Tus Anih tờm drơng broă sră pơ àr gơnoar atbồ dà lơgar sàh Nhân Cơ, càr Lâm Đồng ală ngai do, làng bol tơngŏ bơta niam nùs mờ tiah lơh broă dờng niam, broă lơh drơng broă jak chài. Broă ngui măi lĭp sồ is dong kờl gàr niam rơndăp tăp sèng, ring bal, ờ gam bơta tàm rơndăp rơndồl, kơ̆p gơn tai. Lơh sră sơnđan mat kòn pa deh ai kòn in, bi Trần Đình Khương, ơm tàm sàh Nhân Cơ pà gĭt:

“Añ ngai do tus tàm do lơh sră den gŏ tiah lơh broă tàm do sàng goh ngan, lơngăp lơngai, măi mok den pa ngan, broă lơh den bơsong mhar ngan sơl”.

Drờm bè hơ̆ sơl, tàm sàh Quảng Tín, kơnờm bơcri priă lơh dơ̆ lĕ bal phan bơna măi mok, pah nhai Anih tờm dờp pơgăp 600 sră nggal, 100% lơh jat tàm internet, khà bơsong di tơngai pơrgon lơh geh rlau 99%. Jat ồng Lưu Văn Gia, Kwang lam bồ Anih tờm drơng broă sră pơ àr gơnoar atbồ dà lơgar sàh Quảng Tín, bơh nhai 2 nam do, tiah do neh rcang ai priă jền lơh niam mờ blơi pa wơl tơl làm phan bơna, phan măi mok, bơh hơ̆ lơh geh jơnau kờñ bơsong sră pơ àr gơnoar atbồ ai làng bol in:

“Sàh neh bơcri priă lơh niam wơl, pờ ơnàng anih lơh broă, blơi tai phan bơna măi mok bè măi lĭp sồ, măi sền gĭt jơnau yal, măi tíñ, măi in, măi scan mờ lơh niam wơl ală gùng pờ internet”.

Ai tàm sàh Kiến Đức, broă dờp, bơsong sră nggal tàm internet ngai sơlơ ƀuơn ngan kơnờm phan bơna bơt bơtàu sồ geh ai lơh uă tai. Jat ồng Phạm Xuân Anh, Phó Kwang lam bồ Anih tờm drơng broă sră pơ àr gơnoar atbồ dà lơgar sàh Kiến Đức, ală măi tíñ, camera jat sền, măi mok jòi gĭt ală jơnau nàng mut lơh broă ring bal dong kờl geh cồng nha ai kwang bàng, kông cứk in tàm broă lơh jat kơnòl broă:

“Ală măi jòi gĭt, ală jơnau mờ internet geh lơh niam wơl den tàng broă dờp, bơsong sră pơ àr geh bơyai lơh mhar ngan”.

 Jơh gùt càr Lâm Đồng tŭ do geh 100% anih lơh broă, ală tiah tàm tơrbŏ bal gùng pờ internet, yal 2 rơbô 310 sră pơ àr gơnoar atbồ. Khà bơsong sră nggal kấp sàh di mờ tơngai pơrgon lơh geh 98,38%, gơ gơs “bơta niam” tàm broă tam gơl pa wơl sră pơ àr gơnoar atbồ.

Broă bơcri priă lơh ring bal, pơgồp bal mờ lơh pràn tam gơl sồ gam dong kấp sàh càr Lâm Đồng dê ngan ngồn gơ gơs “tiah kơldìng” rềp làng bol, rềp broă, drơng broă làng bol ngai sơlơ sơrbăc mhar, song dơ pă mờ geh cồng nha.