Tàm ƀlàng ơnàng 5 lồ bơh rơndăp broă lơh lơh Hìu bơsram 2 kấp ơm sa bĭc tơn kấp dùl mờ kấp bàr Ia Púch, càr Gia Lai, ală cau ling bal mờ mpồl kỹ sư, cau lơh phan geh tam pà uă mpồl lòt lơh broă làm tiah lơh hìu bơsram nàng dong kờl mut lơh ală bơta bè ală cơldŭ bơsram, hìu sền sră, hìu tàp pràn să jan, tiah ơm ai kơnòm bơsram in...

Ală yô mpàng tê kwèng mờ ià phàu lòt sền, sền gàr gơnoar tờm tiah nhàr lơgar, tŭ do tơryang tơryồng jun pơndiang gac, tàm bơrlŭ sơmang, kli kơlik hìu, lơh mhar ngan mut lơh hìu bơsram pa ai oh kòn tàm tiah nhàr lơgar in. Jùt ală dà kơl hề tàm tơr mồ tơngai sa, Trung úy Cao Kiến Giang, cau ling Pôs đồng sền gàr tiah nhàr lơgar Mpồng nhàr lơgar Ală lơgar Lệ Thanh, pà gĭt:

"Sơnđờm mut lơh broă, geh tŭ añ kung kwi kwơ sơl mơya geh bơta tề lam bơh ală mơi ală wa tàm tiah lơh broă, den añ neh bơsong geh kal ke mờ lơh sir niam ngan kơnòl broă geh jàu. Pah ngai lòt lơh broă rê bòl ngan, añ kung geh bơta sền gròi dong kờl bơh đơng lam bồ dê bè broă sa sào, ơm rlô geh gàr niam, den tàng să tờm añ mờ ală oh mi cau ling bal kung gam gàr niam sùm pah ngai”.

Trung tá Phạm Tiến Sỹ, Phó Lam bồ Pôs đồng sền gàr tiah nhàr lơgar Ia Pnôn- đơng lam mpồl ling sền gàr tiah nhàr lơgar tus bal dong kờl bơt bơtàu pà gĭt: mpồl ling tus bal dong kờl ndrờm geh lòt sền, tàm jàu kơnòl broă di pal mờ broă lơh ờs mờng, pràn kơl dang să jan mờ bơta pràn jak bơh tơl nă cau dê; mơkung pơgồp bal niam ngan mờ mpồl lơh broă nàng lơh jat geh cồng nha uă ngan rlau jơh. Broă lơh dong kờl kung geh gàr niam tơl làm, bơh tiah sa sào tus ală bơta ơm kis pah ngai, dong kwang bàng, cau ling in iang nùs lơh broă tàm tiah lơh broă dê.

"Bol añ pơgồp bal mờ mpồl mut lơh broă, ai mpồl cau di pal, jak chài, gàr niam ală tiah tus bal dong kờl nàng lơh niam ngan kơnòl broă. Do là kơnòl broă cíñ trị kwơ màng uă ngan, mờ là nùs nhơm bơh kwang bàng, cau ling mpồl ling sền gàr tiah nhàr lơgar, gơwèt mờ làng bol kòn cau tiah nhàr lơgar. Bol añ sùm bơto kwang bàng, cau ling in bè bơta kwơ cíñ trị, mpồl bơtiàn mờ bơta niam jak bơh broă lơh bơt bơtàu. Bơh hơ̆ lơh geh ai oh mi in nùs nhơm lơh jat nàng bơsong kal ke, lơh sir niam ngan tơl kơnòl broă geh jàu”.

