Lài mờ ngai mut tàm ƀòn dờng Hồ Chí Minh lòt Pơrjum dờng ơruh pơnu pơn rơ gơguh jak lơh jat jơnau bơto Wa Hồ gùt lơgar dơ̆ 8 nam 2025, Kpuih HMin kung gam guh gờñ, lòt tàm suơn kau su nàng bơto wơl bơta chài còr bơsơt kau su dồ bă nền nòn ai mpồl cau lơh broă pa in. Bơta jơh nùs bơh Ƀí thư Ci đoàn dê neh mblàng wơl bơta kờñ gơboh ai ală cau tàm Ci đoàn in. Cau lơh phan kơnòm să Siu Pôp pà git: “Kpuih HMin là cau lơh phan jak, pơlam bol hi bơta chài còr bơsơt kau su geh cồng nha ngan. Bol hi bơsram mờ lơh jat di, ƀuơn ngan. Pơn yơu bi Kpuih HMin pơlam bơta chài còr kơmhò tờm kau su nàng geh uă bơsơt den pal sền ngac tus gùng còr, bañ còr jrô, kung bañ còr hơđang ir; gùng còr dềt mơya bơsơt kau su hòr uă, gàr bơta niam. Bơdìh hơ̆ tai, bi HMin kung bơceh lơh, tơrbŏ nrang chi jòng nàng cau lơh phan in ƀồm sơnơm mờ bong keo rơcang lài kơryan kòp tờm kau su in tàm ală bă tiah kal ke mờ bơh lài ờ hềt lơh gơtùi. HMin là krơh đoàn viên ơruh pơnu lơh sa jak mờ jơh nùs pơlam tơl nă cau in tàm broă lơh”.

Ngac ngar, bơceh lơh tàm broă lơh kung bè broă ơruh pơnu dê, ală tă pơgồp bơh Kpuih HMin dê tàm ală nam do neh geh ală gah broă lơh, ală kâp cih dờp. Pơn rơ là khà jờng “Ơruh pơnu pơn rơ jak lơh jat jơnau bơto Wa Hồ” kâp càr tơngai bơh nam 2023 tus nam 2025; cau ling tàm pơrlòng kâp hơ đơm uă nam sùm. Bi geh Đoàn dà lơgar pà sră jờng nam 2022, geh khà jờng “Mpàng tê chài rơgơi” pơrlòng còr bơsơt gah lơh kau su nam 2024… Kuơmàng, nam do, Kpuih HMin pơn yờ să ngan là cau ala mat tus bal Pơrjum dờng ơruh pơnu pơn rơ jak lơh jat jơnau bơto Wa Hồ gùt lơgar dơ̆ 8. Bi Kpuih HMin yal: “Bơh tŭ mut lơh cau lơh phan, mut tàm Đoàn ơruh pơnu Kộng sản Hồ Chí Minh mờ lơh Ƀí thư Đoàn bơh anih dờng lơh broă sa suơn sre dê. Añ neh bơtòm tơrgùm ơruh pơnu tus bal uă broă lơh geh kuơ, pơn jờng nùs nhơm ngac ngar lơh broă lơh sa. Pơnđơl pràn, pơlam tàp krơh Wa Hồ, añ neh jơh nùs lơh jat jơnau pơlam bơh Kông ty dê tàm broă còr bơsơt kau su, tus bal pơrlòng bơta chài cau lơh phan jak ai geh khà jờng mờ geh sră jờng, să tờm añ chờ hờp ngan mờ pơn yờ să ngan. Là đoàn viên ơruh pơnu, añ rơp pơn jat tai lơh ngan lơh broă jak rlau, bal mờ đoàn viên ơruh pơnu tàm mpồl tam klac bal, ngai sơlơ bơsram, pơnđơl pràn lơh broă bơceh lơh nàng geh uă cồng nha rlau tai”.

Ồng Trần Quang Huấn – kwang bàng mpồl lơh kau su Hòa Bình, Kông ty TNHH MTV Kau su Chư Prông pà git, Kpuih HMin ờ mìng là cau lơh phan geh cồng nha jak ngan tàm broă lơh mờ gam jơh nùs tus bal lam lơh ală broă lơh, ală srơh. Mờ gơnoar broă là Ƀí thư Ci đoàn, bi neh geh uă broă lơh duh hồl mờ ngan ngồn, dong đoàn viên ơruh pơnu tơnguh bơta chài lơh broă, tơnguh cồng nha tơnhàu suơn chi dê, kơnờm bơh hơ̆ geh priă jền lơh geh sùm. Bơdìh mờ dờp ơpah còr bơsơt kau su bơh Kông ty dê, Kpuih HMin gam bơtàu tơnguh lơh sa hìu bơnhă tai. Bi neh prap tềm pềr nàng blơi ù mờ tam geh mờr 1 lồ kơphe. Ồng Trần Quang Huấn pà git: “Kpuih HMin là Ƀí thư Ci đoàn ngac ngar ngan. Là cau kòn cau, rài kis hìu bơnhă kal ke, mơya mờ bơta tryăng tryồng, ờ ngòt bòl glar, Kpuih HMin sùm bơsram, tơnguh bơta chài lơh broă. Tàm lơh broă lơh sa den Kpuih HMin sùm lam lài mờ ai geh uă khà jờng bơh anih dờng lơh broă sa suơn sre, kông ty mờ kâp tập đoàn”.

Mờ bơta kơ̆ dơn, lơh ngan ờ ơm rlô, Kpuih HMin là krơh niam tàm tiah làng bol jơi bơtiàn dồ êt nă cau tàm sàh Ia Vêr, kơnhoàl Chư Prông, càr Gia Lai. Kơp kờñ là, bơh jơnau yal bơh Kpuih HMin dê, rơp geh tai uă ơruh pơnu, ngan là ơruh pơnu jơi bơtiàn dồ êt nă cau brồ guh tàm bơsram sră, lơh broă mờ pơgồp bơnah tàm bơta bơtàu tơnguh bơh ƀòn lơgar, dà lơgar dê.

Bi Đỗ Đức Thanh – Phó Ƀí thư Duh broă sùm Tỉñ đoàn càr Gia Lai pà git, tàm ală nam do, tàm càr neh geh rlau 400 krơh niam ơruh pơnu pơn rơ jak tàm ală gah lơh broă. Tàm hơ̆, geh uă ơruh pơnu tàm ƀòn lơgar, cau jơi bơtiàn dồ êt nă cau pal geh jờng rơ, pơn jờng ngan: “Bol hi neh sac rơ wah geh ală ơruh pơnu pơn rơ jak, geh bồ tơngoh git kơlôi rơcang lơh sa, sơrlèt gan kal ke nàng dong kờl broă lơh sa ală bơyô in. Bơdìh hơ̆ tai, bol hi kung sồr ală kâp ƀộ Đoàn sùm gàr ală broă lơh nàng ngui niam bơta niam chài kòn cau dê. Hơ̆ là pơrlòng niam chài cing mồng, ală anih nhơl ơruh pơnu jơi bơtiàn dồ êt nă cau, ơruh pơnu jat yàng in. Bơh ală broă lơh hơ̆, bol hi neh mblàng ală tơngume bè bơsram mờ lơh jat krơh nùs nhơm, rài kis Hồ Chí Minh”.