Jat Sờh Niam chài, Tàp pràn să jan mờ Lòt nhơl càr Khánh Hoà, nam 2025, jơh gùt càr wă pơgăp 16 tơlak 400 rơbô dơ̆ năc, gơguh rlau 14,4% pơn drờm mờ nam 2024. Tàm hơ̆, năc ală lơgar lơh geh pơgăp 5 tơlak 500 rơbô dơ̆, gơguh rlau 13,4%. Kờp jơh priă lơh geh bơh lòt nhơl kờp dŭ lơh geh 66 tơmàn 700 tơlak đong, gơguh rlau 16,8%, lơh sir 100% broă jàu geh ai. Ală cồng nha do pà gŏ lòt nhơl pơn jat tai gàr gơnoar broă “gah gơguh”, lơh geh bơta pràn lơh gơ rề uă ai ală gah lơh sa dà lềng ndai dê.

Nam 2026 gah lòt nhơl càr Khánh Hoà tơrgùm lơh pa phan bơna, pờ ơnàng ù tiah sền gĭt. Bơdìh mờ ală tiah tus mờng kwèng tàm Nha Trang, Cam Ranh, uă phan bơna, tiah tus pa tàm tiah đah Jum càr dê gam geh tơmŭt tàm broă wă rò năc, lơh geh tai bơta rơwah tiah lòt nhơl ai năc in tàm dơ̆ ơm rlô, ngai sa tềp bơhiàn dà lơgar nam Ơseh. Jat hơ̆, năc lòt nhơl tus mờ càr Khánh Hoà tàm tơngai tus ờ mìng tram să he dê tàm trồ tơngai àng niam, dà lềng tơlir lơm mờ gam geh tŭ tơngai sền gĭt niam chài kòn cau Prum dê niam krơi is ngan, sền gĭt ală tiah tus bè: Bình Tiên, Vĩnh Hy, dòr bràs Nam Cương, hìu kwơ̆ gơlang Po Klong Garai. Broă pờ ơnàng ù tiah lòt nhơl geh kơ̆p gơn rơ̆p pơgồp bơnah tơn jòng tŭ tơngai ơm kis ing, tơnguh khà tă ngui bơh năc lòt nhơl dê. Ồng Nguyễn Văn Hòa, Kwang atbồ Sờh Niam chài, Tàp pràn să jan mờ Lòt nhơl càr Khánh Hoà pà gĭt: “Tơnơ̆ tŭ tơmŭt bal 2 càr Khánh Hoà mờ Ninh Thuận, lài do uă ngan ală tiah tus tàm Khánh Hoà lơm tŭ do geh tai ală tiah tus tàm tiah đah Jum càr dê niam krơi is, gơ hòi gơ jà uă ngan năc lòt nhơl”.

Jat Phó Cau pơgru dờng – Tiến sìh Nguyễn Chu Hồi, Phó Củ tịc Duh broă sùm Mpồl phan tàm dà Việt Nam pà gĭt, tơnơ̆ tŭ tơmut bal bă ù ơnàng tiah dà lềng Khánh Hoà dê neh gơguh uă ngan, mơya gơguh lơh sa dà lềng, tàm hơ̆ lòt nhơl dà lềng, bồt bơlào gàr gơnoar broă tờm, pal lơh “khà gơguh uă rlau 2 dơ̆”. Tiah dà lềng Khánh Hoà ơm tàm “tiah 3 mum bùi dà lềng” tiah đah jum dà lềng đah mat tơngai lik, geh khà li la phan tàm dà lềng, là bơnàng jă kwơ màng ai bơtàu tơnguh lòt nhơl mờ tras kŭp ka. Den tàng bè hơ̆, broă tras kŭp ka- lòt nhơl- prap gàr là 3 bơta tờm ờ gơtùi tam cah is ờ. Bơtàu tơnguh lòt nhơl dà lềng, bồt bơlào ờ gơtùi ntoăt jat khà năc tus sền lơm ờ mờ pal pơgồp bal mờ prap gàr ală phan kis tàm dà lềng, sền ală bùi dà lềng, pòt dà lềng, tiah prap gàr bè pòt Nha Trang, Hòn Bà là “bơta lơh geh priă jền” bơh lơh sa tơlir dê. Ồng Nguyễn Chu Hồi đơs là, bơta phan bơna lòt nhơl di pal mờ bơta is bơh tơl ù tiah dê, rơ̆p lơh jat geh cồng nha niam ngan rlau jơh bơta ƀuơn bơta pràn dà lềng bơh càr Khánh Hoà dê: “Bơta pràn bơh pòt Nha Trang krơi mờ pòt Vân Phong. Niam ngan rlau jơh bơh pòt Nha Trang dê là bùi dà lềng, kờñ pal bơtàu tơnguh jat broă lơh tras kŭp ka lơh rài bồ tơngoh, ntrờn bơh tras kŭp ka tus broă tus sền, cèng wơl bơta kwơ lơh sa uă rlau”.

