Ngai lồi poh, tàm sàh Ea Kly, càr Dăk Lăk, hô hơng nùs nhơm rcang ai dơ̆ tĕ khà in. Bơh drim gờñ tus tàm trồ mang jơla, kwang bàng ală thôn neh tam pà gơs uă mpồl dềt, lòt jơh ală ƀòn lơgar, tiah làng bol ơm kis, “lòt tơl nơm gùng, tĕ tơl nơm hìu” nàng dờp pang sră tĕ khà ai cau tĕ khà in mờ mblàng yal, hòi jà cau tĕ khà tus bal tĕ khà Cau ala mat Quôk hội khoă XVI mờ Mpồl duh broă Làng bol ală kấp tơngai lơh broă bơh nam 2026-2031. Tàm thôn Chợ, sàh neh tơnggơs 7 mpồl lơh broă tơn tus mờ tơl hìu bơnhă làng bol nàng dờp sră đùh ai cau tĕ khà in. Bi Nông Ngọc Thắng, ơruh pơnu Mpồl lơngăp lơngai thôn Chợ, pà gĭt, thôn geh mờr 1 rơbô 400 nă cau tĕ khà. Tus tŭ do, pang sră tĕ khà cau tĕ khà dê neh geh dờp tus tàm tê làng bol:“Do là añ lòt dờp pang sră tĕ khà ai làng bol in, gam tus tàm tiah tĕ khà den geh uă mpồl bơto pơlam ai làng bol in bè broă creh halà ờ creh ai gơ in di pal. Tus hìu lơi là làng bol lơh broă bal tàm hìu hơ̆ tài bơh do là gơnoar kwơ bơh khi dê”.

Broă dờp pang sră tĕ khà tus tơl hìu bơnhă làng bol in geh lam lơh dơ̆ lĕ bal, mhar ngan tàm jơh ală sàh, sơnah ƀòn tàm ù tiah càr Dăk Lăk dê. Ờ mìng ƀuơn ngan là dờp pang sră tĕ khà tus tàm tê cau tĕ khà in lơm ờ, kwang bàng ƀòn lơgar gam pơgồp bal mblàng yal, mblàng lơh loh, bơto pơlam làng bol in jòi gĭt jơnau yal bè ală cau tơlik mat tĕ khà, gĭt loh gơnoar mờ kơnòl bơh he dê lài mờ ngai tĕ khà. Bơh hơ̆, dong yal tơngĭt jơnau bè dơ̆ tĕ khà rơ hời gơ rề uă jrô ơnàng, pơgồp bơnah tơnguh bơta gĭt wă mờ nùs nhơm geh kơnòl bơh cau tĕ khà dê gơwèt mờ ngai chờ dờng bơh Dà lơgar dê. Ồng Nguyễn Doãn Kiều, ơm tàm tổ zân phố 6A, sơnah ƀòn Thành Nhất, càr Dăk Lăk pà gĭt:“Añ neh geh mblàng yal tàm tổ zân phổ, den tàm ală gah yal tơngĭt jơnau mpồl bơtiàn, den geh tŭ là Anih duh broă Mặt trận Dà lơgar neh mblàng yal tus gùng tus dà mờ añ brơn brài ngan. Mờ añ crăp rcang lòt lơh jat kơnòl broă mơkung hòi jà tơl nă cau tus bal tĕ khà dơ̆ do”.

Tàm càr Dăk Lăk, bơdìh mờ mblàng yal tơn, uă tiah pờ ơnàng gah yal tơngĭt jơnau nàng cau tĕ khà in gĭt ƀuơn ngan. Bơdìh mờ pơrjum làng bol, loa pờ tơlik jơnau, pano, ală tiah gam ngui măi mok sồ, internet, mblàng yal tơn tàm internet nàng yal jơnau yal cau tơlik mat tĕ khà dê mờ broă lơh lơh broă bơh cau tơlik mat tĕ khà. Broă lơh do dong cau tĕ khà mhar ngan, gĭt mơ jơnau yal, kơlôi sơnơng nền nòn rơwah cau ala mat di pal. Ồng Đặng Gia Duẩn, Ƀí thư Đảng ủy, Củ tịc Mpồl duh broă Làng bol sơnah ƀòn Ea Kao, càr Dăk Lăk, pà gĭt:“Bol añ bơyai lơh uă ngan ală broă lơh mblàng yal krơi is, bơh mblàng yal ờs mờng tus bơta pa tŭ do dê pơgồp bal mờ tam gơl sồ. Bol añ lam lơh lài tàm ngui măi mok sồ tàm broă mblàng yal bè jơnau yal tơngĭt bơh ală cau ala mat dê”.

Drờm bal mờ broă lơh mblàng yal tàm ƀòn lơgar, ală broă lơh mblàng yal sền gĭt tơn geh lam lơh dơ̆ lĕ bal tàm gùt càr. Uă gơl gùng, tiah làng bol ơm kis tàm càr Dăk Lăk neh àng gơcrà pano, ƀăng rôn, áp phích pơn jờng ai dơ̆ tĕ khà, lơh geh nùs nhơm duh hồl wèt tus ngai chờ jơh gùt làng bol dê. Jat ồng Trần Hồng Tiến, Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk, ală phan bơna mblàng yal geh lam lơh dơ̆ lĕ bal bơh càr tus tàm ƀòn lơgar, pơgồp bơnah ai jơnau yal tĕ khà tus rềp rlau  tai mờ làng bol:“Bol añ neh lơh ală phan bơna  bơt bơtàu bè là ală video clip, den ală sră yal tơngĭt tus ƀòn lơgar, den pơgồp bal mờ ală gah mblàng yal mpồl bơtiàn nàng sơlơ tơnguh tai broă lơh mblàng yal lài mờ tŭ, tàm tŭ mờ tơnơ̆ dơ̆ tĕ khà”.

Rlau 2 tơlak 400 trơbô nă cau tĕ khà tàm càr Dăk Lăk gam hưh hơh kơ̆p ngai tĕ khà. Bơta mut lơh dơ̆ lĕ bal bơh jơh ală anih lơh broă cíñ trị bal mờ uă broă lơh mblàng yal ngăc ngar neh pơgồp bơnah ai jơnau yal tơngĭt tĕ khà tus rềp rlau tai mờ cau tĕ khà, lơh geh bơta pin dờn mờ bơta crăp rcang tus bal ngai chờ dờng bơh gùt làng bol dê.