê mờ Bơsram dê, mơkung tus bal bơto bơtê ală khoă bơto bơtê jơnau đơs kòn cau Jrai ai kwang bàng tàm tiah do in. Klau pơgru Kpă Pual đơs:“Broă sền gàr jơnau đơs bơh kòn cau Jrai dê kwơ màng ngan, tàm ală jơnau đơs pơn yơu nàng đơs bè adat bơhiàn halà ală jơnau nting tơngkah cèng bơta bơto bơtê oh kòn kòn sau den kờñ pal ngui mờ dà đơs kòn cau Jrai dê den gơ hơ̆ sồng mblàng yal wơl geh gơtha jrô ơnàng ngan. Tàm tŭ jòi gĭt den bol añ kung neh ngui 2 dà, geh tŭ tàm jơnau đơs dà yoan den kung gŏ mblàng yal loh làng gơtha bơh gơ dê sơl, den tàng pal lời bè ờs mờ dà kòn cau Jrai dê den hơ̆ sồng gơtùi đơs jơh gơtha bơh cau lài do dê kơ̆p kờñ lời wơl”.

Tơryang tơryồng mờ akhar, klau pơgru Kpă Pual là krơh niam bè nùs nhơm kờñ ngan, jơh nùs jơh tồr mblàng yal dà kòn cau Jrai ai rơnàng tơnơ̆ do in.