Mờ rlau 650 mpồl dong kờl is, tàm nhai 3 pa do, Ơruh pơnu jơh gùt càr Lâm Đồng neh hòi jà tă pơgồp dà kơl hề rơnàng kơnòm să lam lơh rlau 500 broă lơh bơt bơtàu ơruh pơnu, kờp jơh priă jền rlau 4 rơbô 100 tơmàn đong. Tàm hơ̆, lơh jat srơh tàm pơrlòng tàm sơm bat tê bal tơn jơh hìu lơh ing, hìu ồm sèt ñhăt dà mìu, mờ broă hòi jà lơh pa 12 nơm hìu, dong kờl 160 ngai lơh broă, kờp jơh khà priă dong kờl rlau 800 tơlak đong.

Lam lơh mờr dồ rơhiang dơ̆ ai cau lik lòt lơh broă ngai rlô tơlir, ngai lơh uă bơt bơtàu ƀòn lơgar pa gơ hòi gơ jà mờr 13 rơbô 500 dơ̆ đoàn viên, ơruh pơnu tus bal. Bơdìh hơ̆, ală kấp ƀộ Đoàn càr Lâm Đồng neh bơyai lơh 137 mpồl ơruh pơnu dong kờl “Jơh gùt làng bol bơsram sồ” dong mờr 10 rơbô nă làng bol gĭt mờ bơta chài sồ. Bi Trần Anh Tú, Ƀí thư Thàñ đoàn ƀòn dờng Dà Làc đơs là, ală cồng nha do neh tơngŏ loh làng gơnoar lam lài bơh rơnàng kơnòm să dê tàm broă tus bal bơtàu tơnguh lơh sa- mpồl bơtiàn tiah do dê: “Bơh ală broă lơh do den bol añ chờ hờp ngan tài bơta lơh jat jơh nùs ngan bơh ală bơyô đoàn viên dê. Bơta hơ̆ đơs nền là rơnàng kơnòm să sền dờng màng rài lài do mờ pơn yờ să bè bơhiàn bơh ală rơnàng lòt lài dê. Mờ bơh tơl broă lơh bè hơ̆ ală bơyô kơnòm să kung sùm cih dờp, lơh ngan mờ pơn đơl pràn lơh ngan rlau tai tàm broă lơh, bơsram sră, lơh broă nàng pơn jat tai tă pơgồp dà kơl hề bơt bơtàu ƀòn lơgar, Dà lơgar".

Jat bi Trương Văn Tùng, kwang bàng Tỉñ đoàn càr Lâm Đồng, mờ broă lơh lam bơceh lơh, tơngume geh ngan, ală broă lơh neh lơh geh bơta gơ rề niam pràn ngan tàm ơruh pơnu mờ mpồl bơtiàn. Bơh hơ̆, lơh jat geh cồng nha nùs nhơm lam lài, geh kơnòl bơh rơnàng kơnòm să dê, lơh geh nùs nhơm tàm pơrlòng duh hồl mờ bơta gơ hòi gơ jà pràn ngan tàm đoàn viên, ơruh pơnu, kơnòm pa dờng mờ kơnòm dềt tàm jơh gùt càr dê: “Tàm nam 2025, bol añ pơlam gùng dà rơ̆p bơyai lơh ết ngan rlau jơh 4 dơ̆ ai cau lik lòt lơh broă uă bơt bơtàu ƀòn lơgar pa mờ Ngai rlô tơlir nàng lơh bè lơi geh broă lơh pah dơ̆, geh kwơ. Do ndrờm là ală broă lơh neh geh bơyai lơh bơh jŏ ngan mờ bol añ sùm gàr niam mờ lơh jat.