Kềng gah ală gùng lòt sàh Đơn Dương, càr Lâm Đồng, lơngơm mrềt ală sre tam biăp, tơlir niam ală suơn bơkào gam tàm kàl tơnhào mờ ală săp ñŏ chờ hờp bơh cau lơh broă sa dê. Mờ rlau 8 rơbô 400 lồ phan tam ală bơta, tàm hơ̆ geh rlau 3 rơbô lồ biăp, bơkào, bơkào ngui măi mok pa bal mờ mpồl kơnrồ dà toh mờr 19 rơbô nơm... neh cèng wơl rài kis hờm ram ai cau lơh broă sa tàm tiah do in. Ồng Nguyễn Tiến Khánh, ơm tàm thôn 1, sàh Đơn Dương, pà gĭt, broă lơh geh ală anih lơh sa bal geh kwơ- tăc bro phan ndơ̆p gơwèt mờ ală phan bơna tờm, bè dà toh, biăp bùm kơnuh plai đo neh sơlơ tơnguh tai broă lơh sa suơn sre kơnhăp jŏ mờ tơnguh tai priă lơh geh ai làng bol in: “Sàh Đơn Dương pơrdờn tơrgùm bal bơh kơnhoàl Đơn Dương lài do dê, is ồn kơnhoàl Đơn Dương lài do là kơnhoàl sơn rờp bơh ală càr tàm tiah Tây Nguyên lơh sir broă lơh ƀòn lơgar pa,muh mat bơh ƀòn lơgar dê bơtàu tơnguh rlau mờ lài do. Rài kis làng bol dê geh bơtàu tơnguh uă, hìu cờn, rơndeh ôtô bè ù tiah añ dê den ờ gam geh hìu bơnhă rƀah tai ờ mờ rlau 7% là hìu bơnhă pas đau mờ pas”.

Bơh ngai 1/07 pa do càr Lâm Đồng mut tàm tơngai bơtàu tơnguh pa mờ bơta ƀuơn bơta pràn pơn rơ ngan mờ ù tiah dờng ơnàng bơh brê tus dà lềng. Càr geh bă ù ơnàng rlau 24 rơbô kơi sồ vuông dờng ngan rlau jơh gùt lơgar mờ broă lơh sa ơm dơ̆ 8. Broă tơmŭt bal 3 càr kung lơh geh tai ai càr Lâm Đồng in uă gah broă lam lài gùt lơgar, bè lơh sa mờ măi mok ƀô xít- alumin- trà mờ ală khà ƀô xít kờp dŭ rlau 5 tơmàn 400 rơbô tấn; phan kwơ lòt nhơl li la uă mờ mat kă bro lòt nhơl Dà lơgar Dà Làc, Kông viên địa cất Dăk Nông geh ală rơgồng bơnơm ồs dờng ngan rlau jơh tiah đah Jum mat tơngai lik câu Á, tơnau dà Tà Dùng bè “Pòt Hạ Long tàm Tây Nguyên”, lòt nhơl dà lềng mờ Phan Thiết- Mũi Né, tiah is ồn Phú Qúy; lơh broă sa suơn sre geh biăp bơkào, biài bơr teh, ka dà mrềt... lam lài gùt lơgar. Ồng Nguyễn Hoài Bão, lài do là Ƀí thư Tỉñ ủy càr, Kwang lam bồ Mpồl Cau ala mat Quôk hội khoă 10 càr Lâm Đồng, pin dờn: “Tŭ do càr Lâm Đồng geh tiah nhàr lơgar, geh dà lềng, bă ù ơnàng tŭ do là lam lài gùt lơgar den tàng geh bơta ƀuơn, bơta pràn dờng ngan. Lâm Đồng pa gĭt wă pa, sền sơnơng pa mờ kwơ màng là jơh ală cau dùl nùs bal. Làng bol pin dờn tàm Đảng mờ bồ tơngoh bơh làng bol Việt Nam dê nàng lơh niam kơnòl broă mờ kơ̆p kờñ Việt Nam tơ bă pơnì bal mờ ală lơgar dờng pràn kơnhoàl ù tiah bè Wa Hồ dê neh bơto”.

Càr Lâm Đồng kung gam bơsong bơta gơ kòl gơwèt mờ dồ ròt rơndăp broă lơh tờm bè gùng lòt rê, tơnhào phan kwơ tàm ù, năng lượng, tiah ơm kis pa... mờ kờp jơh gĭt nđờ jơ̆t rơbô tơmàn đông nàng sơlơ tơnguh tai ai priă bơcri Dà lơgar nàng lơh geh bơta gơn kơnờm ai broă lơh sa bơtàu tơnguh uă.

Ồng Y Thanh Hà Niê Kđăm, Kwang bàng Đảng Dà lơgar, Ƀí thư Tỉñ ủy càr Lâm Đồng, đơs loh:“Sơlơ tơnguh tai gơguh lơh sa gàr niam jơnau kờñ gơguh lơh sa nam 2025 bơh càr Lâm Đồng dê lơh geh rlau 8%. Jơnau sồr bơta geh ngan tŭ do pal gàr niam cồng nha lơh broă bơh kấp he dê, mơkung dong kờl di tŭ ai kấp hơđơm in. Bè ờs tàm dơlam is bơyai lơh mơkung gàr niam broă lơh atbồ jat broă lơh pa, sơlơ tơnguh lơh geh ală bơta nàng ngui bơta ƀuơn ƀuơn bơta pràn bơh càr dê mơya kung geh sùm ală bơta pràn nàng ai tơngai bơtàu tơnguh tơnơ̆ do in”.

Đảng ƀộ, gơnoar atbồ mờ làng bol càr Lâm Đồng gam lơh jat uă ngan nùs nhơm tam klăc, bơceh lơh, jơh nùs bơt bơtàu ƀòn lơgar ngai sơlơ pas niam, niam jak, di pal mờ bơta pin dờn mờ bơta kơ̆p kờñ bơh Đảng mờ Wa Hồ dê.