Tàm  sàh Gào, càr Gia Lai tŭ do, ờ mìng là ală dòr bơnơm kơphê ơning ơnàng, ală suơn sầu riêng, mắc ca tơlir niam bơh làng bol cau lơh broă sa tàm sàh dê tam is lơm, mờ gam geh ală broă lơh broă lơh sa suơn sre ngui măi mok pa. Pơn rơ là broă lơh tam plai màk tàm hìu krơh bơh Mpồl lơh broă bal Broă lơh sa suơn sre ngui măi mok pa 360. Mpồl lơh broă bal neh khin cha bơcri priă lơh rlau 1 lồ hìu krơh ndơ̆p, ngui măi mok lơgar ndai, ai plai màk sơng ka sền gàr jat broă lơh hữu kơ. Tàm do, phan bơna plai màk tŭ do neh geh dùl mpồl lơh sa kă bro tàm ƀòn dờng Hồ Chí Minh dong kờl giă tăc bro nàng tăc mờ lơgar ndai tus ală drà kal ke bè Hà Lan, Thụy Sĩ... mờ giă tăc sùm sơr lèt 50 rơbô đông dùl kĭ, jơnhoa rlau pơndrờm mờ drà kă bro tàm lơgar. Bi Lê Thị Bảo Trâm, Kwang lam bồ Mpồl lơh broă bal, pà gĭt:“Lài do, bol añ ờ hềt gĭt ngui bè broă lơh sa suơn sre ngui măi mok ờ. Tơnơ̆ do, tài bơh kờñ lơh phan bơna niam bơkah uă den tàng bol añ jòi gĭt, cèng lơh tềng do, kơlôi sơnơng ai cau in ngui bal mờ jơh bal  cau tam kung ờ gơtìp gơrềng sơl. Tài bơh bè hơ̆, tŭ mpồl lơh broă bal lơh geh suơn bè hơ̆ den kung geh bơta ƀuơn bơta pràn tŭ tàm pơrlòng sơl”.

Bơh nam 2018 tus tŭ do, sàh Gào neh hòi jà tă pơgồp bơta pràn jơh gùt làng bol bal mờ uă bơta pràn nàng bơtàu tơnguh phan bơna bơt bơtàu mờ lơh sa- mpồl bơtiàn. Tus tŭ do, 100% gùng lòt ală thôn, ală sàh neh geh lă cài, lơh bê tông lơm; 70% gơl gùng tờm tàm ƀlàng sre geh lơh kơ̆ kơnhăp. Khà cau lơh broă sùm geh broă lơh lơh geh 91%. Priă lơh geh kờp bal tơl nă cau nam 2024 lơh geh 70 tơlak đông. Khà hìu bơnhă rƀah gơmù pràn, mìng gam pơgăp 2,8%. Ồng Nguyễn Văn Ánh, Ƀí thư Ci ƀộ mơkung là Lam bồ thôn 5, sàh Gào pà gĭt, tŭ do làng bol neh geh ală bơnàng jă bơta chài kơ̆ kơnhăp nàng pin dờn bơtàu tơnguh lơh sa:“Tàm tam pa wơl kơphê, làng bol ndrờm tam mờ sơntìl pa. Làng bol ndrờm geh broă lơh sơng ka sền gàr, cèng wơl cồng nha uă. Kờp bal pah lồ ndrờm lơh geh 4 tấn kơphê gar dùl lồ halà 20 tấn ris dùl lồ. Ndrờm mờ hơ̆ là bă ù sầu riêng, mắc ca mờ phan tam ndai”.

Nam 2025, tŭ lơh jat gùng dà broă lơh tơmŭt bal mờ ală sàh Ia Kênh, Ia Pếch, sàh Gào geh bă ù ơnàng 183 kơi sồ vuông, khà kờp làng bol mờr 16 rơbô nă, mờ bă ù lơh sa broă lơh sa suơn sre rề ơnàng gơguh mờr 7 rơbô 800 lồ. Do là bơnàng jă kwơ màng nàng rơndăp ù tiah lơh sa tơrgùm bal, bơtàu tơnguh broă lơh sa suơn sre ngui măi mok pa. Tàm ù tiah tŭ do geh 2 rơndăp broă lơh gam geh hòi jà bơcri priă. Hơ̆ là: Rơndăp broă lơh tam, lơh gơlik mờ tăc mờ lơgar ndai biăp bùm kơnuh plai đo ngui măi mok pa tàm thôn 6 (55 lồ) mờ Rơndăp broă lơh Anih tờm lơh gơlik gar sơntìl, biăp sàng goh tàm ƀòn B (30 lồ). Ală rơndăp broă lơh do kơ̆p gơn gơ gơs bơta tờm gơ hòi gơ jà mpồl lơh sa kă bro, dong cau lơh broă sa gĭt mờ bơta chài măi mok pa, tus bal ală anih tăc phan lơh geh bơh broă lơh sa suơn sre sàng goh, drơng jơh bal tàm lơgar mờ tăc mờ lơgar ndai.

Tàm pơrjum dờng cau ala mat Đảng ƀộ sàh Gào pà do, sàh neh ai tơlik jơnau kờñ lơh geh khà gơguh lơh sa tơngai bơh nam 2026-2030 bơh 8,2% rlau hơđang; làng bol tus bal blơi sră kham kòp lơh geh rlau 95%; jơh gùt làng bol ƀòn lơgar ngui dà sàng goh... Ồng Nguyễn Hữu Sung, Ƀí thư Đảng ủy, Củ tịc Mpồl duh broă Làng bol sàh Gào, pà gĭt:“Tàm tơngai tus, Đảng ƀộ sàh Gào pơn jat tai tơrgùm lam lơh jat tus geh Jơnau lơh nền tàm Pơrjum dờng dơ̆ I tơngai lơh broă bơh nam 2025-2030 ai tơlik. Tàm hơ̆, tơrgùm lơh lài bơt bơtàu phan bơna, tam gơl sồ, bơtàu tơnguh kă bro phan, drơng broă, broă lơh sa suơn sre ngui măi mok pa, mơkung lam lơh broă lơh tơrmù rƀah kơ̆ kơl jăp jŏ jòng mờ nùs nhơm lơh ngan uă”.

Bơh pôs đồng kăc màng jơh nùs kơ̆ dơn tus dùl ƀòn lơgar gam bơtàu tơnguh bơta pràn kis pa, sàh Gào neh đơs nền nùs nhơm brồ guh pràn kơl dang. Ală suơn chi tơ̆t uă plai, bal mờ broă lơh broă lơh sa suơn sre ngui măi mok pa, là cơng tàng loh làng ngan ai bơta tam gơl pah ngai. Bơhiàn cau ling khin cha jak chài mờ bơta kơ̆p kờñ bơtàu tơnguh rơ̆p dong gơnoar atbồ ƀòn lơgar mờ làng bol sàh Gào pơn jat tai bơt bơtàu rài tơnơ̆ do pas niam, kơ̆ kơl jap jŏ jòng ai ƀòn lơgar in.