Tàm Anih tờm drơng broă sră pơ àr gơnoar atbồ sàh Tây Sơn, mìng ờ hềt tơl 10 phuk, bi Nguyễn Minh Phi, ơm tàm Mpồl Tây Xuân, neh lơh sir jơh ală broă lơh dan sră hìu bơnhă kă bro tàm internet. Bơh broă pơyoa sră pơ àr tàm internet, dờp gĭt điện tử tus tơm priă ờ ngui priă mat, tơl broă lơh ndrờm geh kwang bàng bơto pơlam lơh jat tơn tàm “Tiah dong kờl tam gơl sồ”. Bi chờ hờp yal:

“Añ gŏ broă lơh sră hìu bơnhă kă bro mhar ngan. Lài do là 3 ngai mơya tŭ do sră nggal mhar ngan, tềm pềr tŭ tơngai. Kwang bàng dong kờl niam ngan, jơh nùs ngan”.

Bơta tam gơl do là cồng nha bơh broă ring bal uă internet tàm Anih tờm Drơng broă sră pơ àr gơnoar atbồ dà lơgar bơh sàh Tây Sơn dê, dong làng bol mìng kờñ lơh dùl dơ̆ tàm điện tử ala tài uă dơ̆ lòt rê bè lài do tai.

Bơh bồ nam tus tŭ do, Anih tờm Drơng broă sră pơ àr gơnoar atbồ sàh Tây Sơn neh dờp rlau 3 rơbô 400 sră nggal; jơh ală geh bơsong di halà lài mờ tơngai pơr gon, bơsong tàm internet mờ lơh tàm internet tơl làm. Tus lồi nhai 7 nam 2026, tiah do lơh sir mờ sơr lèt 9 tàm 10 broă jàu bơt bơtàu sàh lam lài sồ, khà niam nùs bơh làng bol dê lơh geh 100%.

Bi Trần Lam Sơn, Bí thư Đoàn Ơruh pơnu sàh Tây Sơn pà gĭt, tŭ do sàh gam lam lơh ring bal ală mpồl măi mok sồ mpồl bơtiàn tàm jơh 10 thôn.

 “Mpồl măi mok sồ bol añ ai cau lơh broă dong kờl làng bol in crăp ală phan ngui sồ. Gơwèt mờ 10 thôn, broă lam lơh ai cau lơh broă geh bơyai lơh pah ngai, is ồn là crăp phan ngui iGiaLai dong làng bol gĭt mờ măi mok”.

Sùm tam gơl niam sră pơ àr gơnoar atbồ, tam gơl sồ tàm sàh Tây Sơn gam gơ rề uă tus uă gah bơh rài kis dê. Gơnoar atbồ đơng lam mờ ală jơnau yal tơngĭt; drà ờs mờng hời rơ hời tam gơl tus tơm priă sồ; mpồl lơh broă bal mờ hìu bơnhă kă bro ngui sră blơi phan điện tử; gah lơh sơnơm sền gĭt sră nggal pràn kơl dang să jan điện tử; bơto bơtê lam lơh họk bạ sồ mờ hìu bơsram ngăc ngar. Ală bơnàng jă do gam lơh geh ală mpồl sồ bơh tàm kấp sàh tơn.

Ồng Đỗ Thành Quyết, Phó Lam bồ Cơldŭ lơh broă Niam chài- Mpồl bơtiàn sàh Tây Sơn, càr Gia Lai pà gĭt, tàm dùl nam do, sàh neh bơyai lơh 34 dơ̆ pơrjum ờ pơ àr, lam lơh broă lơh drà sồ mờ 155 cau kă bro tus bal tơm priă mờ ngui priă mat mờ lơh geh khà ngui 5G gơguh tus 99,3% khà kờp làng bol. Nàng gàr niam mờ lơh jat niam cồng nha broă lơh sàh lam lài sồ, sàh neh jat nền tàm 37 kơnòl broă ngan ngồn jat broă rơndăp lơh bơh càr Gia Lai dê ai.

“Sàh Tây Sơn sền gròi bơt bơtàu Anih tờm Drơng broă sră pơ àr gơnoar atbồ lam lài. Tus tŭ do, anih tờm neh lơh sir ală kơnòl broă, broă jàu geh ai. Tàm tơngai tus, sàh lơh ngan pơgồp bal mờ ală sờh, gah, mpồl lơh broă dơng broă sồr lơh jat lơh sir jat broă rơndăp lơh bơh càr dê”.

Ală cồng nha bơh sơn rờp bơh sàh Tây Sơn dê neh lơh geh ală bơta ngan ngồn kwơ màng nàng càr Gia Lai in bơt bơtàu broă rơndăp lơh rề ơnàng broă lơh “Sàh lam lài sồ” tus 30 sàh tàm tơngai tus. Ồng Lâm Hải Giang, Phó Chủ tịch Anih duh broă Làng bol càr Gia Lai, pà gĭt, broă rề ơnàng ờ mìng là lơh jat broă lơh bơh sàh Tây Sơn dê lơm, mờ gam pal wèt tus lơh geh dùl mpồl tam gơl sồ ring bal tàm kấp sàh, pơgồp bal mờ jơnau kờñ geh ngan mờ cèng wơl cồng nha ngan ngồn ai làng bol in. Jơnau kờñ jŏ jòng là bơt bơtàu gơnoar atbồ sồ, lơh sa sồ mờ mpồl bơtiàn sồ bơh tàm kấp hơ đơm tơn, nàng tam gơl sồ ngan ngồn gơ gơs bơta gơn kơnờm sơlơ tơnguh tai bơtàu tơnguh lơh sa- mpồl bơtiàn bơh càr dê tàm tơngai pa.

 “Ală broă lơh pa bè tam gơl pa sră pơ àr gơnoar atbồ mờ tam gơl pa bơceh lơh lơh geh ală bơta ƀuơn ƀoài ngan ai làng bol mờ mpồl lơh sa kă bro in lam lơh jat sră pơ àr gơnoar atbồ, pơgồp bơnah tơrmù ƀà tŭ tơngai bơsong sră pơ àr gơnoar atbồ. Uă ală jơnau yal tơngĭt neh geh lơh sir, lơh geh ală bơta nàng gơnoar atbồ in lơh jat broă đơng lam jat tàm ală jơnau yal, gĭt nền ală bơta geh ngan nàng ai ală lơh nền gùng dà broă lơh drơng niam ngan ai bơta bơtàu tơnguh bal bơh jơh gùt càr dê”.

Bơh dùl broă lơh lơh tơrlòng lài, sàh Tây Sơn gam pà gŏ tam gơl sồ ờ mìng là jơnau bơh măi mok lơm mờ lài ngan rlau jơh là tam gơl gùng dà broă lơh atbồ mờ drơng làng bol in. Tŭ ală phan ngui sồ geh tàm tơl sră pơ àr gơnoar atbồ, tơl broă lơh kă bro phan mờ tơl drơng broă dà lơgar, broă lơh “Sàh lam lài sồ” rơ̆p gơ gơs bơnàng jă nàng càr Gia Lai in bơt bơtàu gơnoar atbồ sồ, lơh sa sồ mờ mpồl bơtiàn sồ bơh tàm kấp hơ đơm, lơh geh bơta gơn kơnờm pa ai bơtàu tơnguh mhar mờ kơnhăp jŏ tàm tơngai tus in.