Sàh Tà Năng, càr Lâm Đồng geh bă ù ơnàng geh is rlau 25 rơbô 800 lồ, khà kờp làng bol mờr 14 rơbô nă cau, tàm hơ̆ làng bol jơi bơtiàn dồ ết nă cau geh mờr 78%. Tơnơ̆ mờr 1 nam lơh broă, tus tŭ do jơh bal Đảng ủy, Anih duh broă Làng bol, Anih duh broă Mặt trận Dà lơgar Việt Nam sàh pa kờp jơh geh 41 nă cau lơh broă mờ gam ờ tơl 21 nă cau lơh broă sa priă nhai tai. Ồng Nguyễn Tiến Điền, Ƀí thư Đảng uỷ sàh Tà Năng, pà gĭt, tàm tŭ mpồl broă uă ir mờ Cơldŭ lơh broă Đảng uỷ sàh mìng geh 2 nă cau lơh broă, Mpồl Bơt bơtàu Đảng 3 nă cau lơh broă, Anih duh broă Sền sơwì 2 nă cau lơh broă, mpồl mặt trận mpồl bal ờ geh cau lơh broă ờs mờng mờ mpồl gơnoar atbồ ờ tơl tus 9 nă cau lơh broă. Neh bè hơ̆ bơta bơsram gĭt wă, bơta pràn jak mpồl lơh broă kwang bàng sàh dê den ờ ring bal:

“Mìng geh 4 nă oh mi lơh broă sùm Ƀí thhư, Phó Ƀí thư lơh broă sùm, Củ tịc mờ 1 Phó Củ tịc là ntrờn bơh kấp càr, kấp kơnhoàl rê, gam wơl ală cau lơh broă là ntrờn bơh 2 sàh tơmŭt bal wơl den tàng bè bơta bơsram gĭt wă, bơta pràn jak ờs mờng bè lơh geh jơnau sồr kơnòl broă dê geh bơta gam ờ hềt pràn. Tài bơh ờ tơl cau lơh broă den tàng bàr pe nă kông cứk pal lơh bal uă ngan broă lơh. Tŭ do dùl nă cau lơh broă ờs mờng pal àñ ơnòng tai broă bơh 4 tus 5 Sờh dê sồr lơh”.

Krơi mờ bơta ờ tơl cau lơh broă tàm sàh kal ke uă ngan Tà Năng, broă kwang bàng kung là bơta lòng mờ ală sơnah ƀòn ƀuơn ngan bơh càr Lâm Đồng dê tơn. Tàm hơ̆, sơnah ƀòn Xuân Hương- Dà Làc, broă lơh kwang bàng kung gam là bơta kơlôi sơnơng dờng ngan rlau jơh. Mò Ngô Thị Mỹ Lợi, Ƀí thư Đảng uỷ sơnah ƀòn Xuân Trường- Dà Làc, pà gĭt, broă lơh uă rlau mờ sàh yau, bơta kơn jơ̆ dờng lơh uă kwang bàng dan ơm rlô lơh broă:

“Mpồl kwang bàng kông cứk bơh sơnah ƀòn Xuân Trường- Dà Làc tŭ do kal ke, bơta geh ngan dan ơm rlô lơh broă, tơn jơh lơh broă gam gơguh. Đảng ủy sàh neh geh 2 nă kông cứk dan ơm rlô lơh broă. Gơwèt mờ Anih duh broă geh 3 nă Kwang bàng đơng lam kấp atbồ dan ơm rlô lơh broă jat jơnau kơ̆p kờñ ờ dờp geh ală broă dong kờl. Tus tơngai tŭ do bol añ kung neh dờp geh tai 4 pang sră dan ơm rlô lơh broă bơh kwang bàng kông cứk dê”.

Tơnơ̆ tŭ tơmŭt bal 3 càr Dăk Nông, Bình Thuận mờ Lâm Đồng, càr Lâm Đồng pa geh 124 sàh, sơnah ƀòn, tiah is ồn. Tàm tŭ rơndăp tăp sèng, tơrmù niam mpồl lơh broă càr Lâm Đồng geh 2 rơbô 529 nă cau ơm rlô lơh broă jat Jơnau lơh nền bơh Cíñ phủ dê sồ 178; 145 nă cau jat Jơnau lơh nền bơh Cíñ phủ dê sồ 07 mờ lơh jat tơrmù niam mpồl cau lơh broă sa priă nhai mờ 1 rơbô 450 nă cau lơh broă ờ mìng lơh dùl kơnòl broă kấp sàh. Jơnau yal pa ngan bơh Sờh Broă dơlam is càr Lâm Đồng dê, tơnơ̆ mờr 1 nhai tơmŭt bal, pơndrờm mờ cau lơh broă geh jàu tŭ do kấp sàh ờ tơl 823 nă cau lơh broă, kấp sờh, gah broă ờ tơl 990 nă cau lơh broă. Ồng Nguyễn Ngọc Phúc, Phó Củ tịc Anih duh broă Làng bol càr Lâm Đồng, pà gĭt, gam geh uă ngan bơta kơn jơ̆ tus kwang bàng kấp sàh mờ do là jơnau mơkung là bơta gơbàn lơh broă lơh kwang bàng sơlơ gơ jal ngan:

