Hìu bơnhă bi Ma Sỹ, ơm tàm thôn Ka Rái 1, sàh Ka Đơn, kơnhoàl Đơn Dương, càr Lâm Đồng, là dùl tàm ală hìu bơnhă dờp geh bơta sền gròi is ồn tàm tơngai sa tềp. Hơ̆ là hìu ơm pa lơh dờng niam, dùl nơm hìu ơm kơnhăp ngan. Bi ngoh rơngăc đơs: “Dilah ờ geh bơta dong kờl bơh gơnoar atbồ, añ ờ gĭt tus tŭ lơi hìu bơnhă añ hơ̆ sồng geh dùl nơm hìu niam nàng ơm. Ưn ngài Đảng, Dà lơgar, ưn ngài làng bol ƀòn lơgar, kơnờm khi mờ bol añ geh hìu ơm pa, ờ gam pal kơlôi rcang bè tiah ơm tai. Bol añ geh bơta gơn kơnờm nàng lơh ngan, brồ guh tai tàm rài kis, nàng ală oh kòn in geh dùl rài tơnơ̆ do niam rlau tai”.

Dờp phan pà dờng nàng di tŭ wă rò sa tềp, bi H’Juet Niê, ơm tàm sàh Cư Pui, kơnhoàl Krông Bông, càr Dăk Lăk, kung chờ mờ ngoh rngăc ngan. Bi H’Juet đơs, neh uă nam kòn gơtìp kòp kơn jơ̆, hìu bơnhă 4 nă cau ơm hat hal tàm hìu lơh ing, tŭ do geh pà hìu pa neh lơh geh bơta gơn kơnờm dờng nàng bi in sơr lèt gan kal ke: “Nam pa do, hìu bơnhă añ geh hìu ơm pa, bol añ brơn brài ngan. Do ngan là bơta gơn kơnờm nàng ùr bơklau añ brồ guh tàm rài kis, sơr lèt gan kal ke, lik klàs rƀah mờ bè ờs wơl rài kis tàm rài tơnơ̆ do”.

Sa tềp bơhiàn Dà lơgar neh mờr tus rềp ngan. Bal mờ broă lơh mhar lơh sir hìu pa pà ală hìu bơnhă kal ke bè hìu ơm, jơh gùt ală tiah Tây Nguyên, neh bơyai lơh ală broă lơh sền gròi sa tềp. Pah jơ̆t rơbô bơnah phan sa tềp neh geh jàu pà tus tê làng bol tàm ală ƀòn lơgar in. Bulah bơta kwơ phan bơna ờ dờng ir mơya tơl bơnah phan sa tềp ndrờm mờ bơta jàu pà nùs nhơm cau dê, sền gàr, pơn jờng. Bi H’Loen Kbuôr, kis tàm sàh Ea Tu, ƀòn dờng Buôn Ma Thuột, kung yal bè bơta chờ hờp bơh he dê tŭ dờp geh ală bơnah phan pà sa tềp cèng bềng bơta kwơ: “Nam do, hìu bơnhă añ geh sa tềp, ưn ngài ală mpồl cau, ưn ngài Đảng mờ Dà lơgar neh sền gròi tus bol añ. Bol añ ngan ngồn ưn ngài mờ chờ hờp tŭ dờp geh bơta dong kờl do”.

 Tây Nguyên ơm tàm tơngai do gam rơ hời duh hồl ală broă lơh “Sa tềp bơtòm tơrgùm”. Ală mpồl cau bè Mpồl Cữ thập đỏ, Mặt trận Dà lơgar, Mpồl Lơh broă, bal mờ uă cau dồ nă să, mpồl lơh sa kă bro ndrờm sơm bat tê bal pơgồp dà kơl hề nàng tơl nă làng bol, bulah là làng bol jơi bơtiàn dồ ết nă cau, cau rƀah halà hìu bơnhă kal ke, ndrờm geh tơl ală bơta wă rò sa tềp tơl làm. Ồng Trương Công Thái, Phó Củ tịc Anih Duh broă Làng bol càr Dăk Lăk, đơs: “Pah dơ̆ tŭ sa tềp tus nam pa rê Tỉñ ủy càr, Mpồl Duh broă Làng bol, Anih Duh broă Làng bol, Anih duh broă Mặt trận Dà lơgar Việt Nam càr neh sồr ală mpồl đảng kung bè ală kấp gơnoar atbồ ală tiah bal mờ ală cau geh  nùs nhơm niam, ală mpồl lơh sa kă bro lơh broă tàm ù tiah càr dê lơh jat broă lơh hòi jà tă pơgồp bal nàng lơh jat Sa tềp bơtòm tơrgùm, drơng làng bol wă rò sa tềp ram mhŭ. Bal mờ broă lơh tơn jơh hìu lơh ing, hìu sèt ñhăt dà mìu den broă pà ală bơnah phan pà ai làng bol geh rài kis kal ke là broă lơh kwơ màng ngan”.

Tàm ală ngai lồi nam do, tŭ tơngai sa tềp gam mờr tus, ală jơnau yal bè ală hìu bơnhă rƀah geh hìu pa, geh phan pà sa tềp tơl làm ờ mìng cèng wơl bơta chờ ai khi in lơm mờ gam sòl àng bơta pin dờn tàm nùs nhơm cau dê, tàm bơta tam klăc mờ nùs nhơm kờñ gơboh kòn bơnus. Hơ̆ là phan là nùs nhơm dờng ngan, nàng nam pa do ngan ngồn là kàl kờñ gơboh, tam pà bal mờ bơta kơ̆p kờñ.