Nàng dong kờl ală tiah mờ mpồl mut lơh broă in lơh sir jơnau kờñ geh ai, bơh nggùl nhai 5 nam 2026 tus tŭ do, bal mờ mpồl ling sền gàr tiah nhàr lơgar, Gah đơng lam Mpồl ling klàng càr Gia Lai, Ling mpồl 34 mờ Kwang àng càr Gia Lai neh hòi jà kờp jơh rlau 500 nă kwang bàng, cau ling tus bal dong kờl tàm jơh bal 7 tiah lơh broă gơwèt rơndăp broă lơh dê. Ờ mìng tus bal tơn bơt bơtàu, ală mpồl ling gam bơto bơtê, yal tơngĭt nàng kwang bàng, cau ling in wă loh gơtha bơh broă lơh bơt bơtàu dê, lơh jat niam kơrnoat boh lam, sền dờng màng bơhiàn bơh làng bol kòn cau tàm tiah do dê. Bơh hơ̆ pơgồp bơnah sơlơ tơnguh tai nùs nhơm tam klăc ling klàng làng bol, gàr kơ̆ lơngăp lơngai chính trị mờ rơndăp tăp sèng lơngăp lơngai mpồl bơtiàn tàm tiah nhàr lơgar Hạ sĩ Hà Minh Hùng, cau ling Pôs đồng sền gàr tiah nhàr lơgar Ia Chía, pà gĭt:

"Tàm tŭ lơh broă, añ sùm lơh ngan gàr niam lơngăp lơngai bè cau mờ phan bơna. Gơwèt mờ să tờm añ mờ oh mi, cau ling bal neh geh bơta bơto bơtê bơh đơng lam bồ dê bè gơtha broă lơh do gơwèt mờ oh kòn tàm tiah nhàr lơgar, bơh hơ̆ dong oh mi geh nùs nhơm niam rlau tai, bơsong kal ke nàng lơh sir kơnòl broă”.

Rơndăp broă lơh bơt bơtàu 7 hìu bơsram kấp dùl mờ kấp 2 tàm ală sàh tiah nhàr lơgar càr Gia Lai kờp jơh geh khà priă bơcri lơh rlau 1 rơbô 500 tơmàn đong. Tus tŭ do, jơh rơndăp broă lơh neh lơh sir pơgăp 47% mpồl broă bơt bơtàu mờ crăp phan bơna. Bulah ală cau bơcri priă lơh neh ai tai măi mok, phan bơna mờ mpồl cau lơh broă, tŭ tơngai mut lơh kung gam lơyài bơh 15 tus 49 ngai pơndrờm mờ broă rơndăp lơh.

Bơta dong kờl bơh mpồl ling phàu crong neh pơgồp bơnah “tam pà bal kal ke” mờ mpồl lơh broă dê, pơnđơl pràn lơh ngan lơh sir broă lơh di mờ jơnau sồr bơh càr dê. Ồng Nguyễn Trung Quyến, ala mat mpồl lơh broă tàm Hìu bơsram ơm sa bĭc tơn kấp dùl mờ kấp bàr Ia Púch, pà gĭt:

 "Tơngai lơh sir nàng ai broă lơh mut lơh broă ờ gam jŏ tai. Tềng đăp mat là dùl kàl mìu, den tàng broă chồl lơh mhar tŭ tơngai mut lơh là broă lơh gơ jal uă ngan, ờ gam gùng lơi ndai tai. Gơwèt mờ broă lơh bơt bơtàu drơng broă ờs mờng, den broă lơh mìng dùl lơm là tơnguh tai cau lơh broă. Broă mpồl ling klàng bơtơl tai mpồl cau tus dong kờl ai cau bơcri lơh in den bơnah lơi neh tơrmù ƀà bơta kơn jơ̆ cau lơh broă ai cau bơcri priă lơh in, nàng tơnguh mhar tŭ tơngai mut lơh broă lơh dê”.

Bơta tus bal bơh mpồl ling sền gàr tiah nhàr lơgar bal mờ ală mpồl ling klàng, Kwang àng càr Gia Lai dê ờ mìng pơgồp bơnah tă bơsong kal ke bè mpồl cau, lơh mhar tŭ tơngai mut lơh lơm mờ gam tơngŏ nùs nhơm geh kơnòl, bơta lòt bal bơh mpồl ling phàu crong dê gơwèt mờ broă lơh bơt bơtàu tiah nhàr lơgar đah mat tơngai mut càr Gia Lai.