Geh tơnggơs bơh broă tơmŭt bal ală sơnah ƀòn: Tân An, Tân Thiện, Bình Tân mờ sàh Tân Bình bơh ƀòn drà dờng La Gi, càr Bình Thuận lài do dê, sơnah ƀòn La Gi là tiah drà tiah tờm tiah rềp kềng dà lềng càr Lâm Đồng dê, khà kờp làng bol rlau 60 rbô nă. Làng bol ơm kis gal ngan, cau lòt lơh sră nggal sră pơ àr gơnoar ătbồ uă, mơya tơl broă lơh tàm Anih tờm drơng broă sră pơ àr gơnoar ătbồ dà lơgar sơnah ƀòn La Gi ndrờm geh lơh rơndăp tăp sèng, niam ngan, lơh niam nùs làng bol in. Ồng Tôn Thất Nhật tàm sơnah ƀòn La Gia niam nùs pà gĭt: “Làng bol sùm kờñ khăt bơta lơi ndrờm mhar, rơndăp mờ sơrbăc. Nàng lơh geh ai làng bol in den añ gŏ sơnah ƀòn neh lơh niam ngan. Tơnơ̆ do, sơnah ƀòn pơn jăt tai lơh bơsong sră nggal geh mhar, rơndăp mờ sơrbăc bè do là bơta chờ hờp ngan, niam ngan”.

Kung bè kơnhoàl ù tiah tiah tờm sơl, broă lơh bơsong sră nggal sră pơ àr gơnoar ătbồ tàm ală sàh tàm tiah sar tiah ngài, tiah làng bol jơi bơtiàn dồ êt nă cau càr Lâm Đồng dê ndrờm geh lơh ƀươn ƀoài, tàm tơrbŏ niam ngan mờ ală mpồng drơng broă dà lơgar. Ồng Bùi Quốc Huân, Củ tịc Anih duh broă Làng bol sàh Lạc Dương, càr Lâm Đồng, là sàh geh rlau 86% làng bol ơm kis là làng bol jơi bơtiàn dồ êt nă cau pà gĭt, tus tơngai do, sàh neh kờp sền nền wơl, săc rwah, tĕp yal mờ pà gĭt loh làng 378 sră nggal sră pơ àr gơnoar ătbồ tàm ală anih drơng broă dà lơgar. Jơh ală sră nggal do ndrờm geh mpồl lơh dùl mpồng sàh dê bơsong di tŭ tŭ làng bol geh jơnau kờñ: “Poh sơnrờp bol he dờp geh 51 sră nggal, tàm hơ̆ geh 17 sră nggal dờp bơh anih lơh broă pờ tơn tàm internet, tơrgùm uă tàm broă ù tiah, sră cih măt ơm kis cau tàm hìu bơnhă mờ tŏp ƀăng kị. Ală tŭ bơsong, làng bol tus sồr pà ală drơng broă den bol hi neh ai geh. Oh mi neh lơh gơtùi, gĭt geh kơnòl broă bơsong broă bơh he dê. Ală măy mŏk, gùng jun niam mờ niam ngan”.

Bal mờ 16 anih lơh broă, mpồl lơh broă, sờh gah kâp càr, jơh 124 sàh, sơnah ƀòn, tiah is ồn càr Lâm Đồng dê ndrờm neh geh ndrờm bal ală anih bơsong sră nggal sră pơ àr gơnoar ătbồ, ngui phan ătbồ sră nggal pa, lơh geh niam jơnau kờñ dờp mờ lơh bơsong sră nggal ai làng bol in. Jăt Sờh Broă dơlam is càr Lâm Đồng dê yal, kờp bơh ngai 01/07, pah ngai ndrờm geh rlau 1 rbô sră nggal pơyua tơn mờ pơyua bơh tàm internet tàm ală anih lơh broă, mpồl lơh broă nàng ơm kơ̆p bơsong. Lâm Đồng geh đơs là dùl tàm mpồl 5 ƀòn lơgar lam lài jơh gùt lơgar tàm broă dờp, bơsong niam bè sră nggal sră pơ àr gơnoar ătbồ tàm ală ngai sơnrờp lơh broă gơnoar ătbồ ƀòn lơgar 2 kâp.