Ală ngai do, tàm gơl gùng tiah nhàr lơgar gơwèt sàh Quảng Trực, càr Lâm Đồng, gơ crà bồng bi pơrhê sơrmañ rơmĭt tàm tiah dờng ơning ơnàng brê tơlir mờ mìr kơphê, mắc ca, tiêu. Mang tus, ƀong đèng sòl àng tàm uă gơl gùng. Hơ̆ ngan là broă lơh bơt bơtàu “Sòl àng gùng tiah nhàr lơgar” bơh Đoàn Ơruh pơnu sàh Quảng Trực dê lơh. Bi Y Nhật Minh – Phó Củ tịc Anih duh broă Mặt trận sàh, Ƀí thư Đoàn sàh pà gĭt, jơh gùt sàh neh crăp rlau 5 kơi sồ gùng che ồs đèng sòl àng, pơgồp bơnah gàr niam lơngăp lơngai, rơndăp tăp sèng, nàng ƀòn lơgar in lơngăp lơngai. Di dơ̆ gờm chờ sơnam pa- gờm chờ Đảng, rơnàng kơnòm să sàh tiah nhàr lơgar Quảng Trực tus bal lòt sền tiah nhàr lơgar bal mờ mpồl ling tiah nhàr lơgar mờ bơyai lơh ală dơ̆ niam chài, đơs crih tam ya, dròng cing jañ mồng, tam ya xoang, lơh geh nùs nhơm chờ hờp chờ hờñ brơn brài: “Ndrờm bal mờ kơnòl broă sền gàr tiah nhàr lơgar, Đoàn sàh Quảng Trực gam ai niam chài ờs mờng bơh yau wơl geh wơl tàm pơrjum đoàn dê. Ală dơ̆ pơrjum pơgồp bal mờ cing mồng, đơs pơnđick kòn cau M’nông neh dong khà đoàn viên tus bal pơrjum sùm gơguh pơgăp bơh 60% tus rlau 85%. Nam tus, Đoàn sàh rơ̆p pơn jat tai pờ ơnàng broă lơh sòl àng gùng tiah nhàr lơgar, lam uă mpồl ơruh pơnu lòt sền jài, mblàng yal jài nàng tơl nă đoàn viên in ndrờm geh broă lơh geh ngan, đềt mềr rlau mờ ƀòn lơgar he dê”.

Bơta niam sơnam pa gam geh tàm sàh Thuận An, càr Lâm Đồng, tiah srơh niam chài, đơs crih tam ya ơruh pơnu geh gàr niam sùm. Bi Y A Rôn – Phó Ƀí thư Đoàn sàh pà gĭt, bơh nam 2022 tus tŭ do, bi neh bơyai lơh tơn rlau 20 dơ̆ pơrjum, mblàng yal bơto bơtê wơl jơnau đơs pơnđick kòn cau M’nông, gơ hòi gơ jà gĭt nđờ rơhiang dơ̆ đoàn viên, ơruh pơnu, kơnòm pa tàu tus bal. Uă bơyô kơnòm să bơh tiah ờ hềt gĭt đơs tŭ do neh gơtùi đơs tàm sơrbŏ bal, ràng tơlik tàm ală dơ̆ lơh chờ bơh ƀòn lơgar dê. Nam 2025 pa do, bi Y A Rôn chờ hờp ngan tus bal tàm mpồl cau ala mat ơruh pơnu Việt Nam mờ “Gùng lòt pơr hê- kơlôi sơnơng, bơsram ơruh pơnu dê” tàm lơgar Lo. Bi pà gĭt:“Dơ̆ lòt dong he in gĭt wă uă bơta ngan, is ồn là gŏ loh kơnòl bơh ơruh pơnu kòn cau M’nông dê tàm tơngai pa. Tìp mat geh uă cau geh tìp mat lơh kwèng lùp bơsram ală bơta niam bơh ală bơyô tàm lơgar mờ lơgar bơdìh dê. Nam tus, añ rơ̆p pơn jat tai bơt bơtàu ală mpồl đơs pơnđick ơruh pơnu, mơkung kŭp wơl clip, ai jơnau đơs pơnđick kòn cau M’nông pơđàng tàm internet nàng uă cau in gĭt tus rlau, nàng rơnàng kơnòm să in pơn yờ să mờ ờ hŭi nggu rơyah tờm bơh he dê”.

