Tàm 5 sàh nhàr lơgar, geh: Bờ Y, Ia Tơi, Ia Đal, Đăk Long mờ Đăk Plô, càr Quảng Ngãi, ală rơndăp broă lơh hìu bơsram bal ơm sa bĭc tơn ală kâp Kâp dùl mờ Kâp bàr dồ ròt geh sơnđờm lơh bơh nhai 03 nam 2026. Do ờ mìng là broă gơguh tàm bơcri priă phan bơna bơ̆t bơtàu bơto bơtê, mờ gam pơgồp bơnah lơh gơlik geh bơnàng jă bơtàu tơngguh jŏ jòng ai tiah nhàr lơgar in, tiah jơi bơtiàn dồ êt nă cau đah măt tơngai Mŭt càr Quảng Ngãi.

Tàm sàh Bờ Y, dùl hìu bơsram niam tre, wil tơl phan ngui là kơ̆p kờñ ngan bơh pơgru mờ kơnòm bơsram dê bơh uă nam do. Ùr pơgru Võ Thị Tuyên, pơgru bơto Hìu bơsram Kâp dùl mờ Kâp bàr Đắk Xú, sàh Bờ Y kơ̆p kờñ rơndăp broă lơh geh lam lơh di tơngai:

“Tŭ do geh Đảng mờ Dà lơgar sền gròi bơ̆t bơtàu ai hìu bơsram ơm sa bĭc tơn ală kâp in, ngan ngồn là rơ̆p geh dùl nơm hìu bơsram niam tre mờ niam. Bơh hơ̆ rơ̆p lơh geh tŭ niam nàng ai pơgru mờ kơnòm bơsram hìu bơsram dê in lơh jăt niam kơnòl broă bơto bơsram he dê. Ală kơnòm bơsram kung rơ̆p geh tŭ niam bơsram tàm dùl tiah niam pa”.

Tŭ do, càr Quảng Ngãi gam lơh 9 nơm hìu bơsram ơm sa bic tơn ală kâp tàm ală sàh nhàr lơgar. Ală rơndăp broă lơh geh lơh ndrờm bal, geh bơta pơgồp bal niam đah gơnoar ătbồ mờ làng bol.

Tàm sàh nhàr lơgar Dục Nông, broă săc rwah anih lơh hìu bơsram geh lơh loh làng ờ ndơ̆p mpồn, geh bơta tus bal bơh làng bol dê. Bă ù tàm thôn Ngọc Hiệp mờ bă ù ơnàng pơgăp 4 lồ 2 sào geh rwah lơh anih lơh hìu bơsram. Ồng Trần Cao Bảo Việt, Củ tịc Anih duh broă Làng bol sàh Dục Nông, càr Quảng Ngãi, pà gĭt, ƀòn lơgar neh rơcăng lài bơ̆t bơtàu gùng dà broă rơndăp lơh rơndăp tăp sèng, ngui hìu bơsram cơldŭ bơsram:

“Tàm ală tŭ bơ̆t bơtàu hìu bơsram ală kâp den bol hi geh ring bal uă bơh ală làng bol dê, mờ ngan là ală làng bol gùt dar thôn Ngọc Hiệp, thôn Dục Nhầy 3, den broă lam lơh tus tŭ do sền bal lơh di tơngai”.

Tàm tiah bơ̆t bơtàu Hìu bơsram bal ơm sa bic tơn ală kâp Kâp dùl mờ Kâp bàr Dục Nông, gĭt nờ rơhiang nă cau lơh phan bal mờ uă măy mŏk lơh broă sùm. Thượng tá Vũ Thanh Khương (Kông ty dờng 319 Ƀộ Ling klàng), Lam bồ Mpồl đơng lam lơh rơndăp broă lơh đơs nền, mpồl gàr niam tơngai pơrgon lơh gơs bơ̆t bơtàu hìu bơsram tàm nhai 7 tus:

“Gĭt nền do là dùl kơnòl broă cíñ trị gơcèng jơnau gơtha is ồn ngan, bol hi neh tơrgùm uă ngan cau lơh broă, phan lơh broă mờ nàng kờñ lơh jăt di tơngai lơh. Kờp tus tơngai do, mpồl neh lam lơh 13 tàm 13 khà broă mờ tàm tiah bơ̆t bơtàu tŭ do den mờr 200 nă cau lơh phan kung bè 10 nơm bồ măy, măy mŏk phan ngui gam lam lơh dồ ròt tơngguh dơ̆ lơh, tơngguh mpồl lơh nàng tàm gơ jàr mờ trồ tiah ƀươn ƀoài ngan rlau jơh, lơh mhar tơngai pơrgon lơh, lơh bè lơi ai broă lơh bơ̆t bơtàu lơh di tơngai pơrgon”.

Jăt Mpồl Ătbồ rơndăp broă lơh bơcri priă bơ̆t bơtàu ală broă lơh bơ̆t bơtàu gùng lòt, drơng rài kis làng bol mờ lơh sa mờ măy mŏk càr Quảng Ngãi, ală rơndăp broă lơh bơ̆t bơtàu hìu bơsram ală kâp tàm Dục Nông, Sa Loong, Rờ Kơi mờ Mô Rai gam geh lam lơh dồ ròt. Tàm hơ̆, rơndăp broă lơh tàm sàh Rờ Kơi geh pơgăp 43%, Dục Nông mờ Sa Loong geh pơgăp 40%, gam Mô Rai geh pơgăp 22% bơnah broă.

Bal mờ 4 rơndăp broă lơh gam lơh, 5 rơndăp broă lơh tàm ală sàh: Bờ Y, Ia Đal, Ia Tơi, Đăk Long mờ Đăk Plô kung neh geh sơnđờm lơh, gam lơh sir sră nggal nàng lam lơh ndrờm bal. Mò Y Ngọc, Phó Củ tịc Duh broă sùm Anih duh broă Làng bol càr Quảng Ngãi sồr ală gah, ală ƀòn lơgar rơcăng ală bơta pal geh nàng lơh geh cồng nha ală hìu bơsram ơm sa bic tơn ală kâp tŭ lơh sir.

“Tus nam bơsram 2026- 2027, tơn jơh tơngai 1, 4 hìu bơsram mŭt lơh broă den mpồl kwang bàng ătbồ, pơgru pal geh tơl nàng bol he lam lơh bơto bơsram bơh chờm tơn. Cau tờm bơcri priă pơn jăt tai lam lơh, rơcăng mpồl kwang bàng ătbồ mờ pơgru ai tŭ tơngai nam bơsram 2027- 2028 in tŭ 5 hìu bơsram gam wơl lòt mŭtn lơh broă. Añ kung sồr Sờh Bơto bơtê mờ Bơsram càr Quảng Ngãi sền gròi lam lơh tơn bơh tŭ do nàng bol he gơtùi lơh geh jơnau sồr kơnòl broă tàm tơngai tus”.

Ală hìu bơsram ơm sa bĭc tơn ală kâp gam rơhời geh lơh tàm tiah nhàr lơgar càr Quảng Ngãi dê ờ mìng là broă lơh bơ̆t bơtàu bơto bơtê lơm, mờ gam là broă lơh bơ̆t bơtàu bơh bơta pin dờn dê. Làng bol tiah nhàr lơgar càr Quảng Ngãi ơm kơ̆p ngai broă bơ̆t bơtàu lơh sir, nàng oh kòn he dê geh bơsram tàm tiah niam rlau.