Sàh Dà Chais, kơnhoàl Lạc Dương, càr Lâm Đồng, ngài mờ ƀòn dờng Dà Làc pơgăp 60 kơi sồ jat gùng dờng 27C rê đah dà lềng. Cau ling yau Kơ Să Ha Tam, 83 sơnam, kòn cau K’Ho ơm tàm thôn Tu Poh, sàh Dà Chais, pà gĭt, uă cau kòn bơh ƀòn lơgar dê neh chơ̆t phi să tàm ù tiah do mờ geh cih mat tàm Rùp kah kơlôi bơh kơnhoàl dê. Ồng ngoh rơngăc yal wơl ală jơnau rơnàng kơnòm să bềng bơta bòl glar tŭ tus bal ròng mpồn kwang bàng, lơh tàm yal tơngĭt jơnau mờ àñ tui gar phàu drơng tiah tam lơh in. Ồng Kơ Să Ha Tam, đơs:“Añ trŭ piang den pal trŭ mpồn di ngan, pal sền gròi ồs ờ gŏ di lời geh ñhŭ, dilah geh ñhŭ den rơndeh par bơh bol sò tơm dê sền gŏ mờ cuh, trŭ piang ròng ling gơ dê. Añ lơh broă tàm yal tơngĭt jơnau tŭ bơh 18, 19 sơnam lơm. Ai lòt ơruh pơnu lam lài àñ tui gar phàu den 20 sơnam. Tŭ gam ơruh pơnu lam lài, ngòt rơngơ̆t ngan rlau jơh là tìp tŭ B52 tơdùh ƀồm jơh dùl sèng tơn. Digơlan añ kung chơ̆t tàm tŭ hơ̆ rao, tŭ hơ̆ tìp rơndeh par đùh ƀồm lơh chơ̆t 7 nă tàm mpồl tơn”.

Pơn yờ să bè dùl rơnàng kơnòm să tus bal tam lơh tơngklàs ƀòn lơgar, cau ling yau K’Dĩnh, 82 sơnam, kòn cau K’Ho, ơm tàm sàh Lộc Nam, kơnhoàl Bảo Lâm, càr Lâm Đồng, tơngŏ, bơta phi să bơh rơnàng lài do dê gam dong ƀòn lơgar Dà lơgar ngai sơlơ niam bơnĕ: “Làng bol tus bal kăc màng, tă pơgồp kòi phe ròng ling. Tơl hìu bơnhă geh srơh pơgồp bal dồ sơmbat phe ơn tàm yăng, hòi là yăng phe ròng ling. Nùs nhơm bơh làng bol dê là bè hơ̆ tus di tŭ tus ngai tơngklàs tơn. Bơh ngai ring lơngai den rài kis làng bol bơtàu tơnguh đau, lơngăp lơngai, lơh ngan lơh sa. Tŭ do gùng lòt niam ngan lòt rê ƀuơn ngan rao, làng bol mờ Dà lơgar lơh bal, Dà lơgar bơcri priă lơh gùng lòt dờng ơnàng, ngai sơlơ niam rlau. Đơs ngan là, làng bol tŭ do mìng rcang tơrgùm lơh pas lơm”.

50 nam tơnơ̆ ngai tơngkàs, ală tiah làng bol jơi bơtiàn dồ ết nă cau bơh càr Lâm Đồng dê ndrờm neh tam gơl pa. Ồng Bon Yô Soan, Phó Củ tịc Anih duh broă Mặt trận Dà lơgar Việt Nam càr Lâm Đồng pà gĭt, tŭ do khà hìu bơnhă rƀah uă bơta tàm càr mìng gam hơđơm 2%, tàm hơ̆ hìu bơnhă rƀah làng bol jơi bơtiàn dồ ết nă cau hơđơm 5,5%. Đòm jat niam nùs nhơm tàm klăc bal, làng bol ală jơi bơtiàn gam pơn jat tai tàm sơm bat tê bal bơt bơtàu ƀòn lơgar ngai sơlơ pas pràn:“Tŭ do làng bol neh gĭt tam gơl rơndăp tăp sèng phan tam, phan ròng, gĭt ngui ală bơta chài măi mok tàm broă lơh sa. Añ kơlôi là tàm tơngai tus rơ̆p geh bơta tam gơl niam rlau gơwèt mờ làng bol bơh càr Lâm Đồng dê đơs bal, tàm hơ̆ geh làng bol jơi bơtiàn dồ ết nă cau đơs is”.

50 nam neh lòt gan, ală ù tiah ƀồm mền, gar phàu nam lài do neh gơ gơs ală sàh ƀòn lơgar pa bơtàu tơnguh. Làng bol ală jơi bơtiàn tàm càr Lâm Đồng gam pin dờn bal mờ Dà lơgar cơnđoà mut tàm tơngai bơtàu tơnguh pa.