Bal mờ ală dơ̆ pơrjum niam chài, uă ơruh pơnu kòn cau M’nông tàm càr Lâm Đồng neh khin cha sơnđờm mut lơh broă bơh bơhiàn niam chài is jơi bơtiàn dê. Tàm ƀòn Bu Dak, sàh Thuận An, bi H’Her, ùr kơnòm să kòn cau M’nông, neh bơtàu tơnguh broă lơh tàñ ồi kòn cau, lơh geh broă lơh sùm ai rlau 10 nă oh mi in, mờ priă lơh geh rlau 5 tơlak đong tơl nă cau pah nhai. Sền gĭt broă ngui sa tơngai pa dê, bi tơmŭt phan bơna tăc tàm Facebook, Zalo, TikTok, sùm livestream yal tơngĭt phan bơna. Bi H’Her pà gĭt: broă lơh do neh lơh geh khà pe tàm dơ̆ pơrlòng Cau ùr sơnđờm mut lơh broă càr Dăk Nông yau dê: “Añ kơ̆p kờñ oh mi gĭt tàñ ồi yau geh priă lơh geh sùm, làng bol rơ̆p sền gàr is broă lơh. Añ kơ̆p kờñ phan bơna ồi kòn cau M’nông ờ mìng tăc tàm lơgar lơm mờ gam geh tàm ală drà kă bro phan điện tử ală lơgar, nàng uă cau in gĭt wă mờ kờñ rlau tai niam chài jơi bơtiàn he dê”.

Tàm gah đơs crih tam ya, cau đơs crih Điểu Náp Bunong – tŭ do gam lơh broă tàm gah niam chài càr Dăk Lăk, neh rơwah bơceh cih jơnau đơs crih tam ya lơh rơƀàng tàm tơrbŏ ai niam chài kòn cau M’nông tus rềp rlau tai mờ làng bol. Tàm ală jơnau ràng tơlik, bi ngui bơta ală bơta bơh yau kòn cau M’nông dê, pơpgồp bal mờ gùng đơs crih tơngai pa tŭ do mờ đờng goòng Tây Nguyên, lơh geh bơta barah barài, cèng bềng bơta pràn lơh gơrề uă. Cau đơs crih Điểu Náp Bunong pà gĭt bơta chờ hờp: pa do mpồl đơs crih Nap Bunong Band bơh bi dê ai geh khà A jat broă lơh bơh yau pơgồp bal mờ tŭ tơngai pa tŭ do mờ gùng đơs crih tam ya lơbơn niam tàm dơ̆ tàm pơrlòng ală mpồl đơs crih tam ya càr Dăk Lăk rề ơnàng nam 2025. Gah YouTube “Điểu Náp Bunong Official” mờ ală broă lơh ràng tơlik đơs crih tam ya li la, tàm hơ̆ tơngŏ bơta pơn rơ ngan bơh niam chài kòn cau M’nông dê neh gơ hòi gơ jà bơta sền gròi bơh gal ngan bơyô kơnòm să dê: “Tơl jơnau cih he dê tus bal ndrờm kơ̆p kờñ cau kơnòm să là niam chài M’nông ờ gŏ di là jơnau bơh rài do dê ờ, mờ gam kis tàm rài kis tŭ do dê. Nam tus, añ kơ̆p kờñ geh tai uă jơnau cih yal bè rài kis tơngai pa tŭ do bơh làng bol dê, nàng niam chài geh tàm pơn pơr dờn tai dồ bă geh is”.

Bơh ală broă lơh bơt bơtàu “Sòl àng gùng tiah nhàr lơgar”, tus broă lơh sơnđờm mut lơh broă bơh tàñ ồi kòn cau, bơceh lơh đơs crih tam ya cèng nhơm tă brê bơnơm dờng ơning ơnàng dê, ală broă lơh kơ̆ wền bơh ală bơyô kơnòm să kòn cau M’nông dê gam pơgồp bơnah lơh tam gơl muh mat ƀòn lơgar, nàng bơhiàn ờs mờng lòt bal mờ tam gơl pa. Mut tàm nam pa nam Ơseh 2026, rơnàng kơnòm să kòn cau M’nông pơn jat tai lơh gơrề uă bơta kơ̆p kơnờm tă pơgồp bal dà kơl hề, tàm sơm bat tê bal bơt bơtàu ƀòn lơgar lơngap lơngai, bềng bơhiàn niam chài is, ròng siam bơta pin dờn bè rài tơnơ̆ do àng niam kơnhăp kơ̆ tàm Tây Nguyên dê.