Tàm Hìu bơsram ơm sa bĭc tơn 2 kấp kấp dùl- kấp bàr Dục Nông, broă lơh bơt bơtàu gam lơh sir ală bơnah dŭt ndơl. Ndrờm bal mờ mut lơh broă, hìu bơsram kung gơ jal ngan sac rơwah kơnòm bơsram nàng gàr niam tơl ală bơta nàng ai hìu bơsram mut lơh broă tàm nam bơsram pa 2026-2027. Jat broă rơndăp lơh, Hìu bơsram ơm sa bĭc tơn 2 kấp kấp dùl- kấp bàr Dục Nông geh pơgăp 1 rơbô 680 nă kơnòm bơsram. Tàm hơ̆, rlau 1 rơbô 140 nă kơnòm bơsram geh ntrờn bơh Hìu bơsram kấp dùl mờ kấp bàr Đắk Dục; pơgăp 550 nă kơnòm bơsram sac rơwah pa tàm ù tiah do dê nàng jat bơsram jat broă lơh ơm sa bĭc tơn tàm hìu bơsram.

Tơnơ̆ tŭ geh jàu broă jàu, hìu bơsram neh tơnggơs Mpồl Sồr lơh, Mpồl duh broă sac rơwah kơnòm bơsram; pơgồp bal mờ gơnoar atbồ, ală mpồl cau mờ Mpồl lơh broă Mặt trận tàm tơl thôn, ƀòn tus tơl hìu bơnhă làng bol nàng mblàng yal, yal tơngĭt tơl làm ală broă lơh, broă dong kờl lời ai kơnòm bơsram ơm sa bĭc tơn in. Ồng Trần Đức Thư, Lam bồ Hìu bơsram 2 kấp kấp dùl mờ kấp bàr Dục Nông pà gĭt, tus tŭ do, hìu bơsram neh sac rơwah geh rlau 360 nă kơnòm bơsram, lơh geh rlau 65% broă jàu. Mơya, tài bơh do là broă lơh sơn rờp lam lơh tàm ù tiah do dê den tàng broă lơh sac rơwah kơnòm bơsram gam gơtìp kal ke tài bơh uă cau gam kơlôi rcang ngòt bè broă sền gròi mờ atbồ oh kòn:

"Lài do ờ hềt geh hìu bơsram ơm sa bĭc tơn den tàng tŭ do uă mè bèp kơnòm bơsram kơlôi sơnơng. Hìu bơsram pa pơgồp bal mờ kấp ủy, gơnoar atbồ ală tiah pơn jat tai mblàng yal, hòi jà nàng mè bèp kơnòm bơsram in wă, pin dờn mờ iang nùs ai oh kòn he in lòt bơsram”.

Bal mờ sac rơwah kơnòm bơsram, tiah do kung lơh gùng dà broă lơh ai mpồl cau pơgru nàng gàr niam broă bơto bơtê bơh tàm nam bơsram sơn rờp tơn. Tềng đăp mat, hìu bơsram ai jơh cau pơgru bơh Hìu bơsram kấp dùl mờ kấp bàr Đắk Dục dê; mơkung pơn jat tai kờp sền, tam pà mờ lơh sră pơ pơrgon lơh broă cau pơgru jat jơnau kờñ geh ngan.

Jat ồng Trần Cao Bảo Việt, Chủ tịch Anih duh broă Làng bol sàh Dục Nông, broă bơcri priă lơh hìu bơsram ơm sa bĭc tơn 2 kấp dờp geh bơta ring bal uă bơh làng bol dê. Khà kơnòm bơsram cih mat dan bơsram ơm sa bĭc tơn neh sơr lèt mờ broă bơyai lơh bơh sơn rờp, tơngŏ bơta kơ̆p gơn bơh mè bèp kơnòm bơsram dê gơwèt mờ tiah bơsram pa. Tiah do neh sồr ală anih lơh broă geh gơnoar bơtơl broă jàu sac rơwah cau pơgru tàm nam 2026 nàng kờñ lơh geh jơnau kờñ bơto bơtê tŭ hìu bơsram ngan ngồn mut bơsram. Gơwèt mờ tiah ơm sa bĭc tơn tàm hìu bơsram, ală cơldŭ ơm geh lơh ơnàng, tơl làm ală bơta ngui pah ngai. Jat tàm khà kơnòm bơsram cih mat dan ơm ngan ngồn, sàh rơ̆p yal mờ kấp geh gơnăp gơnoar in sền sơwì gùng dà broă lơh ai tai kơnòm bơsram ơm sa bĭc tơn tàm hìu bơsram dilah lơh geh ală bơta jat jơnau sồr dê. Ồng Trần Cao Bảo Việt, Chủ tịch Anih duh broă Làng bol sàh Dục Nông pà gĭt:

“Tơnơ̆ tŭ sac rơwah kơnòm bơsram rơ̆p jat tàm mpồl kơnòm bơsram ngan ngồn tàm tơl ơdŭ bơsram den rơ̆p yal dan jơnau đơs bơh Anih duh broă Làng bol càr Quảng Ngãi mờ dan jơnau bơto pơlam bơh Sờh Broă dơlam is càr Quảng Ngãi dê nàng tam ntrờn bàr pe cau pơgru di pal tàm ală môn bơsram. Mờ bol añ kung neh dan jơnau đơs bơh Sờh Broă dơlam is càr mờ Sờh Bơto bơtê càr Quảng Ngãi dê nàng sac rơwah tai cau pơgru tàm nam 2026 bơtơl tai broă jàu ai ù tiah sàh Dục Nông in”.

