Tàm dùl tiah lơh gơlik phan lơh geh bơh broă lơh sa suơn sre tàm sơnah ƀòn Buôn Ma Thuột, ală sơnề plai sầu riêng dum rơmĭt geh tơmŭt tàm broă lơh pơr ro- măi mok dong gàr lời wơl wil tơl bơta bơkah, dà rơmĭt niam mờ bơta lơngàm geh is. Bơh bơta plai chi jat kàl, sầu riêng tŭ do neh gơ gơs phan bơna lơh gơlik jrô, geh tàm ală hộp phan pà kwơ màng. Mò Nguyễn Thị Hường, Kwang lam bồ Kông ty Pơgồp bal Broă lơh sa suơn sre N&H tàm Buôn Ma Thuột pà gĭt:“Sầu riêng pơr ro lơh geh ală jơnau kờñ là gàr niam bè ờs bơta bơkah, dà rơmĭt gơ dê; broă jàu 5 ờ: ờ geh sơdàng, ờ geh dà sơnơm gàr phan ơn prap, ờ geh phan lơh ƀô thồm tơrgùm bal, ờ tơnguh bơta duh mrềt mờ ờ ngui tơngi. Cau ngui sa bơh càr Dăk Lăk dê den kung kơ̆p kờñ là cèng ală phan bơna mờ cèng bơta bơkah bơh càr Dăk Lăk dê tus mờ ală cau tàm tiah ndai, càr ndai, pơn rơ is bơh càr Dăk Lăk dê hơ̆ là sầu riêng pơr ro mờ khi neh pơyoa ală bơnah phan pà hơ̆ tàm dơ̆ sa tềp nam do”.

Bơdìh mờ plai chi pơr ro, gar mắc ca- geh sơnđan là “kwơ màng ngan rlau jơh bơh ală bơta gar dê”- kung gam pơgồp uă rlau tai tàm tiah ơn ƀañ mứt bồ sơnam pa. Bơh pơr dimơ nàng gàr niam bơta lơngàm bơkah, tus chàng mờ ồs lòng ai gơ in geh uă bơta bơkah krơi is, mắc ca càr Dăk Lăk rơ hời gơ gơs bơta rơ wah mờng kwèng bơh uă hìu bơnhă dê tàm ală ngai sa tềp. Mò Phạm Trần Tú Anh, ala mat bàr pe anih lơh gơlik mắc ca chàng mờ ồs lòng tàm sàh Krông Năng, càr Dăk Lăk pà gĭt:“Bol añ chờ hờp ngan tŭ gŏ phan bơna bơh he dê geh tàm kƀàng hùc dà cê ngai bồ sơnam pa bơh uă hìu bơnhă dê. Mắc ca ờ mìng là phan sa bơkah lơm mờ gam tơngŏ broă ngui sa wèt tus pràn kơl dang să jan, bơta niam ngan mờ sền dờng màng phan lơh geh bơh broă lơh sa suơn sre ƀòn lơgar dê”.

Dơ̆ sa tềp pa do, bơta kwơ bơh ală phan bơna OCOP bơh càr Dăk Lăk dê ngai sơlơ geh sền gĭt loh làng ngan. Ờ gam ƀuơn ngan là phan pà lơm, ală phan bơna bơkah pơn rơ tiah do dê gơ gơs rƀàng tàm tơrbŏ bal lơh kah wơl bơta bơkah ƀòn lơgar dê, lơh geh bơta is rơmis ngan ai ù tiah bơtòm tơrgùm bồ sơnam pa. Tàm kƀàng hùc dà cê ngai bồ sơnam pa, bơdìh mờ prèng mư̆t ca, mứt lơ u ờs mờng, bơta geh mat bơh mắc ca, sầu riêng pơr ro, kơphê chàng halà cê nhơ̆t lơh geh bơta bơnĕ bơnài bal đah yau mờ pa, đah bơhiàn ờs mờng mờ tơngai pa tŭ do dê. Bi Nguyễn Minh Anh, dùl nă làng bol ơm tàm sơnah ƀòn Buôn Ma Thuột, càr Dăk Lăk, pà gĭt:“Pah dơ̆ sa tềp tus sơnam pa rê, hìu bơnhă añ sùm ơn tai ală phan bơna bơkah pơn rơ bơh càr Dăk Lăk dê tàm tiah ơn ƀañ mư̆t. Năc tus nhơl tàm hìu kờñ ngan sa sầu riêng pơr ro halà gar mắc ca. Bơkah, krơi ngan, mờ gam tơngŏ tai bơta sền dờng màng phan lơh geh bơh broă lơh sa suơn sre tiah do dê”.

Bơta geh mat bơh phan bơna OCOP- phan bơna bơkah pơn rơ bơh ƀòn lơgar dê tàm ală ngai sa tềp, ờ mìng là jơnau yal ngui sa lơm mờ gam là dùl broă lơh kwơ màng tàm gùng lòt tơnguh uă bơta kwơ. Tàm bơta àng gơ crà sơnam pa bơh ù tiah brê bơnơm, bơta bơkah dà kơphê, mắc ca, sầu riêng pơr ro tàm bơnĕ bơnài bal tàm nhơm càl puh, lơh geh jơnau đơs bơkah pơn rơ ngan bơh càr Dăk Lăk dê. Ală phan bơna OCOP gam pơyoa bơta pơn yờ să bè bơhiàn niam chài is mờ lơh ngan tam gơl pa bơh tơl nă làng bol tiah do dê. “Bơta bơkah sơnam pa” bơh phan lơh geh bơh broă lơh sa suơn sre càr Dăk Lăk gam lơh gơrề uă ram mhŭ tàm tơl nơm hìu, tơl jơnau yal bơtòm tơrgùm bồ sơnam pa dê.