Tàm tiah hìu măy bơh Mpồl lơh broă bal Broă lơh sa sươn sre mờ drơng broă sa priă lơh gơlik, lơh gơs ƀung, miến, phờh ro Chi Lăng – Khánh Xuân, sơnah ƀòn Thành Nhất, càr Dăk Lăk tơl dơ̆ ƀung, miến, phờh geh tơmŭt lơh gơs phan, pơr ro, ơn klơm sùm nàng di tŭ tăc tàm drà. Ồng Hà Văn Tuyến, Kwang Lam bồ mơkung là Củ tịc Mpồl duh broă ătbồ broă mpồl lơh broă bal pà gĭt: Pah nhai mpồl lơh broă tăc tàm drà pơgăp bơh 15 tus 20 tấn phan bơna ală bơta. Bơh tŭ geh cơng tàng phan bơna OCOP 3 sơrmañ, phan bơna mpồl lơh broă bal dê ngai sơlơ geh cau ngui sa gĭt mờ dòn ngui. Ồng Hà Văn Tuyến, pà gĭt: “Bồ sơnam Tây mờ lồi sơnam he den bol hi rơcăng pơgăp 40% khà phan gơguh pơndrờm mờ ală nhai lài. Bơdìh hơ̆, den bol hi kung geh cau lơh broă rơcăng lài lơh broă jăt tơngai kàl ndrờm pal mờ khà phan digơlan gơguh tai nàng dipal mờ gàr tơl phan tăc tàm drà tàm dơ̆ Sa tềp”.

Nùs nhơm ờ ru ngan kung mpờl gŏ loh tàm ală mpồl lơh sa kă bro lơh gơs phan lơh geh bơh sươn sre geh lơh uă. Tàm Kông ty Kong kơnòl nă să is Đức Thịnh – dùl tàm ală mpồl lơh gơlik, lơh gơs phan gar điều tàm ù tiah càr – ală măy mŏk lơh gơs phan, ơn klơm gam lơh broă mờr bè jơh pràn tơn. Mò Nguyễn Ngọc Thuỳ Sơn, Kwang Lam bồ đơng lam lơh jăt Kông ty pà gĭt, bơdìh mờ drà tăc mờ lơgar ndai, is ồn drà lơgar Lo, dơ̆ lồi sơnam mpồl lơh sa kă bro tơrgùm uă rlau ai drà tàm lơgar in, ngan là drơng jơnau kờñ ngui sa tàm dơ̆ Sa tềp. Mpồl lơh sa kă bro neh rơcăng lài rơndăp lơh ală mpồl phan bơna pa, sền gròi uă tus rùp să, kơldung nàng kờñ tơngguh uă đal gĭt măt kă bro.

 “Mpồl lơh sa kă bro neh rơcăng lài rơndăp lơh ală mpồl phan bơna pa bal mờ rùp să gơcèng jơnau gơtha tìp măt bal, bơtòm tơrgùm. Bè giă tăc, kông ty sền bal gàr bè ờs jăt giă hìu măy, mìng bàr pe phan bơna tam gơl gơguh pơgăp 5% tài bơh priă tă blơi phan lơh gơguh. Tàm dơ̆ Sa tềp, khà phan tăc tàm drà tàm lơgar gơguh pơgăp 10%”.

Tàm tiah đah măt tơngai Lik càr Dăk Lăk, uă anih lơh gơlik OCOP lơh broă hìu bơnhă kung bơsong kal ke tơnơ̆ dà tih dà lìu, thàn tăc phan bơna tàm drà kă bro Sa Tềp. Tàm hìu ràng tăc phan kă bro ală phan bơna OCOP tàm sàh Sông Hinh, ală bơta phan bè iar tram (pò) boh tiêu, kơnrồ dùl ngai, kơnrồ yồng ràng bơnhă ồs, sur yồng ràng bơnhă ồs, iar ro, sur ro geh lơh gơlik mờ ơn klơm sùm.

Ồng Nguyễn Duy Hùng, cau tờm anih lơh gơlik Hùng Miên pà gĭt, dơ̆ mìu dà tih dà lìu pa do neh gơrềng uă ngan tus phan ngui lơh phan kung bè tŭ tơngai lơh gơlik mơya anih lơh broă neh thàn lơh broă wơl nàng lơh geh jơnau kờñ drà kă bro dê: “Bol hi lam lơh gơlik sùm nàng thàn drơng drà Sa tềp in. Dơ̆ Sa tềp nam do, jơnau kờñ blơi digơlan gơguh pơgăp 35% pơndrờm mờ ngai bè ờs, bulah bè hơ̆ giă tăc rơ̆ ờ gŏ gơguh uă”.

Bal mờ lơh ngan bơh ală mpồl lơh sa kă bro mờ hìu bơnhă lơh gơlik dê, broă lơh ătbồ drà kă bro, gàr niam sàng goh phan  sa kung geh ală gah geh gơnoar tơngguh tai. Trung tá ồng Nguyễn Đức Duy, Phó Lam bồ Cơldŭ Kảñ sát Lơh sa, Kwang àng càr Dăk Lăk pà gĭt mpồl lơh broă geh gơnoar lơh kràñ lòt sền, jăt sền tàm dơ̆ lơh uă: “Mpồl kwang àng rơ̆p sền gròi uă sok sền ală anih ai phan lơh bơh sơnrờp drơng lơh gơlik, lơh gơs bơna ai hìu ñô sa, anih kă bro in, pal ờ ngui phan kơryan ờ ai, phan tĕ bơdìh sră cih măt ai gơnoar, bơh hơ̆ kơryan lài pơhìn khih phan sa, pơgồp bơnah nàng làng bol wă rò Sa tềp niam lơngăp lơngai”.

Sơrlèt rlau ală kal ke tài bơh trồ tiah lơh aniai, bal mờ nùs nhơm rơcăng lài, lơh ngan bơh ală anih lơh gơlik, kă bro dê bal mờ bơta mŭt bal bal kràñ cê jơh nùs bơh ală anih lơh broă geh gơnoar dê, drà phan bơna tàm Dăk Lăk hơ pơrgon rơ̆ rŭ, li la, lơh geh wil tơl jơnau kờñ ngui sa bơh làng bol dê tàm dơ̆ Sa tềp bơhiàn dà lơgar dê.