Tàm ală dòr bơnơm, ală suơn plai bung kơmhò tơlir niam ngan lă jòng, tơl dơ̆ càl bồ kàl puh tus, pà gŏ cồng nha lơh geh nam do pơn jat tai ơm tàm khà bè ờs. Kờp dŭ năc lòt nhơl di ngai 2/09 tus mờ Khánh Hoà gơguh uă gam pờ geh tŭ tơngai niam tăc bro ờ mìng plai bung kơltau tơlir lơm mờ gam uă phan bơna lơh geh bơh broă lơh sa suơn sre ndai bơh ù tiah kơh bơnơm do dê tàm ƀòn lơgar tơn, lơh geh bơnàng jă nàng lơh geh ală anih lơh bal tàm tơngai tus. Ồng Đoàn Văn Hưởng, Kwang lam bồ Mpồl lơh broă bal tam phan lơh sa suơn sre Khánh Thành (ơm tàm sàh  Khánh Vĩnh, càr Khánh Hòa) pà gĭt:“Nam do, bơh bồ kàl tus tŭ do, trồ tiah sền bal là niam ngan. Mìu rah rài ndrờm den tàng broă sơng ka sền gàr phan tam ƀuơn ngan sơl. Sa tềp nam do, tŭ do gam tàm tơngai sơng ka sền gàr, sền bal tờm chi niam ngan. Dơ̆ lơh chờ yal tơngĭt phan bơna lơh geh bơh broă lơh sa suơn sre, is ồn là plai bung kơmhòtơlir kung geh bơyai lơh di tŭ tơngai sơl. Kờp dŭ ngai 2 nhai 9 do, mpồl lơh broă bal kung gam tơl phan bơna nàng tăc tàm drà kă bro”.

Plai bung kơmhò tơlir Khánh Vĩnh tŭ do ờ mìng tăc bro tàm drà sơn rờp lơm mờ neh geh ală mpồl lơh sa kă bro ngui lơh phan ngui tàm lơh gơlik tơngi plai bung, ngkòng plai bung ơn mrềt. Ală mpồl lơh sa kă bro đơs là, do là bơta ƀuơn ngan nàng tơl broă lơh lam plai chi do gơ gơs phan bơna OCOP krơi is bơh tiah kơh bơnơm dê. Mò Nguyễn Thị Ngân, Kwang lam bồ Kông ty tăc mờ blơi phan bơh lơgar ndai plai chi mờ phan lơh geh bơh broă lơh sa suơn sre Ngân Nguyễn pà gĭt:“Tŭ ală phan bơna lơh geh jơnau sồr OCOP, hơ̆ là jat gùng dà broă lơh phan bơna sàng goh, hữu kơ, den ală mpồl lơh sa kă bro mờ anih lơh sa kă bro sơn đờm jòi tus ală mpồl lơh broă bè đah bol añ. Khi jòi ală phan bơna geh tiah tờm lơh gơlik loh làng, phan bơna sàng goh mờ geh bơta kwơ tờm ngan nàng gơtùi lơh bal jŏ jòng. Pơn yơu bè ală phan bơna lơh sàng goh bơh plai bung bè tơngi plai bung, ngkòng plai bung ơn mrềt, halà ngui nàng gơm cè ndrờm geh sền gròi lơm”.

Tàm tơngai càr Khánh Hoà pờ ơnàng ù tiah bơtàu tơnguh tŭ tơmŭt bal mờ càr Ninh Thuận, ală phan bơna pơn rơ ngan bơh tiah kơh bơnơm dê geh tai ală bơta ƀuơn tàm tơrbŏ mờ drà kă bro, ngan pơgồp bal mờ ală broă lơh lơh chờ, lòt nhơl uă. Uă ngan năc lòt nhơl tus mờ tiah đah Jum tàm ngùl lơgar neh sền gròi tus ală phan bơna plai chi pơn rơ, sền do là dùl bơnah tàm gùng lòt sền gĭt niam chài ƀòn lơgar. Tiến sìh Đặng Qúy Nhân, Cơldŭ lơh broă đơng lam pơgồp bal Ƀòn lơgar pa Dà lơgar, Ƀộ Broă lơh sa suơn sre mờ Tiah ơm kis đơs là:“Ală tiah pal lơh jat niam bơta ƀuơn bơta pràn bè ală phan bơna pơn rơ bơh he dê. Kờñ bơtàu tơnguh kơ̆ kơl jăp den pal geh broă lơh bơt bơtàu tiah tam phan kơ̆ kơl jăp jŏ jòng, geh tiah tờm lơh gơlik loh làng mờ geh ù tiah pơlam tiah tam phan. Tŭ hơ̆, ală mpồl lơh sa kă bro mờ mpồl lơh broă bal rơ̆p rcang lài lơh geh phan bơna cèng bơta jŏ tơngai, tơnguh bơta kwơ phan bơna mờ tơnguh priă lơh geh ai làng bol cau lơh broă sa in. Broă pơgồp bal ală phan bơna OCOP nàng tăc ai năc lòt nhơl tus mờ ƀòn lơgar in kung kờñ pal geh sền gròi sơl”.

Tơngai pa do, kơnờm broă lơh jơnau kờñ Dà lơgar bơcri priă bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, càr Khánh Hoà neh dong kờl bàr pe mpồl lơh broă bal bơcri priă lơh anih rào goh phan bơna, anih ơn prap, bơto pơlam dan cih mat tiah tam, tơl broă lơh lơh sir broă lơh tam phan. Bàr pe broă lơh lơh tơrlòng lài lam năc lòt nhơl tus tơn tàm suơn sền gĭt mờ blơi phan lơh geh bơh broă lơh sa suơn sre tàm dồ bă tiah neh cèng wơl tềl tơngŏ niam ngan. Ồng Nguyễn Ngọc Sơn, Phó Kwang lam bồ Sờh Jơi bơtiàn mờ Gah pin dờn jat Yàng càr Khánh Hoà pà gĭt: “Tŭ do, tàm tiah kơh bơnơm càr Khánh Hoà, làng bol neh sơnđờm tam gơl bơh broă lơh tam phan ờs mờng tus ngui jak chài- măi mok nàng tơnguh cồng nha phan tam, phan ròng. Mơya, bol he pal jơh nùs pờ ơdŭ tề lam, bơto pơlam nàng làng bol in wă bè lơi là sơnđờm mut lơh broă, sơnđờm kă bro, bơceh lơh. Tŭ gĭt loh geh ală bơta hơ̆ den khi hơ̆ sồng lơh geh bồ tơngoh kơlôi sơnơng mờ bơtàu tơnguh ală broă lơh tơnơ̆ do in”.

Bè hơ̆, dilah tam gơl bơh bồ tơngoh kơlôi sơnơng lơh sa dềt rah rài tus bồ tơngoh kơlôi sơnơng lơh phan bơna pơgồp bal mờ drà kă bro, phan lơh geh bơh broă lơh sa suơn sre OCOP tiah kơh bơnơm Khánh Hoà gơtùi lơm gơ gơs bơta gơn kơnờm bơtàu tơnguh kơ̆ kơl jăp tàm tơngai pờ ơnàng ù tiah bơtàu tơnguh mờ bơtàu tơnguh wơl lòt nhơl tŭ do dê.