Pơn rơ ngan bè mò H' Blim, ơm tàm ƀòn Mơ Nú, xã Chư Á. Gơwèt hìu bơnhă rƀah mờ rài kis kal ke, nam 2023 hìu bơnhă mò geh gơnoar atbồ tiah do dong kờl dùl nơm kơnrồ sơntìl. Mờ bơta sền gàr ròng siam niam ngan, tus tŭ do, kơnrồ neh deh dùl nơm kòn bè, pơr gon cèng wơl priă jền sùm ai hìu bơnhă in tàm rài tơnơ̆ do. Mò H’Blim, đơs:“Rài kis hìu bơnhă lài do kal ke uă ngan, tài bơh ờ geh sre, ờ geh mìr den ờ gơtùi bơtàu tơnguh lơh sa. Pa do kơnờm geh bơta dong kờl bơh gơnoar atbồ tiah do dê neh dong kờl ai hìu bơnhă añ in kơnrồ sơntìl, tơnơ̆ dùl tơngai ròng den kơnrồ kung neh dờng, kơ̆p kơnờm rơ̆p mhar deh kòn bè, nàng lơh sa hìu bơnhă hời rơ hời geh bơtàu tơnguh rlau”.

Bè broă lơh dong kờl, ƀòn dờng Pleiku neh pà sră kham sơm kòp ờ sa priă ai 100% hìu bơnhă làng bol rƀah mờ hìu bơnhă pa lik klàs rƀah. Ai oh kòn ală hìu bơnhă rƀah gam geh ờ ai priă halà tơrmù priă bơsram tai. Mò Trần Thị Út, Phó Củ tịc Anih duh broă làng bol sơnah ƀòn Chi Lăng, ƀòn dờng Pleiku, pà gĭt, kwang bàng sơnah ƀòn neh bơto pơlam làng bol tam gơl rơndăp tăp sèng phan tam di pal, pờ ală ơdŭ bơto pơlam mờ lơh geh ală bơta càn priă ờ sa priă cồng uă. Mò Trần Thị Út, đơs:“Gơnoar atbồ tiah do neh mờ gam tơrgùm ală broă lơh dong kờl bơtàu tơnguh lơh sa, tơnguh uă ngan cồng nha bơto bơtê, sền gàr pràn kơl dang să jan mờ bơtàu tơnguh phan bơna bơt bơtàu ai 3 ƀòn làng bol dồ ết nă cau in. Tiah do neh hòi jà ală cau geh nùs nhơm niam dong kờl lơh 7 nơm hìu, làng bol bơtàu tơnguh uă bơta niam rài kis. Dong kờl phan tam mờ phan ròng di pal mờ ală bơta geh is bơh 3 ƀòn dê nàng kờñ tơnguh tai priă lơh geh mờ bè ờs wơl rài kis làng bol dê”.

Ƀòn dờng Pleiku neh dong kờl ală cau geh sră dong kờl Dà lơgar in càn mờr 11 tơmàn đong mờ dong kờl ờ sa priă cồng uă. Kes priă tài cau rƀah kung neh dong kờl lơh mờ lơh niam wơl 95 nơm hìu kờp priă rlau 4 tơmàn 700 tơlak đong. Ală broă lơh lơh broă sa geh lam lơh mờ priă tă lơh rlau 770 tơlak đong... Ồng Nguyễn Triều Quang, Phó Kwang atbồ Anih priă jền Cíñ sách xã hội càr Gia Lai đơs nền rơ̆p pơn jat tai tơrgùm ală priă jền, is ồn là broă lơh bơsong broă lơh ai làng bol in:“Anih priă jền kung jơh nùs tă pơgồp jơnau đơs mờ Thàñ ủy ƀòn dờng, Mpồl duh broă làng bol, Anih duh broă làng bol ai priă jền dờp gơnoar càn kes priă tiah do dê nàng ai càn ai ală cau dờp geh dong kờl tàm tiah do in càn. Kờp tus tŭ do kờp jơh jơng kah dồs ală broă lơh dong kờl lơh geh 402 tơmàn đong, tàm hơ̆ priă kes priă kấp càr mờ ƀòn dờng dê là 51 tơmàn đong, geh khà uă tàm lơh jat kơnòl broă ai càn priă broă dong kờl dê”.

Pleiku neh lơh dùl broă lơh is nàng kờñ lơh pràn broă lơh tơrmù rƀah kơ̆ kơl jăp, tơnguh uă bơta niam rài kis làng bol in, is ồn là tàm ală ƀòn làng bol jơi bơtiàn dồ ết nă cau tàm tơngai bơh nam 2021 - 2025. Broă hòi jà jơh ală anih lơh broă cíñ trị mut lơh broă, rcang lài lơh broă rơndăp lơh tơrmù rƀah jŏ tơngai mờ ngui geh cồng nha priă bơh ală broă lơh jơnau kờñ Dà lơgar dê rơ̆p là tờm ngan ai bơta lơh geh cồng nha tàm broă lơh tơrmù rƀah kơ̆ kơl jap bơh ƀòn dờng dê. Ồng Trịnh Duy Thuân, Ƀí thư Thàñ ủy ƀòn dờng Pleiku, pà gĭt:“Bơh bồ tơngai lơh broă tus tŭ do ƀòn dờng neh tơrgùm đơng lam, sồr lơh lam lơh broă lơh tơrmù rƀah kơ̆ kơl jăp pơgồp bal mờ ală broă lơh jơnau kờñ Dà lơgar neh lơh geh bàr pe cồng nha niam ngan. Khà hìu bơnhă rƀah tàm làng bol jơi bơtiàn dồ ết nă cau mờ khà hìu bơnhă rƀah đơs bal gơmù mhar ngan. Do là lơh ngan jơh nùs uă ngan bơh ală kấp ală gah broă dê pơgồp bal mờ broă lơh jat ală broă lơh jơnau kờñ Dà lơgar dê”.

Mờ ală lơh ngan sùm, ƀòn dờng Pleiku gam tus rềp rlau jơnau kờñ tơrmù rƀah kơ̆ kơl jăp. Ală broă dong kờl mờ broă lơh dong kờl neh lơh geh cồng nha, pơgồp bơnah tam gơl rài kis làng bol, is ồn là làng bol jơi bơtiàn dồ ết nă cau.