Drà tàm sàh tiah kơh bơnơm Tu Mơ Rông, càr Quảng Ngãi (lài do gơwèt kơnhoàl Tu Mơ Rông, càr Kon Tum) ờ mìng là tiah kă bro phan lơm mờ gơ gơs tiah tìp mat bơh làng bol kòn cau Sơdàng dê tàm tiah kơh bơnơm, pơgồp bơnah tam gơl bơhiàn lơh sa wèt tus broă lơh broă lơh sa suơn sre sàng goh. Drà geh bơyai lơh ờs mờng pah nhai dùl dơ̆, gơ hòi gơ jà gal làng bol tus bal. Tơnơ̆ 3 dơ̆ bơyai lơh, drà Tu Mơ Rông ngan ngồn gơ gơs broă lơh tờm, lơh geh ù tiah kă bro phan ngăc ngar, dong làng bol kòn cau Sơdàng tam gơl bồ tơngoh kơlôi sơnơng lơh sa. Bi Y Khương ơm tàm thôn  Ngọc Leng, sàh Tu Mơ Rông pà gĭt:“Drà dơ̆ 1 làng bol là làng bol gam ờ hềt khin ngan sơl, cèng tus tàm drà rơngòt ờ gŏ geh cau blơi. Mìng geh 6, 7 nă hìu bơnhă lòt lơm. Tus tŭ hơ̆ den dùl hìu bơnhă tăc geh 300 rơbô đồng, rê mblàng yal ai ală hìu bơnhă  ndai in. Dơ̆ 2, dơ̆ 3 gal rlau, sàh den geh dong kờl tai dra ràng tăc phan, làng bol chờ hờp ngan”.

Drà tờm sàh Tu Mơ Rông geh sơnđờm mut ngui ngai 20/8/2025 tàm bă ù ơnàng mờr 1 lồ, geh tiah hìu gŭ 500 thơk vuông mờ ală bơta phan ndai, kờp jơh priă tă lơh rlau 4 tơmàn đông bơh Anih duh broă Làng bol kơnhoàl Tu Mơ Rông, càr Kon Tum (yau) dê bơcri priă lơh. Tàm pơr dờn broă lơh bơt bơtàu do, gơnoar atbồ sàh Tu Mơ Rông neh lam lơh broă lơh “Drà 0 đông mờ geh priă”, lơh geh ală bơta nàng làng bol in kă bro, tàm pơgơl phan bơna.

Jat ồng Dương Đăng Khoa, Phó Củ tịc Anih duh broă Làng bol sàh Tu Mơ Rông, bơta krơi is bơh broă lơh “Drà 0 đông mờ geh priă dê” là cèng bơta kwơ mpồl bơtiàn mơkung lơh geh bơta gơn kơnờm lơh sa. “0 đông” là bơta phan ngui sa, ào mpha bơh sàh dê hòi jà tă pơgồp bal bơh priă jền mpồl bơtiàn dê pà gời ai làng bol in. Ai “geh priă” là phan lơh geh bơh broă lơh sa suơn sre, phan lơh sơnơm bơh làng bol dê geh làng bol, mpồl lơh sa kă bro mờ lơh broă bal blơi wơl nàng gơ hòi gơ jà lơh sa. Ală drà bơyai lơh sùm tàm ngai 20 pah nhai, pơgồp bal  mờ ală broă lơh mpồl bơtiàn bè Sa tềp trung thu, Ngai cau Ùr Việt Nam 20/10 halà mờr tus Ngai Cau pơgru Việt Nam 20/11. Ồng Dương Đăng Khoa pà gĭt, tơngai tus, sàh Tu Mơ Rông kờp dŭ tơnguh dơ̆ pờ drà pah nhai 2 dơ̆:“Tam gơl broă lơh, bơta mờng kwèng, bơta gĭt wă bơh làng bol dê ờ ƀuơn dồ ết lơi ờ, den tàng bol he lơh hời rơ hời, jàu kwang bàng in drơng  bal mờ thôn mblàng yal, dong kờl làng bol cèng phan bơna tus tàm drà tăc. Phan bơna “0 đông” rơ̆p rơ hời tơmù, ai phan lơh geh bơh broă lơh sa suơn sre mờ phan lơh sơnơm “ geh priă” rơ̆p gơguh”.

Jơh gùt càr Quảng Ngãi tŭ do geh 181 drà, 3 anih tờm kă bro phan, 12 drà pa. Tàm tiah kơh bơnơm mờ tiah nhàr lơgar, kờp bal tơl sàh geh 2 nơm drà. Broă lơh sir phan bơna lơh drà lơh geh ală bơta ƀuơn ai tăc bro phan bơna bơh ƀòn lơgar dê. Uă phan bơna pơn rơ, ngan là phan lơh sơnơm bơh làng bol jơi bơtiàn dồ ết nă cau dê neh geh tăc bro tàm ală drà mờ anih tờm kă bro phan, pơpgồp bơnah sơlơ tơnguh tai bơtàu tơnguh lơh sa ƀòn lơgar, kơ̆ kơl jăp rài kis làng bol dê.