Tàm sàh Sa Loong, broă lơh rcang ai hìu bơsram ơm sa bĭc tơn kung gam geh lam lơh ring bal. Broă lơh geh kờp jơh priă bơcri lơh mờr 209 tơmàn đong, kờp dŭ lơh sir tàm lồi nhai 7 nam do nàng drơng nam bơsram pa in.

Sàh Sa Loong neh hòi jà ală mpồl cau pơgồp bal mờ hìu bơsram lòt tus tơl thôn mblàng yal, bơto pơlam mờ mè bèp kơnòm bơsram in bè ală bơta bơsram sră, ơm kis tàm hìu bơsram ơm sa bĭc tơn kung bè ală broă lơh dong kờl lời ai kơnòm bơsram in. Ồng Xiêng Thanh Phú, Chủ tịch Anih duh broă Làng bol sàh Sa Loong, càr Quảng Ngãi đơs nền, tus tŭ do, broă lơh sac rơwah kơnòm bơsram sền bal lơh sir jat broă rơndăp lơh.

"Jat tàm nùs nhơm Jơnau lơh nền tàm pơrjum sồ 71 bơh Bộ Chính trị dê, Đảng ủy mờ Anih duh broă Làng bol sàh Sa Loong sền gĭt tơnguh uă cồng nha bơto bơtê, is ồn là bơta jak chài mpồl cau pơgru, là dùl tàm ală kơnòl broă tam gơl pràn bơh tơngai lơh broă 2025 - 2030. Sàh rơ̆p pơn jat tai lơh pràn broă lơh bơto bơtê, tề lam cau pơgru tàm ală môn bơsram gam ờ hềt tơl, mơkung lơh jat broă sac rơwah mpồl cau pơgru geh tơl jơnau kờñ mờng lơh broă, lơh geh jơnau kờñ tam gơl pa bơto bơtê mờ di pal mờ ală bơta geh ngan bơh tiah do dê”.

Nàng rcang ai nam bơsram 2026-2027, Anih duh broă Làng bol càr Quảng Ngãi neh kĭ ring bal broă rơndăp lơh sac rơwah kơnòm bơsram gơwèt mờ 4 hìu bơsram ơm sa bĭc tơn 2 kấp kấp dùl mờ kấp bàr tàm ală sàh tiah nhàr lơgar hơ đang ù gơl. Kơnòm bơsram bơh ơdŭ 1 tus ơdŭ 9 geh sac rơwah kơnòm bơsram ơm kis tàm ală sàh tiah nhàr lơgar mờ ală sàh tiah nhàr lơgar rềp bal jat jơnau sồr dê.

Poan hìu bơsram geh jàu broă jàu sac rơwah kơnòm bơsram geh Dục Nông, Mô Rai, Rờ Kơi mờ Sa Loong mờ kờp jơh rlau 5 rơbô 600 nă kơnòm bơsram, tàm hơ̆ mờr 1 rơbô 250 nă kơnòm bơsram ơm sa bĭc tơn tàm hìu bơsram. Ồng Nguyễn Ngọc Thái, Kwang Lam bồ Sờh Bơto bơtê mờ Bơsram càr Quảng Ngãi pà gĭt, bal mờ broă lơh mhar tŭ tơngai mut lơh ală hìu bơsram ơm sa bĭc tơn ală kấp, gah bơto bơtê gam pơgồp bal mờ ală tiah lơh sir broă lơh sac rơwah kơnòm bơsram, rcang phan bơna nàng ală hìu bơsram in di tŭ wă kơnòm bơsram mut tàm nam bơsram pa.

“Bol añ neh tă pơgồp jơnau đơs mờ Anih duh broă Làng bol càr Quảng Ngãi đơng lam, hòi jà tơl mpồl cau nàng tơnguh dơ̆ lơh broă, tơnguh mpồl lơh broă, lơh mang, pơnđơl pràn lơh ngan lơh sir gờñ. Lơh ngan tàm nhai 8 nam 2026 rơ̆p lơh ală broă kờp sền wơl broă lơh, sră nggal, pơs wàs mờ ai sơnđờm mut nam bơsram pa di jat gùng dà broă lơh bơh càr dê”.