Bơh gah atbồ gah broă, ồng Hà Văn Siêu, Phó Kwang lam bồ Kụk Lòt nhơl Dà lơgar Việt Nam đơs là, Khánh Hoà gam tơrgùm tơl làm ală bơta nàng gơ gơs gah gơguh lòt nhơl bơh gùt lơgar dê mờ brồ guh tàm mpồl tus lam lài tiah đah Jum mat tơngai lik câu Á. Mơya, nàng lơh ngan ngồn jơnau kờñ do, càr kờñ pal pơn jat tai gĭt nền wơl rùp rài tiah tus tàm sră wăc sềr rùp lòt nhơl dunia, tơnguh uă bơta niam phan bơna mờ bơt bơtàu măt kă bro lòt nhơl cèng gơnoar broă ală lơgar. Jat ồng Hà Văn Siêu, tềng đăp mat Khánh Hoà pal tơrgùm lơh sir rơndăp ù tiah mờ phan bơna bơt bơtàu lòt nhơl pa ngan, tờm ngan là lơh niam wơl mƀlàng rơndeh par ală lơgar Cam Ranh, bơcri priă lơh ală anih ơhò ơm dà lềng, tiah ơhò lòt nhơl ơm mờ phan bơna bơt bơtàu tàm tơrbŏ ring bal. Mơkung bơtàu tơnguh phan bơna lòt nhơl jat tàm bơta ƀuơn bơta pràn bơh ală pòt dà lềng tờm, jat gùng dà lơh bal, dong kờl bal, pleh lơh tàm rơndăp rơndồl; lơh geh bơta sền gĭt li la jat kàl, jat tŭ tơngai ngai, mang nàng tơrmù ƀà bơta jat kàl:“Kụk Lòt nhơl Dà lơgar Việt Nam rơ̆p lòt bal mờ Khánh Hoà tàm broă bơt bơtàu, sền gĭt mat kă bro lòt nhơl, lam Khánh Hoà lơh tơngŏ loh làng rlau tai tàm sră wăc sềr rùp lòt nhơl dunia, gơ gơs anih tờm lòt nhơl ơm rlô să dà lềng ală lơgar”.

Mờ bơta gơguh niam ngan tàm nam 2025, gah Lòt nhơl Khánh Hoà geh kờp dŭ lài pơn jat tai gơguh niam tàm tơngai tus. Nam 2026, gah do pơnđơl pràn lơh ngan lơh geh priă rlau 77 rơbô tơmàn đong, kờp jơh dơ̆ năc lòt nhơl rlau 18 tơlak 100 rơbô dơ̆ năc, tàm hơ̆ năc ală lơgar rlau 6 tơlak dơ̆. Tơngai bơh nam 2025–2030 cèng bơta đah bơdìh, sồr Khánh Hoà pal ơn lòt nhơl tàm tiah tờm tàm broă lơh kwơ màng bơtàu tơnguh dê. Tŭ geh bơyai lơh nền nòn, tơlir mờ kơnhăp kơ̆, lòt nhơl rơ̆p lơh geh bơta lơh gơrề uă, sơlơ tơnguh tai ală gah kwơ màng ndai bè lơh sa mờ măi mok, logistics, tiah drà dà lềng mờ lơh sa dà lềng bơtàu tơnguh bal.

Phó Củ tịc Duh broă sùm Anih duh broă Làng bol càr Khánh Hòa ồng Nguyễn Long Biên đơs nền, lòt nhơl- drơng broă là dùl tàm 4 bơta tờm gơn kơnờm bơtàu tơnguh lơh sa bơh càr dê, jat ală Jơnau lơh nền tàm pơrjum sồ 09 bơh Ƀộ Cíñ trị mờ Jơnau lơh nền tàm pơrjum sồ 01 bơh Tỉñ ủy càr Khánh Hoà dê, wèt tus jơnau kờñ gơguh lơh sa 2 nơm khà sồ tàm tơngai tus: “Ngui niam ală bơta ƀuơn, bơta pràn nàng sơlơ tơnguh tai bơtàu tơnguh wơl, gơ hòi gơ jà ală rơndăp broă lơh lòt nhơl dờng, kwơ màng ngan; bơtàu tơnguh phan bơna lòt nhơl krơi is, is ồn; lơh niam wơl phan bơna bơt bơtàu, drơng broă niam uă; lơh mhar tŭ tơngai lơh ală rơndăp broă lơh lòt nhơl tờm; bơtàu tơnguh lơh sa mang, ală drơng broă phan sa, blơi phan, lơh rài bồ tơngoh nàng kờñ tơnguh tai bơta pràn gơ hòi gơ jà năc lòt nhơl; dong kờl mờ tă bơsong ală kal ke ai làng bol tus bal drơng broă lòt nhơl in”.