 “Uă ngan kơnòl broă bơh kấp kơnhoàl mờ uă kơnòl broă bơh kấp càr dê jun rê ai kấp sàh in. Bơta kơn jơ̆ dơ̆ 2 là bơta pràn jak, bơta bơsram gĭt wă bơh oh mi dê ờ hết gĭt tus mờ ală mpồl broă lơh lài do bơh kơnhoàl mờ càr dê. Broă dơ̆ 3 là gơtìp kơn jơ̆ broă lơh ờs mờng mờ bơta kơn jơ̆ tŭ tơngai pal yal jơnau, pal bơsong jat di tŭ tơngai sră pơ àr gơnoar atbồ dùl mpồng dê. Dilah ờ lơh kơ̆ wơl rơndăp tăp sèng mpồl lơh broă kấp sàh mờ rơndăp tăp sèng mpồl cau lơh broă kấp sàh den hơ̆ là dùl bơta gơ kòl dờng, bol he pal sền dờp broă do”.     

Tàm pơrjum sền wơl 1 nam lơh jat broă lơh gơnoar atbồ ƀòn lơgar 2 kấp, Tỉñ ủy càr Lâm Đồng sơñio loh: mpồl broă lơh tàm kấp sàh gơguh uă mơya cau lơh broă gam ờ tơl, gơ lam tus bơta kwơ màng pal lơh bal uă kơnòl broă, lơh bơta kơn jơ̆ dờng; broă tam pà cau lơh broă mờ priă dong kờl, broă dong kờl ờ hềt ngan ngồn di pal kung gơrềng tus nùs nhơm mờ bơta gơn kơnờm lơh broă bơh mpồl kwang bàng, kông cứk kấp hơ đơm dê. Ồng Đỗ Thanh Bình, Kwang bàng Đảng dà lơgar, Ƀộ trưởng Ƀộ Broă dơlam is, đơs là, bơh bơta geh ngan 1 nam lơh broă gơnoar atbồ ƀòn lơgar 2 kấp mờ sền gĭt loh nam 2026 là “Nam tơnguh cồng nha lơh broă kwang bàng kấp hơđơm dê”, càr Lâm Đồng pal kờp sền, sền sơwì, lơh ngan ngồn mpồl kwang bàng sàh, sơnah ƀòn; lơh pràn bơto bơtê tề lam jrô ơnàng jat jơnau kờñ dê:

“Tơl sàh, tơl sah ƀòn sền sơwì tam cah kwang bàng ai tơlik jơnau kờñ bơto bơtê. Mơkung pơgồp bal mờ lơh sir tiah lơh broă mờ geh broă lơh gơ hòi gơ jà mpồl lơh broă jak bè lơh broă tàm ƀòn lơgar. Sền gròi ai mờ bơsong broă dong kờl gơwèt mờ cau lơh broă ờ lơh mìng dùl kơnòl broă. Ală kấp, ală gah broă bơh càr Lâm Đồng dê rcang lài, kràñ cê jơh nùs tàm lam lơh jat, tơrgùm tă bơsong di tŭ ală kal ke, kòl yan, ală bơta gơ kòl nàng ai broă lơh gơnoar atbồ 2 kấp mut lơh broă ngai sơlơ gơtùi mờ geh cồng nha”.

Bơsong “bơta gơkòl” kwang bàng tơnơ̆  mờr 1 nam lơh broă mpồl kwang bàng lơh broă gơnoar atbồ ƀòn lơgar 2 kấp, ai tơlik jơnau bơsram mờng chài bơh bơta geh ngan, càr Lâm Đồng gam pơn jat tai rơndăp tăp sèng, lơh sir mpồl lơh broă kwang bàng tàm ală anih lơh broă cíñ trị jat di nùs nhơm sồr lơh bơh Dà lơgar dê. Bal mờ hơ̆ là càr Lâm Đồng kung gam tơrgùm tơnguh cồng nha lơh broă mpồl lơh broă kwang bàng, kông cứk, viên cứk dê, ngan là kấp hơ đơm; pơn jat tai kờp sền, ai kwang bàng di pal mờ jơnau sồr kơnòl broă; sơlơ tơnguh tai bơto bơtê, tề lam bè broă lơh ờs mờng, bơta chài ngui sồ mờ bơta pràn jak bơyai lơh pơrlòng lơh kơnòl broă dà lơgar nàng hòi jà mpồl kwang bàng gơnoar atbồ ƀòn lơgar 2 kấp ngan ngồn, geh cồng nha mờ ai cồng nha geh ngan, bơta niam nùs bơh làng bol, mpồl lơh sa kă bro dê lơh bơta đo was.