Ờ kwi kwơ, rơngòt lơh lơngeh lơngañ oh kòn kòn sau pal jun rò pah tŭ tus tơngai dờp priă nhai jơh sơnam lơh broă, halà bơsong broă bảo hiểm, ồng Nguyễn Văn Minh ơm tàm xã Ea Ning, kơnhoàl Cư Kuiñ, càr Dăk Lăk tŭ do neh gơtùi sền gĭt is ală jơnau yal bè mat anih priă jền mờ ală broă lơh dong kờl ai kwang bàng ơm rlô lơh broă in tàm mat điện tử neh lơh mờ anih priă jền mờ Bảo hiểm xã hội càr dê. Ồng Nguyễn Văn Minh pà gĭt, bơh tŭ geh ală cau tàm mpồl măi mok sồ bơh xã dê dong kờl crăp mờ bơto pơlam ngui ală jat ngui do ồng gŏ ƀuơn ƀoài ngan. Ồng Nguyễn Văn Minh, đơs: “Ờ duh pal lòt tai halà ală ngai he ờ ru sùm pal cih sră dờp gơnoar ai cau ndai in kơ̆p ngan hơ̆ sồng ai geh. Bơh ngai geh broă lơh hơ̆, tus ngai là khi pơyoa priă. Bol añ ngui bè do kwèng rao kung ờ duh pal lòt tă priă mat tai mờ quét mã QR ƀuơn ngan".

Ờ mìng lòt tơl sơnah ƀòn, teh tơl mpồng hìu tai ală mpồl măi mok sồ mpồl bơtiàn tàm xã Ea Ning, kơnhoàl Cư Kuiñ, càr Dăk Lăk gam tàm jàu kơnòl broă cau tàm mpồl in lơh broă tàm mpồl lơh broă dùl mpồng Anih duh broă làng bol xã dê nàng dong kờl, bơto pơlam làng bol. Mờ bơta jơh nùs, geh kơnòl dong kờl bơh ală mpồl măi mok sồ mpồl bơtiàn, ngai sơlơ uă làng bol càr Dăk Lăk neh gĭt tus mờ ngui mờng ngan ală jat ngui drơng broă sồ drơng ai ală jơnau kờñ kwơ màng in, bè: lơh sơnơm, bơto bơtê, broă dong kờl mpồl bơtiàn bơh ală phan ngui sồ, tus bal drà kă bro phan điện tử. Ồng Nguyễn Văn Mạnh, cau tàm mpồl tam gơl sồ mpồl bơtiàn, xã Ea Ning, kơnhoàl Cư Kuiñ pà gĭt:“Ală cau tàm mpồl tờm bơh ală mpồl tam gơl sồ mpồl bơtiàn, lơh jat niam gơnoar broă lam lài, dong kờl is bơh mpồl dê neh sơm bat tê bal bơto pơlam làng bol tàm ală tiah mpồl bơtiàn, tàm tiah làng bol ơm kis. Bơh hơ̆ lơh jat ngai sơlơ geh cồng nha tam gơl sồ tàm ală tiah in”.

Jat ồng Nguyễn Tuấn Hà, Phó Củ tịc Duh broă sùm Anih duh broă làng bol càr Dăk Lăk, tus tŭ do, jơh gùt càr Dăk Lăk neh tơlik mat geh mờr 2 rơbô mpồl măi mok sồ mpồl bơtiàn tàm ală thôn, ƀòn, sơnah ƀòn mờ 11 rơbô 700 nă cau. Do geh sền là “ală tê tơn jòng” bơh mpồl sồr lơh tam gơl sồ ală kấp dê geh gơnoar broă tờm ai măi mok sồ, bơta chài sồ tus mờ làng bol:“Mpồl măi mok sồ mpồl bơtiàn do geh uă ală cau tàm hơ̆ mpồl cau tờm ngan là gơnoar atbồ, ală mpồl lơh broă lơh sa kă bro tus bal tàm tŭ tam gơl sồ. Dăk Lăk lơh ngan lơh hời rơ hời, lơh sùm, jơh nùs lơh hời rơ hời tus mờ làng bol”.

Nàng tơnguh uă rlau tai cồng nha bơh ală mpồl măi mok mpồl bơtiàn dê, tàm tơngai tus, càr Dăk Lăk pơn jat tai lơh pràn ală broă lơh tề lam, bơto pơlam, tơnguh uă bơta pràn jak bè tam gơl sồ ai ală cau tàm mpồl in. Bal mờ hơ̆, pơgồp bal mờ ală mpồl lơh broă geh gơrềng, ngan là ală mpồl viễn thông lơh bơnàng jă jat ngui tàm măi at tê nàng ƀuơn ngan ai làng bol, mpồl lơh sa kă bro in sền gĭt mờ mut ngui. Bơh hơ̆, pơgồp bơnah tơnguh uă khà làng bol ngui măi mok sồ, gờñ lơh sir ală jơnau làng bol sồ.