Neh mờr klo ngai, ùr bơklau bi Đinh Thị Lá (29 sơnam) kung gam tơryang tơryồng bal mờ cau lơh hìu, lơh broă mờ măi tàm bơrlŭ sơmang nàng lơh hìu ơm pa. Bi ngoh rơngăc, rài kis ƀòn lơgar dê gĭt nđờ nam do ờ geh bơta chờ hờp lơi, tŭ do neh tam gơl jơh lơm. Mang tus, ồs đèng àng jơh ƀòn, kơnòm dềt sền akhar jơnau bơsram, jơh ƀòn nisơna chờ hờp uă rlau ngan: “Lài do den blơi măi pờ tơlik ồs đèng, tơnơ̆ do Dà lơgar dong kờl đèng năng lượng. Tŭ do nam 2025 geh gùng che ồs đèng kao thế den phan bơna mờ gùng che ồs đèng neh niam uă rlau mờ ală nam lài”.

Broă lơh dŭi che ồs đèng ai làng bol ƀòn Canh Tiến in kờp jơh geh khà priă bơcri lơh rlau 9 tơmàn đong, sơnđờm mut lơh nhai 12 nam 2024 mờ lơh sir tàm nhai 4 nam 2025. Jat ồng Đinh Văn Tào, Ƀí thư Ci ƀộ mơkung là Lam bồ thôn ƀòn Canh Tiến, bơh tŭ geh ồs đèng, làng bol ngan ngồn “tam gơl”: “Geh ồs đèng neh ƀuơn ngan ai rài kis pah ngai in, trồ mang, is ồn là ală sau bơsram sră. Lài do làng bol kơ̆p kờñ ngan geh iăt sền, geh ồs đèng rau den uă hìu bơnhă neh blơi tivi sền mờ lùp bơsram ală jơnau yal mpồl bơtiàn dê, ngui bơta chài măi mok bè tam phan, ròng phan...”

Ƀòn Canh Tiến geh 176 hìu bơnhă uă ngan là kòn cau Banhar mờ cau Prum. Bơh dùl tiah kal ke uă ngan, Canh Tiến gam geh ală broă lơh kơnhăp kơ̆. Bal mờ gùng che ồs đèng, phan bơna bơt bơtàu gùng lòt rê kung geh sền gròi ngan nàng lơh niam wơl. Srơh pà is ù pờ gùng neh geh làng bol dồ nùs bal lơh jat pràn kơl dang. Ồng Dương Hiệp Hòa, Củ tịc Anih duh broă Làng bol sàh Canh Vinh đơs nền:“Dà lơgar dŭi gùng che ồs đèng là gùng dà broă lơh di ngan làng bol dồ nùs bal kờñ. Năng lượng tus tiah lơi bơtàu tơnguh lơh sa tus tiah hơ̆. Tŭ do sàh gam tơrgùm nàng bơt bơtàu ƀòn Canh Tiến gơ gơs ƀòn lòt  nhơl mpồl bơtiàn jat jơnau sồr lơh bơh càr dê nàng kờñ jơnau kờñ bơtàu tơnguh lơh sa mpồl bơtiàn bơh tiah do dê”.